«ەڭلىك–كەبەك» تراگەدياسىنىڭ پرەمەراسى ءوتتى.
مۇحتار اۋەزوۆ اتىنداعى قازاق ۇلتتىق دراما تەاترىندا «ەڭلىك–كەبەك» تراگەدياسىنىڭ پرەمەراسى ءوتتى. قويىلىمعا مەملەكەت جانە قوعام قايراتكەرلەرى، ق ر مادەنيەت جانە سپورت ۆيسە-مينيسترى نۇرعيسا داۋەشوۆ قاتىستى. سپەكتاكل شاكارىمنىڭ شىعارماسى نەگىزىندە جازىلعان مۇحتار اۋەزوۆتىڭ تۋىندىسى بويىنشا ساحنالاندى.
قويىلىم تاۋ بوكتەرىندەگى ابىزدىڭ ەل تىنىشتىعىن ويلاپ، كۇڭىرەنگەن جىرلارىمەن باستالادى. بۇدان كەيىن ەركە ەڭلىك پەن اڭعال ءىنىسى جاپال تاۋ-تاستىڭ اراسىندا ءان ايتىپ جۇرەدى. كەنەتتەن اڭ قۋىپ بارا جاتقان جىگىتتىڭ داۋىسىن ەستىپ، ەڭلىك ونىڭ ولجاسىن اتىپ تۇسىرەدى. كەبەك پەن ەڭلىك وسىلاي كەزىگىپ، بىر-بىرىنە عاشىق بولادى.
ءبىر اپتادان كەيىن سول تاۋدىڭ ماڭىندا كەزدەسۋگە ۋاعدالاسادى. دەگەنمەن، ەڭلىكتەي سۇلۋعا ماتاي رۋىنىڭ باتىرى ەسەن دە سەزىمىن بىلدىرەدى. الايدا، ەڭلىك ەسەنگە دەگەن سەزىمى جوق ەكەنىن جەتكىزۋگە تىرىسادى. وسىلايشا تاۋدىڭ ەتەگىندە ماحاببات ۇشتىگى كەزدەسىپ، باتىرلار جەكپە-جەككە شىعادى. ەڭلىك باتىرلارعا توقتاۋ سالىپ، ءوز ءسوزىن ايتادى. وسى كەزدە ەڭلىكتىڭ سۇلۋ عانا ەمەس، ەرجۇرەك، سوزگە شەشەن ەكەنىن بايقايمىز.
سپەكتاكلدە كەبەكتىڭ ءرولىن ادىلەت بازارباي ۇلى، ەڭلىكتى زاحيرا راحىمجان وينادى. قويىلىمدى قاراپ وتىرىپ، ابىزدىڭ ءرولىن بەكجان تۇرىستىڭ شەبەر سومداعانىن بايقاۋعا بولادى. ءار ساتىندە ەلدىڭ تىنىشتىعىن ساقتاۋعا تىرىسادى. دەگەنمەن، تاعدىردىڭ جازعانىنان ەشكىم دە قۇتىلا المايدى. قوس عاشىق ەڭلىك پەن كەبەك كۇندەردىڭ ءبىر كۇنىندە قاشىپ كەتەدى.
ەكىنشى ءبولىمى توبىقتى رۋىنداعى حالىقتىڭ مازاسىزدىعىمەن، «قارابەت بولدىق، ۇياتقا قالدىق» دەگەن سوزدەرمەن باستالادى. ارازدىققا سىلتاۋ تابىلىپ، ەسەن ەڭلىكتى داۋلاپ، توبىقتى رۋىنا بارادى. جاعدايدى شەشۋگە بيلەر كەڭەسىنىڭ وتىرىسى وتكىزىلەدى. ماتاي رۋىنىڭ داۋىن داۋلاپ ەسپەنبەت بي (ءرولدى بولات ءابدىلمانوۆ سومدايدى) ءسوز باستايدى. كوبەي ءبيدىڭ ءرولىن ەرلان ءبىلال وينايدى. توبىقتىنىڭ اتىنان قوس عاشىقتى امان ساقتاۋعا، ورنىنا مال، بايلىقپەن الماسۋعا ءسوز بايلاسادى. دەسە دە، قارا نيەتتى، قاندىقول ەسەن باتىر ەڭلىك پەن كەبەكتىڭ ءولىمىن تىلەيدى. ايتپەسە، ەكى رۋدىڭ اراسىنداعى جاۋلاستىق سوعىسقا ۇلاساتاتىن حابارلايدى. وسىلايشا ەسەن باتىر رۋلاستارىن ەرتىپ، ەڭلىك پەن كەبەك تىعىلعان ۇڭگىردى تابادى. بۇل كەزدە ەكى عاشىقتىڭ نارەستەسى دۇنيەگە كەلگەن ەدى. ءولىم جازاسىنا كەسىلەر ساتتە ەڭلىككە ءۇش تىلەگىن ايتۋعا رۇقسات بەرىلەدى. ءبىرىنشى – كەبەكپەن قوشتاسۋىن، ەكىنشى – بىرگە جەرلەۋىن، ءۇشىنشى – نارەستەسىن امان الىپ، كەڭىرباي بايعا تابىستاۋىن وتىنەدى. بۇل تىلەكتىڭ ەكەۋى ورىندالادى. ەڭلىك پەن كەبەك بىرگە جەرلەنەدى. ەكەۋىنىڭ ولىمىنەن كەيىن جارتاستاعى بالا جوعالىپ كەتەدى. سپەكتاكل وسىلايشا اسەرلى اياقتالادى.
«ماعان قويىلىم ۇنادى. ساحنا دا وتە جاقسى بەزەندىرىلگەن. قويىلىمنىڭ ەكىنشى ءبولىمى باسقاشا ءوربىدى. بيلەر كەڭەسىندە سويلەگەن سوزدەرى بىرىنەن-بىرى وتەدى. بەينەبىر بيلەردىڭ ورتاسىندا وتىرعانداي سەزىنەسىڭ. وسىعان قاراپ-اق قازاق اۋىز ادەبيەتىمىزدىڭ مۇراسى باي ەكەنىن اڭعارۋعا بولادى. اباي اتامىزدىڭ «عاشىقتىڭ ءتىلى – ءتىلسىز ءتىل، كوزبەن كور دە ىشپەن ءبىل. سۇيىسەر جاستار قاتە ەتپەس، مەيلىڭ يلان، مەيلىڭ كۇل» دەگەن سوزدەرى ويىما ورالدى. راسىمەن-اق، عاشىقتار قاي زاماندا بولماسىن ءوز ماحابباتىنا ادال بولعان. قويىلىمدى كورىپ وتىرىپ ونە بويىم شىمىرلاي جونەلدى»، – دەيدى اسەل رۋزيباي ەسىمدى كورەرمەن.