اۋەزوۆ اۋدانىندا "ۋچاسكە" جەدەل-پروفيلاكتيكالىق ءىس-شاراسى اياسىندا كوپقاباتتى تۇرعىن ءۇي كەشەنىن ارالاۋ بارىسىندا پوليسيا قىزمەتكەرلەرى زەرتحاناعا اينالدىرىلعان پاتەردى انىقتادى، - دەپ حابارلايدى aqshamnews.kz.
Polisia.kz مالىمەتىنشە، پاتەر ىشىندە وسىرۋگە تىيىم سالىنعان، قۇرامىندا ەسىرتكى زاتتارى بار وسىمدىكتەر تابىلدى. وقيعا ورنىندا قاجەتتى باستاپقى پروسەسسۋالدىق شارالار جۇرگىزىلدى. اتالعان دەرەك بويىنشا قىلمىستىق ءىس قوزعالدى. قازىرگى ۋاقىتتا كەشەندى تەرگەۋ شارالارى جۇرگىزىلىپ، زاڭسىز ارەكەتتى ۇيىمداستىرۋعا قاتىسى بار تۇلعالار مەن ءمان-جايلار انىقتالۋدا.
– "ۋچاسكە" ءىس-شاراسىنىڭ ماقساتى تەك حالىقپەن بايلانىستى نىعايتۋ ەمەس، تۇرعىن ۇيلەردىڭ وزىندە جاسىرىن تۇردە ورىن الۋى مۇمكىن قۇقىق بۇزۋشىلىقتاردى انىقتاۋ. بۇل جاعداي جۇيەلى جۇمىستىڭ ناقتى ناتيجەسىن كورسەتەدى. ەسىرتكىگە قاتىستى كەز كەلگەن زاڭسىز ارەكەت – قوعام ءۇشىن ءقاۋىپ، سوندىقتان زاڭ اياسىندا ەڭ قاتاڭ شارالار قابىلداۋدى جالعاستىرامىز. اۋدان تۇرعىندارىن كۇماندى جايتتاردى دەر كەزىندە حابارلاپ، ۇيلەرىمىز بەن اۋلامىزدىڭ قاۋىپسىزدىگىن بىرگە قامتاماسىز ەتۋگە شاقىرامىز، – دەپ اتاپ ءوتتى اۋەزوۆ اۋداندىق پوليسيا باسقارماسىنىڭ باستىعى دانيار مەندەبايەۆ.