قوستاناي وبلىسىندا اۋا رايىنىڭ كۇرت ناشارلاۋىنا بايلانىستى رەسپۋبليكالىق ماڭىزى بار اۆتوجولدىڭ ءبىر بولىگىندە قوزعالىس شەكتەلىپ، جولدا قالعان 44 جولاۋشى، ونىڭ ىشىندە 12 بالا، ءقاۋىپسىز جەرگە ەۆاكۋاسيالاندى، - دەپ حابارلايدى aqshamnews.kz ءتىلشىسى.
قارابالىق اۋدانىندا قولايسىز اۋا رايىنا بايلانىستى "الماتى – ەكاتەرينبۋرگ" اۆتوجولىنىڭ 318–539 شاقىرىم ارالىعى، ياعني قارابالىق كەنتىنەن رەسەي فەدەراسياسىنىڭ شەكاراسىنا دەيىنگى بولىگىندە جۇك جانە قوعامدىق كولىكتەر ءۇشىن قوزعالىسقا ۋاقىتشا شەكتەۋ ەنگىزىلدى. بۇل شەشىم توتەنشە جاعدايلاردىڭ الدىن الۋ ماقساتىندا قابىلدانعان.
ەنگىزىلگەن شەكتەۋلەر سالدارىنان "چەليابينسك – تاجىكستان" باعىتىمەن قاتىناپ كەلە جاتقان جولاۋشىلار اۆتوبۋسىنىڭ قوزعالىسى توقتاتىلدى. قۇتقارۋ قىزمەتتەرى مەن جەرگىلىكتى اتقارۋشى ورگانداردىڭ جەدەل ارەكەتىنىڭ ناتيجەسىندە اۆتوبۋستاعى 44 ادام، ونىڭ ىشىندە 12 بالا، جىلىتۋ پۋنكتىنە ورنالاستىرىلدى.
جولاۋشىلارعا قاجەتتى بارلىق جاعداي جاسالىپ، ولار قاۋىپسىزدىك شارالارىمەن قامتاماسىز ەتىلدى. ادامدار اۋا رايى جاقسارعانعا دەيىن جىلىتۋ پۋنكتىندە بولادى.
ماماندار قولايسىز اۋا رايى كەزىندە الىس جولعا شىقپاس بۇرىن اۆتوجولداردىڭ جاعدايىن الدىن الا ناقتىلاۋعا، قوزعالىسقا شەكتەۋ ەنگىزىلگەن جاعدايدا ساپاردى كەيىنگە قالدىرۋعا كەڭەس بەرەدى. سونداي-اق، جولعا شىققان جاعدايدا وزىڭىزبەن بىرگە جىلى كيىم، قۋاتتالعان ۇيالى تەلەفون جانە قاجەتتى زاتتاردى الىپ ءجۇرۋ ۇسىنىلادى.