الەۋمەتتىك جەلىدە الماتى كوشەلەرىنىڭ بىرىنەن باستاپ، قۇمبەل شىڭىنا دەيىن توقتاۋسىز جۇگىرگەن جىگىتتىڭ بەينەسىن كورگەن بولارسىز. جۇرت ونىڭ ارەكەتىنە تاڭعالىپ، ءتۇرلى پىكىر جازىپ جاتىر. اqshamnews.kz ءتىلشىسى جۇگىرۋدى ومىرلىك حوبيىنە اينالدىرعان ارسان ءالىمحان ەسىمدى ازاماتتى تاۋىپ اڭگىمەلەستى.
"وكپەڭ وشكەنشە جۇگىر". ارساندى نە شابىتتاندىرادى؟
ارسان ءالىمحان - قونايەۆ قالاسىنىڭ تۋماسى. جەلىدە ءوزىنىڭ ءحوببيىن ەرەكشە فورماتتا ءبولىسىپ وتىراتىن 24 جاستاعى جىگىت، ۇزدىكسىز جۇگىرۋ ارقىلى نەنى كوزدەيتىنىن ايتتى.
"جۇگىرۋ، تاۋعا شىعۋ، ۋاقىتىمدا تازا اۋادا وتكىزۋ - مەنىڭ سۇيىكتى ءىسىم. ارنايى وسىلاي جۇگىرۋ ءۇشىن ەشقاشان جاتتىققان ەمەسپىن. ءتىپتى مارافوندارعا دا قىزىقپايمىن. كەيىنگى ءۇش ايدا جەلىدە وسىنداي كونتەنت باستادىم. وندا ماعان پىكىرلىر بولىمىندەگى ادامدار "وكپەڭ وشكەنشە جۇگىر"، "سارى ءتۇس كورگەنشە جۇگىر"، "تاۋ شىڭىنا دەيىن جۇگىر" دەگەن سىندى تاپسىرمالار بەرەدى. مەنى سول دىتتەگەن نۇكتەمە جەتكەن كەزدەگى سەزىم شابىتتاندىرادى"، - دەيدى ول.
5 ساعات 30 مينۋت: تاۋعا دەيىن توقتاۋسىز جۇگىرۋ قانشالىق قيىنعا سوقتى؟
ارساننىڭ جەلىگە جۇكتەگەن كەيىنگى مارشرۋتى جۇرتتى تاڭداي قاقتىرماي قويمادى. ونىڭ نازاربايەۆ-روزىباكييەۆ كوشەلەرىنىڭ قيىلىسىنان باستاپ، قۇمبەل شىڭىنا دەيىن شامامەن 40 شاقىرىم جولدى توقتاماي جۇگىرىپ جەتكەن ۆيدەوسى جەلىدە 4 ميليوننان استام قارالىم جيناعان. ارسان تولىعىراق بىلايشا باياندادى:
"قالادان باستالعان ساپارىم شامامەن 30-40 شاقىرىمعا سوزىلدى. قۇمبەل شىڭىنا 5 ساعات 30 مينۋتتا جەتتىم. وتە قاتتى شارشادىم. وڭاي بولمادى. سەبەبى جول جازىق ەمەس، ورگە قاراي بولدى. بۇل ەكى ەسە كۇش تۇسىرەدى. دەسە دە، جوعارىدا ايتقانىمداي كوزدەگەن جەرىمە جەتپەي قويمايتىن جانمىن" ،- دەپ قوستى ول.
"تاۋدا قونعانىمدا باستىرىلىپ قالدىم"
بۇل مارشرۋت ارسان ءۇشىن ۇيرەنشىكتى جايتقا اينالعان. ونىڭ 50 شاقىرىمنان اساتىن ساپارلارى دا بولعان.
"ەڭ ۇزىنى شامامەن 40–50 شاقىرىم بولدى. ول - ۋاك-قا باراتىن جولدان تۋريست شىڭىنا دەيىن، ءارى قاراي تەررا الاڭىنا قاراي تومەن تۇسەتىن باعىت. جالپى تاۋعا شىعۋ كەزىندە نەشە ءتۇرلى جاعدايلار بولدى. بىردە قىستا كوك جايلاۋدا شاتىرسىز، تەك ۇيىقتايتىن قاپتىڭ ىشىندە تۇنەگەن كەزىمدە باستىرىلىپ قالعان ەدىم. سول ءسات مەن ءۇشىن وتە قاتتى ۇرەيلى بولدى" ،- دەپ ەسكە الدى ارسان.
"تابيعاتتىڭ عاجايىبىن تانىتىپ، ەركىندىكتى سەزىندىرگىم كەلەدى"
"تاۋ بالاسىنا" اينالعان ارسان تابيعاتتىڭ ءتۇرلى عاجاپ نۇكتەلەرىنەن كونتەنت تۇسىرگەندى جانى سۇيەدى. ول وسى ءىسى ارقىلى جاستاردى بەلسەندى ومىرگە قىزىقتىرعىسى كەلەتىنىن جەتكىزدى.
"وسىنداي ۇزاق ساپارالاردى تولىق ۆيدەومەن بەرۋدى باتىس كونتەنتتەرىنىڭ بىرىنەن بايقاپ، ءوزىم دە قايتالاپ كوردىم. ادامدارعا وتە قىزىق ەكەن. ولاردى تاڭعالدىرۋ ماعان دا شابىت سىيلادى. ءار ساپارىمدى ەرەكشە بەينەجازبالارعا اينالدىرىپ، ءوزىم سەكىلدى جاستاردى تابيعاتتىڭ سۇلۋلىعىن كورۋگە، ەركىندىكتى سەزىنۋگە شاقىرعىم كەلەدى. راسىندا الەم عاجايىپقا تولى. تەك ونى كورۋ كەرەك، سەزىنۋ كەرەك"، - دەپ تۇيىندەدى ارسان.
ايتا كەتەيىك، ارسان ءقازىر ءوزىنىڭ نەمەن اينالىساتىنىن جاسىرىپ قالۋدى سۇرادى. ونىڭ ايتۋىنشا، ادام نەمەن اينالىسسا دا، ءوز ءىسىن سۇيىكتى باعىتىمەن ۇشتاستىرۋعا ءتيىس.