«جولاۋشىلار تاسىمالى» اق مەن «شتادلەر قازاقستان» ج ش س كومپانياسى ەل ىشىندە پايدالانۋعا بەرىلەتىن جاڭا ۇلگىدەگى پلاسكارت ۆاگونىنىڭ العاشقى سۋرەتتەرىن ۇسىندى، دەپ حابارلايدى
Rail-news.kz مالىمەتىنە ساي، زاماناۋي ۆاگوندار قازاقستاننىڭ كليماتتىق ەرەكشەلىكتەرىن، ۇزاق باعىتتاردىڭ جۇكتەمەسىن جانە حالىقارالىق ستاندارتتاردى ەسكەرە وتىرىپ جاسالعان.
پلاسكارت ۆاگوندارى 58 جولاۋشىعا ارنالعان. جاڭا جوبالاۋ شەشىمدەرىنىڭ ارقاسىندا ۆاگوننىڭ ىشكى كەڭىستىگى ءتيىمدى ۇيىمداستىرىلدى. كىرەبەرىس بولىگىندە جۇك قويۋعا ارنالعان سورەلەر بار، ال جولسەرىككە بولەك دەمالىس ايماعى، شاعىن ءاسۇي جانە باسقارۋ ءبولىمى قاراستىرىلعان.
جوعارعى ورىندارعا شىعۋعا ارنالعان جاڭا ۇلگىدەگى باسپالداق ورناتىلعان. ءۇشىنشى دەڭگەيدە جولاۋشىلاردىڭ زاتتارىن سالۋعا ارنالعان كەڭ باگاج سورەلەرى ورنالاستىرىلعان. ءار ورىن جەكە شاممەن، 220V روزەتكاسىمەن، USB جانە USB-C پورتتارىمەن جابدىقتالعان. تومەنگى ورىنداردىڭ استىندا ەكى باگاجدى قويۋعا ارنالعان ارنايى ورىن بار. ال ورتالىق ۇستەل 200 كگ-عا دەيىنگى سالماقتى كوتەرە الادى.
العاشقى وتاندىق Stadler ۆاگوندارى 2026 جىلدان باستاپ كەلەسى باعىتتاردا جۇرەتىن بولادى:
• № 3/4 «استانا — الماتى»
• № 353/354 «استانا — سەمەي»
• № 85/86 «استانا — شىمكەنت»
• № 47/48 «استانا — اتىراۋ»
جىل سوڭىنا دەيىن جاڭا ۆاگونداردىڭ العاشقى لەگى «جولاۋشىلار تاسىمالى» اق-عا بەرىلەدى. كەلىسىم اياسىندا Stadler كومپانياسى وندىرىلگەن ۆاگوندارعا 20 جىل بويى سەرۆيس قىزمەتىن كورسەتەدى. جالپى جوسپار بويىنشا 2030 جىلعا دەيىن 557 ۆاگون پايدالانۋعا بەرىلەدى.