ماڭعىستاۋ وبلىسىندا 16 قاڭتارعا قاراعان ءتۇنى اقتاۋ – بەينەۋ باعىتىندا قاتىناعان جولاۋشىلار اۆتوبۋسى جول اپاتىنا ۇشىراپ، سالدارىنان ءتورت ادام كوز جۇمدى. تاعى ءۇش جولاۋشى ءارتۇرلى دارەجەدەگى جاراقات الىپ، اۋرۋحاناعا جەتكىزىلدى، - دەپ حابارلايدى aqshamnews.kz ءتىلشىسى.
2026 جىلعى 16 قاڭتار كۇنى شامامەن ساعات 01:03-تە KZ-11 "دوسسور – قۇلسارى – بەينەۋ – سايوتەس – شەتپە – جەتىباي – اقتاۋ" رەسپۋبليكالىق ماڭىزى بار اۆتوموبيل جولىنىڭ 383-شاقىرىمىندا Yutong ماركالى جولاۋشىلار اۆتوبۋسىنىڭ قاتىسۋىمەن جول اپاتى تىركەلدى.
الدىن الا مالىمەتتەرگە سايكەس، اۆتوبۋس اقتاۋدان بەينەۋ اۋىلى باعىتىنا قاراي قوزعالىپ كەلە جاتقان. جۇرگىزۋشى كولىكتى باسقارا الماي، ناتيجەسىندە اۆتوبۋس اۋدارىلىپ كەتكەن.
جول-كولىك وقيعاسى سالدارىنان وقيعا ورنىندا ءتورت جولاۋشى قازا تاۋىپ، ءۇش ادام ءتۇرلى دارەجەدەگى دەنە جاراقاتتارىمەن مەديسينالىق مەكەمەلەرگە جەتكىزىلدى. اۆتوبۋستا بارلىعى 50 جولاۋشى بولعانى انىقتالدى.
"اۆتوبۋس 2025 جىلعى 19 جەلتوقساندا تەحنيكالىق بايقاۋدان وتكەن جانە "CASPIAN TRANS CORPORATION" جشس-نە تيەسىلى. اپات بولعان اۆتوجول ۋچاسكەسى تەحنيكالىق II ساناتقا جاتادى. جول جامىلعىسى اسفالتبەتون، ەنى 9 مەتر. تەكسەرۋ بارىسىندا جول جامىلعىسىنان اقاۋلار انىقتالماعان، جول بەلگىلەرى بەكىتىلگەن ديسلوكاسياعا سايكەس تولىق كولەمدە ورناتىلعان. وقيعا تاۋلىكتىڭ قاراڭعى ۋاقىتىندا بولعان"، - دەلىنگەن حابارلامادا.
اپات كەزىندە كولىك قۇرالىن 1985 جىلى تۋعان جۇرگىزۋشى باسقارعان. الدىن الا دەرەكتەر بويىنشا، جول-كولىك وقيعاسى بولعان جەردەن شامامەن 200 شاقىرىم بۇرىن ەكىنشى جۇرگىزۋشىگە اۋىسۋ جۇزەگە اسىرىلعان.
بۇل دەرەك بويىنشا ماڭعىستاۋ وبلىسى پوليسيا دەپارتامەنتى جول-كولىك وقيعاسىنىڭ بارلىق ءمان-جايىن انىقتاۋعا باعىتتالعان كەشەندى تەرگەۋ شارالارىن جۇرگىزىپ جاتىر. تەرگەۋ ناتيجەسى بويىنشا ءتيىستى پروسەستىك شەشىم قابىلداناتىن بولادى.