ۇلتتىق سپورتتى جانداندىرۋ باعىتىنداعى شارالار لەگى جالعاسۋدا
بۇل تۋرالى ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ مالىمدەدى، دەپ حابارلايدى Almaty-akshamy.kz.
ۇلتتىق سپورتتى جانداندىرۋ باعىتىنداعى شارالار لەگى جالعاسۋدا. بۇگىن ۇلتتىق سپورت تۇرلەرى قاۋىمداستىعى مەن قازاقستاندىق قۇسبەگىلىك فەدەراسياسى اراسىندا ارىپتەستىك تۋرالى مەموراندۋمعا قول قويدىق. مەموراندۋمعا سايكەس، قۇسبەگىلىك فەدەراسياسى رەسمي تۇردە ءبىزدىڭ قاۋىمداستىقتىڭ قۇرامىنا قوسىلدى.
«قۇسبەگىلىك – ەرتە زاماننان حالقىمىزدىڭ تۇرمىس سالتىمەن بىتە قايناسقان ساياتشىلىق ونەر. اتا-بابادان ميراس بوپ جەتكەن ۇلتتىق قۇندىلىقتارىمىزدى ۇلىقتاۋ – بىزگە جۇكتەلگەن ۇلكەن جاۋاپكەرشىلىك، قاسيەتتى پارىز»، – دەدى ۇلتتىق سپورت قاۋىمداستىعىنىڭ پرەزيدەنتى.
سونداي-اق ول قۇسبەگىلىك ونەردى كاسىبي تۇرعىدا دامىتىپ، حالىقارالىق جارىستاردا ۇلتتىق سپورت رەتىندە تانىتۋعا كۇش سالاتىنىن ايتتى.
«بۇگىنگى باسقوسۋ اياسىندا فەدەراسيا باسشىسى بەرىك ءۋالي مىرزامەن قۇسبەگىلىك ونەردىڭ جاي-كۇيىن تالقىلاپ، ءتول ونەرىمىزدى دامىتۋداعى ناقتى شارالار جوسپارىن جاسادىق. بيىل وسى باعىتتا 7 سپورتتىق شارا وتسە، كەلەسى جىلى ونىڭ سانىن ەكى ەسە كوبەيتەمىز. قۇسبەگىلىك ونەردى كاسىبي تۇرعىدا دامىتىپ، حالىقارالىق جارىستاردا ۇلتتىق سپورت رەتىندە تانىتۋعا كۇش سالامىز. وزدەرىڭىز بىلەتىندەي، مەملەكەت باسشىسى قاسىم-جومارت توقايەۆ ۇلتتىق سپورتىمىزدىڭ جاڭعىرۋىن ايرىقشا نازاردا ۇستاپ وتىر. ۇلتتىق سپورت تۇرلەرى قاۋىمداستىعى وسى تۇستا ءبىرقاتار جۇمىستارعا مۇرىندىق بولىپ كەلەدى. قازان ايىندا جاڭاوزەن قالاسىندا ساداق اتۋ بويىنشا ەل چەمپيوناتى ءوتتى. وسى كۇندەرى اقتوبە قالاسىندا قاۋىمداستىق قولداۋىمەن توعىزقۇمالاق بويىنشا VI الەم چەمپيوناتى وتۋدە. وعان 15-تەن استام ەلدەن كەلگەن 80 سپورتشى قاتىسىپ جاتىر. ۇلتتىق بولمىسىمىزدى جاڭعىرتۋ ىسىندەگى جۇمىسىمىز جەمىستى بولىپ، يگى شارالار لەگى ارتا بەرەدى دەپ سەنەمىن»، – دەدى يسلامبەك سالجانوۆ.