الماتىداعى رەسپۋبليكالىق دوستىق ۇيىندە جىرشى، ادەبيەتتانۋشى عالىم ۇلجان بايبوسىنوۆانىڭ شىعارماشىلىعىنا ارنالعان “شىعىس وركەنيەتىندەگى شايىرلىق ءداستۇر” اتتى جىر كەشى وتەدى، دەپ حابارلايدى Almaty-akshamy.kz.
2022 جىلعى 25 قاراشادا ساعات 11.00-دە وتەتىن ءىس-شارانىڭ ماقساتى – قازاق حالقىنىڭ ۇلتتىق ونەرىن دارىپتەۋ جانە قازاقستاندىق ەتنوستاردى ۇلتتىق قۇندىلىقتار اياسىندا توپتاستىرۋ.
ءاربىر حالىقتىڭ، ۇلتتىڭ ونەرى مەن مادەنيەتى، ءداستۇرى ۋاقىت سىنىنان ءوتىپ، جالپى ادامزات وركەنيەتىنىڭ ءبىر بولىگىنە اينالاتىنى زاڭدىلىق. سونىڭ ىشىندە اسىرەسە ءداستۇرلى ونەردىڭ ورنى، تاريحي ماڭىزى ەرەكشە. قازاق ۇلتىنىڭ تاريحىندا ابدەن سومدالعان، سارالانعان ءداستۇرلى ونەردىڭ ءبىر ءتۇرى - جىرشىلىق پەن تەرمەشىلىك. جىر ايتۋ جانە تەرمە ورىنداۋ قازاقستانداعى بارلىق ەتنوستاردىڭ مادەنيەتىندە تەرەڭ ورىن الاتىنى ءسوزسىز.
حالىق مۇراسى بولىپ تابىلاتىن جىر، تەرمەلەردە سول ۇلتتىڭ تاريحى، تاعدىرى، تۇلعالارى ءسوز بولىپ، حالىقتار مەن ۇلتتاردىڭ بەيبىت ءومىر ءسۇرۋى، ءوزارا ىنتىماقتا، اۋىزبىرلىكتە بولۋى سىندى گۋمانيستىك يدەيالار باستى موتيۆكە اينالادى.
دوڭگەلەك ۇستەل بارىسىندا شىعىس وركەنيەتى جانە ءداستۇرلى تەرمەشىلىك ونەر تۋرالى كەلەلى وي-پىكىرلەر ايتىلىپ، سانالى عۇمىرىن ۇلتتىق ونەردى ناسيحاتتاۋعا، عىلىمي زەرتتەۋلەرگە ارناپ، جىر، تەرمەلەردىڭ ۇزدىك ۇلگىلەرىن ورىنداپ جۇرگەن بەلگىلى جىرشى، ادەبيەتتانۋشى عالىم ۇلجان بايبوسىنوۆانىڭ “شىعىس وركەنيەتىندەگى شايىرلىق ءداستۇر” اتتى كىتابىنىڭ تانىستىرىلىمى وتەدى.
كەشكە ونەر قايراتكەرلەرى، ەتنومادەني بىرلەستىكتەردىڭ وكىلدەرى جانە ونەر سۇيەر قاۋىم قاتىسادى. كەشتىڭ مودەراتورى - قانسەيىت ابدەز ۇلى پروفەسسور، فيلولوگيا عىلىمدارىنىڭ دوكتورى.