ارتىق سالماقتان حيرۋرگيالىق جولمەن ارىلعىسى كەلەتىندەردىڭ دەنى – 20-50 جاس ارالىعىنداعى ايەلدەر.
اق حالاتتىلار ارتىق سالماقتان ءوز بەتىنشە ارىلا الماعان جانداردىڭ ومىرىنە ءقاۋىپ ءتونۋى مۇمكىن ەكەنىن ايتۋدا، دەپ حابارلايدى Almaty-akshamy.kz Astanatv.kz-كە سىلتەمە جاساپ.
اقتوبە مەديسينا ورتالىعىنىڭ حيرۋرگ دارىگەرى ءجانادىل ءالمىرزا ۇلىنىڭ ايتۋىنشا، سوڭعى كەزدە سەمىزدىككە شالدىققانداردىڭ ءومىرىن ساقتاپ قالۋ ءۇشىن جاسالاتىن وپەراسيا كوبەيگەن.
«بۇل – ەمنىڭ سوڭعى ساتىسى. ناۋقاس الدىمەن باقىلاۋعا الىنادى. جاتتىعۋلار مەن ديەتالاردىڭ كومەگى بولماعان كەزدە ەمدىك ماقساتتا وپەراسيا جاسالادى. قانت ديابەتى مەن سەمىزدىك بىرگە جۇرگەن ۋاقىتتا ادام ءومىرىن ساقتاپ قالۋدىڭ ءبىر جولى بولىپ سانالادى. جىلدان-جىلعا ارتىق سالماقتىڭ الدىن الۋعا قارسى وتالار كوبەيىپ بارادى. وتكەن اپتادا ارتىق سالماعى بار ادامعا وتا جاسالدى. بۇگىن تاعى سونداي ناۋقاس وتا ۇستەلىنە كەلەدى. ناۋقاستى ەمدەۋ ماقساتىندا جاسايمىز. ارتىق سالماق شامادان تىس تاماقتانۋ، قوزعالىستىڭ ازايۋىنان بولادى»، – دەيدى حيرۋرگ ءجانادىل ءالمىرزا ۇلى.
ايتۋىنشا، ەل تۇرعىندارىنىڭ 3-4 پايىزىندا سەمىزدىك بار. سوڭعى ءۇش جىلدا ەلىمىزدە سەمىزدىكتى ەمدەۋگە ارنالعان قىمبات وپەراسيالار تەگىن جاسالىپ ءجۇر. سالماعىن حيرۋرگيالىق جولمەن رەتتەۋگە كەلەتىندەردىڭ دەنى – 20-50 جاس ارالىعىنداعى كەلىنشەكتەر. ولار 150-160 كگ دەيىن سالماق قوسىپ، قوزعالۋى قيىنداعان.
«وپەراسيا اقىسىز. ناۋقاس ءبىرىنشى تولىق تەكسەرۋدەن وتەدى. ديەتا ۇستايدى، فيزيكالىق جۇكتەمەلەرمەن جاتتىعۋ جاسايدى. ناتيجە بولماعان جاعدايدا، وپەراسيا ۇستەلىنە الامىز. پسيحولوگيالىق تۇرعىدان دايىندالادى. اسقازاننىڭ ۇلكەن ءيىنىن كەسىپ الىپ تاستاپ، كىشى ءيىن عانا وڭەشكە جالعانىپ تۇرادى. بۇل كەزدە اسقازان ترۋبكا تارىزدەس بولىپ قالادى. از تاماقتانعاننىڭ وزىندە بىردەن تويعانداي سەزىم بولادى. وسىلايشا سالماعى ازايادى. ادام ءومىرىن ساقتاپ قالۋ، ەمدەۋ ءادىسى رەتىندە جاسالعان شارا. ادامدا ارتىق سالماق بولعاندا تىزە بۋىنى اۋىرادى. وتا جاساعاننان كەيىن سالماعى ازايىپ، تىزە اۋىرسىنۋى دا كەتەدى»، – دەيدى حيرۋرگ.
اقتوبەدە 160 كەلىگە دەيىن ارتىق سالماق قوسىپ، وپەراسيا جاسالعانداردىڭ ەڭ جاسى – 27 جاستاعى ايەل ادام.