ەرەكشە جاندارمەن جۇمىس جاساۋ قاجىرلى قايرات پەن كەڭ جۇرەكتىلىكتى تالاپ ەتەتىنىن جىلدان جىلعا تەرەڭىرەك ۇعىنۋدامىن. قازىرگى قوعامدا ەرەكشە قاجەتتىلىكتەرى بار بالالار مەن ەرەسەكتەردى الەۋمەتتىك ورتاعا بەيىمدەۋ – وزەكتى ماسەلەلەردىڭ ءبىرى. مۇنداي تۇلعالارمەن جۇمىس تەك مەديسينالىق قولداۋمەن شەكتەلمەي، جۇيەلى پسيحولوگيالىق سۇيەمەلدەۋدى دە قاجەت ەتەدى. پاراسات الەۋمەتتىك قىزمەت ورتالىعىنداعى مەنىڭ ءرولىم – ولاردىڭ ەموسيونالدىق جاعدايىن تۇراقتاندىرۋ، ىشكى رەسۋرستارىن وياتۋ جانە قوعاممەن بايلانىسىن نىعايتۋ.
پسيحونيەۆرولوگيالىق ەرەكشەلىگى بار ادامدار ءجيى مازاسىزدىق، قورقىنىش، وقشاۋلانۋ، وزىنە سەنىمسىزدىك سياقتى پسيحوەموسيونالدىق قيىندىقتارعا تاپ بولادى. سوندىقتان پسيحولوگيالىق جۇمىس ەڭ الدىمەن ءقاۋىپسىز ورتا قالىپتاستىرۋدان، سەنىمدى قارىم-قاتىناس ورناتۋدان باستالۋى ءتيىس. پسيحولوگيالىق جۇمىس بارىسىندا ادامنىڭ وز-وزىمەن بولۋىنا جاعداي جاساۋ ماڭىزدى. ۇنەمى تۇزەتۋگە نەمەسە تالاپ قويۋعا ەمەس، ونىڭ ىشكى كۇيىن قابىلداۋعا باعىتتالعان تاسىلدەر پسيحوەموسيونالدىق تۇراقتىلىقتى قالىپتاستىرادى. تىنىشتىققا نەگىزدەلگەن جەكە جانە توپتىق پسيحوكوررەكسيالىق جۇمىستار، ارت-تەراپيا، رەلاكساسيالىق جاتتىعۋلار، سەرگىتۋ ساتتەرى ەموسيالاردى تانۋ مەن باسقارۋعا باعىتتالعان ادىستەر تۇلعانىڭ ىشكى تەپە-تەڭدىگىن قالپىنا كەلتىرۋگە ابدەن كومەكتەسەدى.
سونىمەن قاتار اتا-انالارمەن جانە جاقىن تۋىستارىمەن جۇرگىزىلەتىن پسيحولوگيالىق جۇمىس تا ماڭىزدى ورىن الادى. وتباسىلىق قولداۋ تۇلعانىڭ الەۋمەتتىك بەيىمدەلۋىن ەداۋىر جەڭىلدەتىپ، ءومىر ءسۇرۋ ساپاسىن ارتتىرادى. پسيحولوگ رەتىندە كاسىبي قىزمەتىم تەك تۇزەتۋ ەمەس، سونىمەن قاتار قابىلداۋ، ءتۇسىنۋ جانە تۇلعانى تۇلعا رەتىندە مويىنداۋعا نەگىزدەلۋى قاجەت دەپ ەسەپتەيمىن.
قورىتىندىلاي كەلە، ەرەكشەلىگى بار بالالار جانە ەرەسەكتەرمەن جۇرگىزىلەتىن پسيحولوگيالىق جۇمىس – ولاردىڭ الەۋەتىن اشۋعا، قوعامدا تولىققاندى ءومىر سۇرۋىنە جول اشاتىن ماڭىزدى كاسىبي ميسسيا.