ءاليحان سمايىلوۆ كانادانىڭ ەو جانە ەۋروپا بويىنشا ارنايى ۋاكىلىمەن كەزدەسۋ وتكىزدى

“تازا” سۋتەگىنە جانە باسقا دا تۇراقتى وتىنعا كوشۋ قىزىعۋشىلىق تۋدىرىپ وتىر

ق ر پرەمەر-مينيسترى ءاليحان سمايىلوۆ پەن كانادا پرەمەر-مينيسترىنىڭ ەو جانە ەۋروپا بويىنشا ارنايى ۋاكىلى، كانادانىڭ فرانسياداعى ەلشىسى ستەفان ديون قازاقستان-كانادا ىنتىماقتاستىعىن ودان ءارى نىعايتۋ ماسەلەلەرىن تالقىلادى، دەپ حابارلايدى Almaty-akshamy.kz.

تاراپتار ەكىجاقتى ساۋدانى دامىتۋ، ينۆەستيسيالىق ءوزارا ءىس-قيمىل جانە ەنەرگەتيكا سالاسىنداعى ىنتىماقتاستىق ماسەلەلەرىن، سونداي-اق قازاقستان-كانادا ىسكەرلىك كەڭەسىنىڭ قىزمەتىن تالقىلادى.

ءاليحان سمايىلوۆ ەكى ەل اراسىندا كەشەندى ساۋدا-ەكونوميكالىق ارىپتەستىك قارقىندى دامىپ كەلە جاتقانىن اتاپ ءوتتى. ماسەلەن، وتكەن جىلى ءوزارا ساۋدا كولەمى 34%-دان استام ءوسىپ، شامامەن $500 ملن-دى قۇرادى، ال بيىلعى 9 ايدا بۇل كورسەتكىش $730 ملن-عا جەتتى. سونىمەن قاتار قازاقستان ەكونوميكاسىنا تىكەلەي كانادالىق ينۆەستيسيالار كولەمى دە ارتا تۇسۋدە، بۇل كورسەتكىش وتكەن جىلى $385 ملن-نان استى.

«ءبىز ينۆەستيسيالىق ىنتىماقتاستىقتى ودان ءارى نىعايتۋ جانە ءوزارا ساۋدا كولەمىن ۇلعايتۋ باعىتىندا الەۋەتتىڭ زور ەكەنىن كورىپ وتىرمىز. قازاقستان ەكونوميكانىڭ ءتۇرلى سەكتورلارىنداعى ءوز ونىمدەرىنىڭ 45 ءتۇرىن جەتكىزۋ كولەمىن $255 ملن-عا ۇلعايتۋعا دايىن»، — دەدى ءاليحان سمايىلوۆ.

سونىمەن قاتار، ۇكىمەت باسشىسىنىڭ ايتۋىنشا، جۇك ءترانزيتى جانە جاڭارتىلاتىن ەنەرگيا كوزدەرىن دامىتۋ سالالارىندا ءوزارا ءتيىمدى قارىم-قاتىناستاردى دامىتۋدىڭ مۇمكىندىكتەرى زور. 

ءوز كەزەگىندە ستەفان ديون قازاقستاندىق تاراپتى پرەزيدەنت سايلاۋىنىڭ ءساتتى وتۋىمەن قۇتتىقتاپ، رەسپۋبليكادا جۇرگىزىلىپ جاتقان الەۋمەتتىك-ەكونوميكالىق رەفورمالارعا قولداۋ ءبىلدىردى.

ستەفان ديون، ناقتىراق ايتقاندا، ەنەرگەتيكا سەكتورىنداعى ىنتىماقتاستىقتى نىعايتۋ پەرسپەكتيۆالارىنا، ونىڭ ىشىندە جەك جانە دەكاربونيزاسيالاۋدى دامىتۋ جونىندەگى ىسكەرلىك بايلانىستاردىڭ كەلەشەكتەگى جاي-كۇيىنە توقتالدى.

«بۇل – قازاقستان ءۇشىن دە، الەمدىك قوعامداستىق ءۇشىن دە وتە ماڭىزدى قادام. وسى باعىتتا بىرلەسىپ جۇمىس ىستەۋىمىز كەرەك. اتاپ ايتقاندا، “تازا” سۋتەگىنە جانە باسقا دا تۇراقتى وتىنعا كوشۋ قىزىعۋشىلىق تۋدىرىپ وتىر»، — دەدى ستەفان ديون.

تاراپتار سونداي-اق، ەكىجاقتى ءوزارا ءىس-قيمىلدىڭ وزەكتى ماسەلەلەرى بويىنشا پىكىر الىستى.