بەكبولات رامازان، قازاقستان رەسپۋبليكاسى پرەزيدەنتى جانىنداعى ق ر ۇعا عىلىم اكادەمياسى ءپانارالىق عىلىم ورتالىعىنىڭ باس اكادەميالىق قىزمەتكەرى، الماتى قالالىق ءماسليحاتتىڭ دەپۋتاتى:
قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا عىلىم مەن جوعارى ءبىلىم سالاسىنداعى رەفورمالار تۋرالى ماڭىزدى پىكىر ءبىلدىردى. ەل پرەزيدەنتى عىلىمعا بولىنەتىن قارجى كولەمى سوڭعى جىلدارى ايتارلىقتاي ارتقانىن جانە بۇل قارجىنىڭ ساپالى ءارى سۇرانىسقا يە زەرتتەۋلەر جۇرگىزەتىن ۋنيۆەرسيتەتتەر مەن عالىمدارعا عانا ءبولىنۋى كەرەكتىگىن اتاپ ءوتتى.
سونىمەن قاتار، ءبىلىم بەرۋ تاپسىرىسىن وقۋ ورىندارىنىڭ رەيتينگىنە قاراي ءبولۋ جۇمىسى ۇكىمەتتىڭ قاتاڭ باقىلاۋىندا بولۋى ءتيىس ەكەندىگى ايتىلدى. بۇل رەفورما، ءوز كەزەگىندە، ساپالى ءبىلىم مەن عىلىمي زەرتتەۋلەردىڭ كوبەيۋىنە جول اشادى.
مەملەكەت عىلىمدى دامىتۋ ءۇشىن قارجى كولەمىن ارتتىرۋدى جالعاستىرا بەرەدى، ءبىراق بۇل قارجىنىڭ ناقتى ماقساتتارعا جۇمسالۋى وتە ماڭىزدى. تەك جوعارى دەڭگەيدەگى زەرتتەۋلەر مەن يننوۆاسيالارمەن اينالىساتىن ۋنيۆەرسيتەتتەر مەن عالىمدار عانا قولداۋعا يە بولۋى كەرەك.
قازاقستان عىلىم مەن ءبىلىم سالاسىنداعى وسى ماڭىزدى قادامدار ارقىلى حالىقارالىق ارەنادا باسەكەگە قابىلەتتىلىك پەن ساپالى ءبىلىم بەرۋدى قامتاماسىز ەتۋدى كوزدەيدى.