استانادا Tinder ارقىلى تانىسىپ، ءوزىن "نۇراي" دەپ تانىستىرعان الاياق جابىرلەنۋشىدەن 4 ملن تەڭگەدەن استام اقشا الىپ، سوت ۇكىمىمەن 3 جىلعا باس بوستاندىعىن شەكتەۋ جازاسىنا تارتىلدى، - دەپ حابارلايدى aqshamnews.kz ءتىلشىسى.
استانادا ينتەرنەت-الاياقتىق دەرەگى بويىنشا 20 جاستاعى تۇرعىنعا قاتىستى سوت ۇكىمى شىقتى. ءىس ماتەريالدارىنا سايكەس، ايىپتالۋشى تانىسۋعا ارنالعان Tinder قوسىمشاسىنا ايەل ادامنىڭ اتىمەن "نۇراي" دەپ تىركەلىپ، پاراقشاسىندا ءوزىنىڭ Telegram-اككاۋنتىنا سىلتەمە قالدىرعان.
Telegram جەلىسىندە بەيتانىس قىزدىڭ سۋرەتىن پايدالانىپ، جالعان اككاۋنت اشقان كۇدىكتى جابىرلەنۋشىمەن حات الماسىپ، كەزدەسۋگە ۋادە بەرگەن. كەيىن ءارتۇرلى سىلتاۋلاردى العا تارتىپ، ودان جۇيەلى تۇردە اقشا سۇراي باستاعان.
ناتيجەسىندە جابىرلەنۋشى ءۇش ايعا جەتپەيتىن ۋاقىت ىشىندە قاسكويدىڭ ەسەپشوتىنا 4 ملن تەڭگەدەن استام قاراجات اۋدارعان.
سوت ايىپتالۋشىنى اقپاراتتىق جۇيە پايدالانۋشىسىنا قاتىستى ءىرى كولەمدە جاسالعان الاياقتىق ءۇشىن كىنالى دەپ تانىدى. جازانى تاعايىنداۋ كەزىندە ونىڭ جاساعان ىسىنە شىن وكىنۋى، كەلتىرىلگەن شىعىندى ءوز ەركىمەن وتەۋى جانە اۋىرلاتاتىن ءمان-جايلاردىڭ بولماۋى ەسكەرىلگەن.
ۇكىم بويىنشا وعان 3 جىل مەرزىمگە باس بوستاندىعىن شەكتەۋ جازاسى تاعايىندالىپ، پروباسيالىق باقىلاۋ بەلگىلەندى.
ماماندار ينتەرنەتتە تانىسۋ بارىسىندا ساق بولۋعا شاقىرادى: بەلگىسىز ادامداردىڭ "جەدەل كومەك"، "جولاقى"، "اۋىرىپ قالدىم" سەكىلدى سىلتاۋلارىمەن اقشا سۇراۋى — الاياقتىقتىڭ كەڭ تاراعان بەلگىسى. ۆيرتۋال تانىستارعا قارجى اۋدارماس بۇرىن اقپاراتتى تەكسەرىپ، كۇماندى جاعدايدا بايلانىس ۇزگەن ءجون.