ريددەردە ۇيلەردىڭ اۋلاسىن سۋ باستى

حايرۋزوۆكا وزەنىندە سۋ دەڭگەيى كوتەرىلىپ كەتكەن.

سونىڭ كەسىرىنەن 2023 جىلعى 8 جەلتوقسانعا قاراعان ءتۇنى كيروۆ، وسكەمەن جانە حاريۋزوۆسكيي كوشەسى بويىنداعى جەكە سەكتوردىڭ ءتورت اۋلاسىن سۋ باستى، دەپ حابارلايدى Almaty-akshamy.kz

وسىعان بايلانىستى ريددەر قالاسىنىڭ توتەنشە جاعدايلار ءبولىمى مەن جەرگىلىكتى اتقارۋشى ورگانداردىڭ قىزمەتكەرلەرى جەركىلىكتى تۇرعىنداردى حاباردار ەتتى.

ەۆاكۋاسيا جاساۋعا قۇتقارۋشى كۇشتەر مەن قۇرالدار دايىن.

"حالىقتى ۋاقىتشا ورنالاستىرۋ ءۇشىن ريددەر اكىمدىگى ريددەر كوللەدجى عيماراتىندا جەدەل تۇردە ۋاقىتشا ورنالاستىرۋ پۋنكتىن دايىندادى.تۇرعىندار ەۆاكۋاسيالاۋدان باس تارتتى. ريددەر اكىمدىگى مەن شىعىس قازاقستان وبلىسى توتەنشە جاعدايلار دەپارتامەنتىنىڭ قۇتقارۋشىلارى اۋلالار مەن ءۇي ماڭىنداعى سۋدى سورۋ ءۇشىن موتوسورعىلار قولداندى، مۇزدى تازالاپ، وزەن ارنالارىنا قاراي ەڭىس جاساۋ ءۇشىن ارنايى تەحنيكالار تارتىلدى"، دەپ مالىمدەدى شقو اقپارات ورتالىعىنىڭ باسپا ءسوز قىزمەتى.

سونىمەن قاتار قالا اكىمدىگى مۇددەلى مەملەكەتتىك ورگاندار مەن ۇيىمدار اراسىنان كەلتىرىلگەن زالالدى باعالاۋ ءۇشىن كوميسسيا قۇردى.

"توتەنشە جاعدايدىڭ سالدارىن جويۋعا جەرگىلىكتى اكىمدىكتەن، شقو توتەنشە جاعدايلار دەپارتامەنتىنەن جانە پوليسيا دەپارتامەنتىنەن بارلىعى 20 ادام مەن 7 تەحنيكا، 2 موتوپومپا جۇمىلدىرىلدى. مونيتورينگ جۇرگىزىلۋدە"، – دەپ حابارلادى جەرگىلىكتى اكىمدىك.

ۆەدومستۆو جاعداي باقىلاۋعا الىنعانىن، كەلتىرىلگەن شىعىندى انىقتاۋ ءۇشىن كوميسسيا قۇرىلعانىن حابارلادى.

ريددەر قالاسىن سۋمەن، جىلۋمەن، ەلەكترمەن قامتۋ تولىق كولەمدە قامتاماسىز ەتىلگەن. وقيعا ورنىنا شىعىس قازاقستان وبلىسىنىڭ اكىمى مەن وبلىستىق توتەنشە جاعدايلار دەپارتامەنتىنىڭ باسشىلىعى اتتاندى.