ءقازىر ەلىمىز تۇبەگەيلى ساياسي-الەۋمەتتىك رەفورمالاردى جۇزەگە اسىرۋ ۇستىندە. ءارى بۇل رەفورمالار ناقتى ماقساتتاردى كوزدەپ وتىر.
بۇگىن وتكەن ۇكىمەتتىڭ كەڭەيتىلگەن وتىرىسىنان ءبىز جالعاسىپ جاتقان رەفورمالاردىڭ ەڭ ءبىر كۇردەلى ءارى شەشۋشى كەزەڭىنە اياق باسقانىمىزدى كورەمىز. ياعني، پرەزيدەنت قاسىم-جومارت توقايەۆتىڭ مەملەكەتتىك قۇرىلىمداعى «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسى، قوعامدا ورنىقتىرۋعا باعىتتالعان «زاڭ مەن ءتارتىپ» قاعيداتى، باسقارۋشى بيلىكتىڭ «ەستيتىن ۇكىمەت» قاعيداتى جانە وسىنىڭ ءبارى ۇشتاسا وتىرىپ، «ادىلەتتى قازاقستان» قۇرۋ سىندى باستاماسى ءوزىنىڭ جاڭا كەزەڭىنە قادام باسپاق. ءارى بۇل رەفورمالاردىڭ ەڭ ءبىر شەشۋشى كەزەڭى بولعالى تۇر. سەبەبى، ەندىگى اۋىر مىندەتتى جۇكتەيتىن ۇكىمەت پەن ۇلتتىق بانك ەلدىڭ دامۋىنا تىكەلەي اسەر ەتەتىن باتىل قادام جاساۋىنا تۋرا كەلەدى.
ۇكىمەتتىڭ كەڭەيتىلگەن وتىرىسىندا مەملەكەت باسشىسى ۇكىمەت جەتەكشىلەرىنىڭ باتىل دا كۇردەلى شەشىمدەردى قابىلداۋعا دايىن بولۋىن تاعى دا قايتالاپ ايتتى. پرەزيدەنتتىڭ بۇل ماسەلەنى شەگەلەي ايتۋىندا وزىندىك ۇلكەن ءمان جاتىر. وسىعان دەيىن جاسالعان الەۋمەتتىك-ساياسي جانە قۇقىقتىق رەفورمالار ەندىگى جەردە ۇكىمەتتىڭ ءتيىمدى ارەكەتىمەن، ناقتى دا ناتيجەلى جۇمىسىمەن جالعاسىمىن تابۋى ءتيىس. ول ءۇشىن وسىعان دەيىنگى كەيبىر ناقتى سەكتورلاردىڭ دامۋىنا كەدەرگىلەر ءبىرجولاتا جويىلىپ، ينۆەستيسيا تارتۋ مەن وڭىرلىك دامۋعا، حالىقتىڭ ءال-اۋقاتىن جاقسارتۋعا ناقتى قادام جاساۋعا تۋرا كەلەدى. بۇل كۇردەلى دە باتىل شەشىمدەردى قابىلداۋمەن جۇزەگە اسادى.
مەملەكەت باسشىسى سوزىندە ۇكىمەتتىڭ باستى جاۋاپكەرشىلىگىن كورسەتە وتىرىپ: «ۇكىمەت ەل ەكونوميكاسىن تۇرالاپ قالۋدان ساقتاپ، ورنىقتى دامۋدى قامتاماسىز ەتۋ ءۇشىن كۇردەلى شەشىمدەر قابىلداۋى كەرەك جانە ەڭ باستىسى، سول شەشىمدەردى ىسكە اسىرۋعا ءتيىس»، – دەپ اتاپ كورسەتتى. وعان قوسا مەملەكەتتىك قىزمەتشىلەردىڭ بىلىكتىلىگى مەن جاۋاپكەرشىلىكتى الا ءبىلۋى دە ماڭىزدى ەكەنىنە توقتالدى.
شەشۋشى كەزەڭدەگى ۇكىمەتتىڭ جاۋاپكەرشىلىگى اۋىر ەكەنىن قوعام دا انىق ءتۇسىنىپ وتىر. سەبەبى، قازىرگى جاھاندىق ەكونوميكالىق بەلسەندىلىك دەڭگەيى جانە قۇبىلمالى گەوساياسي جاعدايلاردىڭ دا سىرتقى ىقپالىن جوققا شىعارا المايمىز. ايتالىق، ءىرى ەكونوميكالار اراسىنداعى تاريفتىك تارتىس پەن ساۋدا سوعىسى، سانكسيامەن جاۋاپتاسۋلار الەمدىك نارىققا ءوز ىقپالىن جاساماي قالمايدى. ەنەرگيا شيكىزاتى ەكونوميكامىزدان باسىم ورىندى يەلەنەتىندىكتەن، ەنەرگيا باعاسىنداعى قۇبىلمالىلىق تا ءبىزدىڭ ناقتى مەجەلەردەن جاڭىلدىرۋى عاجاپ ەمەس.
مىنە، وسىنداي كۇردەلى كەزەڭدە ەلىمىز ءۇشىن باسەكەگە قابىلەتتىلىكتى قورعاۋ جانە ينۆەستيسيالىق تارتىمدىلىقتى جوعارى دەڭگەيدە ۇستاپ تۇرۋ اسا ماڭىزدى. سوندىقتان پرەزيدەنت تاراپىنان ۇكىمەتكە باسى ارتىق بيۋروكراتيادان ارىلىپ، جەدەل جۇمىس ىستەۋگە قابىلەتتى بولۋ، ءارى ۇنەمشىلدىكپەن جۇمىس ىستەۋ مىندەتى جۇكتەلىپ وتىر.