باستى وزگەرىس – تەلەارنا ەندى «24 KZ» دەپ اتالادى.
«حابار 24» تەلەارناسى الداعى 11-جەلتوقساننان باستاپ جاڭا اتاۋمەن جانە وزگەشە فورماتپەن ەفيرگە شىعادى، دەپ حابارلايدى اlmaty-akshamy.kz «حابار» اگەنتتىگىنىڭ باسپا ءسوز قىزمەتى سىلتەمە جاساپ.
سونداي-اق حالىققا ەلدەگى جانە الەمدەگى جاڭالىقتاردى جەتكىزۋدىڭ تىڭ تاسىلدەرى ەنگىزىلەدى.
اۋديتوريانىڭ سۇرانىسىنا جانە Google Trends مالىمەتتەرىنە قاراعاندا، تەلەارنانى عالامتوردان ىزدەگەندە «24 KZ» اتاۋى «حابار24»-كە قاراعاندا ءجيى قولدانىلادى. سونىمەن قاتار، بۇل ەلدىك ەرەكشەلىكتى بىلدىرەتىن مانگە يە. قازاقستاننىڭ تەلەارناسى ەكەنىن شەتەلدىكتەر KZ بەلگىسى ارقىلى بىردەن تاني الادى. وزگەرگەن لوگوتيپتەگى زاماناۋي ەستەتيكالىق ەلەمەنتتىڭ وزىندىك مازمۇنى بار. ونداعى شۋاعىن شاشىپ، كوتەرىلىپ كەلە جاتقان كۇن بەلگىسى جاڭا كۇننىڭ باستالعانىن بەينەلەيدى. قايناعان تىنىمسىز تىرشىلىك باستالىپ، تولاسسىز اقپاراتتار لەگى اعىتىلادى دەگەنگە سايادى.
كورەرمەنگە ۇسىنىلاتىن اقپاراتتىڭ مازمۇنى مەن ەفيردەن بەرىلۋ فورماسى تەلەارنانىڭ شىعارماشىلىق شەبەرحاناسىنداعى باستى وزگەرىس بولماق. جاڭالىقتار شىعارىلىمدارىنىڭ ۋاقىتى ۇزارتىلىپ، ەلەۋلى وقيعالار تەرەڭ جانە جان-جاقتى تالدانىپ، ساراپتامالىق سيپاتى باسىم بولادى.
سونىمەن قاتار «24 KZ تاڭى»/«ۋترو 24 kz» تاڭعى اقپاراتتىق شوۋى مەن «Prime Time» كەشكى قورىتىندى اقپاراتتىق-ساراپتامالىق باعدارلاماسى ەفيرگە شىعادى. بۇل جوبالار زاماناۋي تەحنولوگيامەن جاراقتالعان جاڭا ستۋديادان بەرىلەدى.
ايماقتىق جانە حالىقارالىق تىلشىلەر قوسىنىن كۇشەيتكەن تەلەارنا جەر جاھاننىڭ تۇكپىر-تۇكپىرىنەن تىكەلەي ەفيرگە قوسىلۋ ارقىلى ەكسكليۋزيۆتى اقپاراتتار تاراتۋعا باسىمدىق بەرەدى.
«ءبىز ۋاقىت كوشىنەن قالماۋىمىز كەرەك. تەلەارنا اقپارات تاراتقاندا جەدەلدىك پەن وبەكتيۆتىلىك قاعيداتتارىن نەگىزگە الادى. قازاقستاننىڭ باستى اقپاراتتىق تەلەارناسىنداعى وزگەرىستەر العا جىلجۋدىڭ جاڭا كەزەڭىن ايعاقتايدى. اقپارات ايدىنىندا باسەكەگە قابىلەتتى بولۋ - ۋاقىت تالابى. سوندىقتان، تورتكۇل دۇنيە جاڭالىعىن جان-جاقتى جەتكىزىپ، تالعامى بيىك كورەرمەننىڭ سۇرانىسىن قاناعاتتاندىرۋعا كۇش سالامىز»، - دەدى «حابار» اگەنتتىگى» اق باسقارما ءتوراعاسى كەمەلبەك ويشىبايەۆ.
ەستەرىڭىزگە سالا كەتەيىك، تەلەارنا 2012 جىلدىڭ 1 قىركۇيەگىندە العاش رەت ەفيرگە شىقتى. سودان بەرگى ۋاقىتتا ەلىمىزدەگى اقپاراتتىق حابار تاراتۋ سالاسىندا جەتەكشى ءرول اتقارىپ كەلەدى. «24 KZ» ۇسىناتىن ەفير ماتەريالدارى - 100% ارنانىڭ ءوز ءونىمى.