قازاقستاندا مىستىڭ باي قورى تابىلۋى مۇمكىن

سيفرلىق تەحنولوگيالار قازاقستان قازىناسىنا 25 ملرد دوللار ءتۇسىرۋى مۇمكىن.

سونىڭ 9 ميللياردى تاۋ-كەن سەكتورىنان الىنادى. وسىعان بايلانىستى ءىرى كەنىشتەر مەن ونەركاسىپ ورىندارىن سيفرلاندىرۋ كەرەك. ەلوردادا ءوتىپ جاتقان 13ء-شى ماينەكس تاۋ-كەن گەولوگيالىق فورۋمىنا قاتىسۋشىلار وسىلاي دەيدى. شاراعا 30 ەلدەن 200-دەن اسا كومپانيا كەلدى، دەپ حابارلايدى Almaty-akshamy.kz 24.kz-كە سىلتەمە جاساپ. 

90-نان استام ساراپشى ءسوز سويلەپ، وتاندىق ماماندار ينۆەستورلارمەن تاجىريبە الماسادى. ەرتەڭ ەكولوگيا ماسەلەسى تالقىلانادى. جيىندا قازاقستاننىڭ جەر قويناۋىنداعى پايدالى قازبالار جايى ايتىلدى. ساراپشىلار ەلدە مىستىڭ باي قورى بولۋى مۇمكىن دەيدى. قۇنى جىلدان-جىلعا قىمباتتاپ كەلە جاتقان پايدالى قازبا ءقازىردىڭ وزىندە الەمنىڭ ءىرى كومپانيالارىن قىزىقتىرىپ وتىر.

«قازاقستاندا مىس كەن ورىندارى بار، ولاردىڭ اينالاسىندا تاعى تابىلۋى مۇمكىن. سوندىقتان 1-2 جىل ىشىندە ءىرى كومپانيالار كەلىپ جاتىر. ول قازاقستانعا ءتيىمدى بولاتىنىنا سەنەمىز. ويتكەنى ول قىزمەت نارىعىن كەڭەيتەدى، مامانداردىڭ ساپاسىن كوبەيتەدى»، - دەيدى ساراپشى دامير قىزىر.