ولار كالينينگراد وبلىسىنان تابىلعان.
ۇلى وتان سوعىسىندا قازا تاپقان قازاقستاندىق بەس جاۋىنگەردىڭ سۇيەگى جەرلەنگەن جەر تابىلدى، دەپ حابارلايدى Almaty-akshamy.kz
ەندى ولار قازا تاپقانداردىڭ تۋىستارىن تابۋعا كومەك سۇراپ وتىر.
«مايدان جولى» ىزدەستىرۋ-زەرتتەۋ وتريادىنىڭ كومانديرى الەكساندر شيتوۆتىڭ ايتۋىنشا، «سوۆەست» وتريادىنىڭ ىزدەۋشىلەرى باگراتيونوۆسكيي اۋدانىنداعى كورنيەۆو (بۇرىنعى سينتەن) اۋىلى ماڭىنان بەيىتتەردى تاپقان.
قازا تاپقاندار 1945 جىلدىڭ اقپان-ناۋرىزىندا فاشيستىك توپتى تالقانداۋعا قاتىسقان. ولاردىڭ اراسىندا قازاقستاندىقتار دا بار. ول - قىزىل ارميا جاۋىنگەرى يۆان ستەپانوۆيچ رۋدينسكيي. ول 1902 جىلى اقتوبە وبلىسى دالا اۋدانىنا قاراستى حەرسون اۋىلىندا دۇنيەگە كەلگەن.
اتقىش يۆان رۋدينسكييدىڭ سوڭعى قىزمەت ورنى 55-گۆارديالىق اتقىشتار ديۆيزياسىنىڭ 166-گۆارديالىق قىزىل تۋلى اتقىشتار پولكى بولعان. ول 1945 جىلى ناۋرىزدا قازا بولعان.
اقتوبەدە 1902 جىلى تۋعان قىزىل اسكەر سولداتى يۆان ميحايلوۆيچ سولوۆيەۆتىڭ سۇيەگى تابىلعان. 1943 جىلى 26 جەلتوقساندا قاراعاندى قالاسى لەنين اۋدانى لەنين رۆك ارقىلى مايدانعا جۇمىلدىرىلعان. جاۋىنگەر 1945 جىلى 27 اقپاندا قايتىس بولعان.
تاعى ءبىر جاۋىنگەر - بريگادير الەكسەي اندرەيەۆيچ شەلۋحين. 1912 جىلى كۋرسك وبلىسى، سينەيەۆ اۋدانى، لۋگ كەڭشارىندا دۇنيەگە كەلگەن. شىعىس قازاقستان وبلىسى زىريان اۋدانى زىريان رۆك ارقىلى 1941 جىلى شىلدەدە مايدانعا جۇمىلدىرىلعان. مۇراعات دەرەكتەرىنە سايكەس، اتقىشتار روتاسىنىڭ ستارشيناسى 55-گۆارديالىق يركۋتسك-پينسك ديۆيزياسىنىڭ 166-گۆارديالىق قىزىل تۋلى اتقىشتار پولكىنىڭ قۇرامىندا شايقاسقان.
سونداي-اق، 1906 جىلى تۋعان لەيتەنانت حاميت تۇرلبەن ۇلى (تۇرلبەك ۇلى، تۇرحەبەت ۇلى) ەگەۋبايەۆتىڭ سۇيەگى تابىلدى. تۋعان جەرى – قازاق كسر، اقمولا وبلىسى، اتباسار اۋدانى، №7 اۋىل. حاميت ەگەۋبايەۆ تانك كومانديرى، 213-جەكە تانك ورشا قىزىل تۋ وردەندى بريگاداسىنىڭ قۇرامىندا سوعىسقان. 1945 جىلى ناۋرىزدا قازا تاپتى.
سول جەرلەۋدەن گۆارديا لەيتەنانتى يۆان الەكسەيەۆيچ كولپاكوۆ تابىلدى. 1922 جىلى سولتۇستىك قازاقستان وبلىسى، ايىرتاۋ اۋدانى، چالقار اۋىلىندا دۇنيەگە كەلگەن. جاياۋ اسكەر ۆزۆودىنا قولباسشىلىق ەتكەن. سوڭعى قىزمەت ورنى 55-گۆارديالىق يركۋتسك-پينسك ديۆيزياسىنىڭ 166-گۆارديالىق قىزىل تۋلى اتقىشتار پولكى بولعان. 1945 جىلى ناۋرىزدا قازا تاپقان.
«بەي-جاي قارامايتىنداردىڭ بارىنەن قازا بولعان جەرلەستەرىمىزدىڭ تۋىستارىن ىزدەۋگە كومەكتەسۋىن سۇرايمىز»، - دەپ شاقىردى الەكساندر شيتوۆ.