الماتىداعى بۇكىل ءقوناقۇي ءۇشىن "رەال مادريد" قانشا تولەدى؟
بۇعان دەيىن بەلگىلى بولعانداي، ۋەفا چەمپيوندار ليگاسى اياسىنداعى ماچ ءۇشىن الماتىعا كەلگەن "رەال مادريد" كومانداسى InterContinental قوناقۇيىنە ورنالاستى. ولار كەلىسىمەن ءقوناقۇيدىڭ باسقالار ءۇشىن جابىلعانى تۋرالى قاۋەسەت تاراي باستادى، - دەپ حابارلايدى Aqshamnews.kz.
مۇنداي قاۋەسەتتەرگە سەبەپ بولعان جايتتار – ءقوناقۇيدىڭ قورشالۋى، ىشكە كومانداعا قاتىسى جوق ادامداردىڭ كىرگىزىلمەۋى، سونداي-اق 29 قىركۇيەك كەشىندە عيماراتتىڭ تەرەزەلەرى تۇگەلدەي قاراڭعى بولۋى: سول كەزدە ءقوناقۇي جۇمىس ىستەمەي تۇرعانداي اسەر قالدىرعان.
بۇل اقپاراتتى SHOT Telegram-ارناسى راستادى: "رەال مادريد" كومانداسى ءوز تىنىشتىعىن قامتاماسىز ەتۋ ءۇشىن InterContinental ءقوناقۇيىن 28 قىركۇيەكتەن 1 قازانعا دەيىن تولىقتاي جالعا العان. بۇل ءۇشىن كوماندا 278 ميلليون تەڭگەدەن استام (507 مىڭ اقش دوللارىنان كوپ) قاراجات جۇمساعان.
باسىلىم مالىمەتىنشە، 28 قىركۇيەك پەن 1 قازان ارالىعىندا ستاندارتتى ءنومىردىڭ ورتاشا باعاسى – تاۋلىگىنە 375 دوللار، ال ليۋكس ءنومىر – 560 دوللار بولعان. قوناقۇيدە بارلىعى 277 بولمە بار، جانە ولاردىڭ بارلىعى ماچ اياقتالعانشا "رەالعا" تيەسىلى. كوماندا 40-تان استام اداممەن كەلگەن.
وسى كۇندەرى فۋتبول مەن "رەال" جانكۇيەرلەرى ءقوناقۇي ماڭىن تورۋىلداپ، جۇلدىزدى فۋتبولشىلاردى كورۋگە تىرىستى. ال 29 قىركۇيەك ءتۇنى الماتى اۋەجايىنا جۇزدەگەن جانكۇيەر "قايراتتىڭ" قارسىلاستارىن قارسى الۋ ءۇشىن جينالدى.
26–29 قىركۇيەك ارالىعىندا الماتىعا "قايرات" – "رەال مادريد" ماچىن كورۋگە جۇڭگو، ءۇندىستان، رەسەي، جاپونيا، ۇلىبريتانيا، يسپانيا، چەحيا، تمد ەلدەرى مەن باسقا دا ەۋروپا مەملەكەتتەرىنەن 5 مىڭنان استام شەتەلدىك قوناق كەلگەن.