دۇرىس جوسپارلانعان كۇن ءتارتىبى وقۋشىنىڭ ساباق ۇلگەرىمىن ارتتىرىپ قانا قويماي، اتا-انانىڭ دا جۇيكەسىن امان ساقتايدى. ساباق پەن دەمالىستىڭ ۇيلەسىممەن كەزەكتەسۋى بالانىڭ شارشاماۋىنا، ۋاقىتىن ءتيىمدى پايدالانۋىنا جانە كوڭىل كۇيىنىڭ جاقسارۋىنا كومەكتەسەدى. وقۋ جەڭىل ءارى قىزىقتى ءوتۋى ءۇشىن ءاربىر وقۋشىعا ناقتى رەجيم قاجەت. وقۋشىنىڭ كۇن ءتارتىبىن قۇراستىرۋ كەزىندە ۇيقى نورماسىن، تاماقتانۋ رەجيمىن، سونداي-اق دەمالىس پەن سپورتقا دەگەن قاجەتتىلىكتى ەسكەرۋ وتە ماڭىزدى.
ۇيقى رەجيمى
ۇيقىنىڭ ۇزاقتىعى مەن ساپاسى بالانىڭ دەنساۋلىعى مەن ەڭبەك قابىلەتىنە تىكەلەي اسەر ەتەدى. ەگەر بالانىڭ ۇيقىسى شالا بولسا، ەستە ساقتاۋ قابىلەتى تومەندەپ، كوڭىل كۇيى بۇزىلادى، زەيىنى شاشىرايدى، جوسپارلاۋ داعدىلارى السىرەيدى. ال ءجاسوسپىرىم كەزەڭدە ۇيقىنىڭ قانباۋى ارتىق سالماقتىڭ پايدا بولۋىنا دا اكەلۋى مۇمكىن.
وقۋشى قانشا ۋاقىت ۇيىقتاۋى قاجەت؟
مەكتەپ وقۋشىلارىنا ماماندار مىناداي ۇيقى نورماسىن ۇسىنادى:
1–4 سىنىپ وقۋشىلارىنا – 10–10،5 ساعات
5–7 سىنىپ وقۋشىلارىنا – 10،5 ساعات
6–9 سىنىپ وقۋشىلارىنا – 9–9،5 ساعات
10–11 سىنىپ وقۋشىلارىنا – 8–9 ساعات
ال ءبىرىنشى سىنىپ وقۋشىلارى كۇش جيناپ الۋ ءۇشىن كۇنىنە 2 ساعات كۇندىز ۇيىقتاپ العانى ءجون.
ۇيقى رەجيمىن قالاي ۇيىمداستىرۋ كەرەك؟
مۇنداعى ەرەجەلەر قاراپايىم، ءبىراق ماڭىزدى:
بالا ءاردايىم ءبىر ۋاقىتتا ۇيىقتاۋى كەرەك. شامامەن كەشكى 21:00–22:00 ارالىعىندا ۇيقىعا جاتقان وقۋشى بۇل ءتارتىپتى دەمالىس كۇندەرى دە ساقتاعانى ءجون.
ۇيقىعا دەيىنگى 2 ساعات ىشىندە شۋلى ويىندار، مەسسەندجەردى بەلسەندى قولدانۋ، YouTube قاراۋ سياقتى ەموسيونالدىق جۇكتەمەنى ازايتۋ قاجەت، مۇنىڭ ءبارى ۇيقىنىڭ ساپالى بولۋىنا كەدەرگى.
جىلى سۋعا جۋىنۋ، داستارقان ۇستىندەگى اسەرلى اڭگىمە، جاياۋ سەرۋەن، كىتاپ وقۋ ءتارىزدى ۇيقى الدىنداعى ريتۋالدار دا پايدالى.
جاتار الدىندا بولمەنى مىندەتتى تۇردە جەلدەتىپ الۋ قاجەت.
تاماقتانۋ رەجيمى
ادامنىڭ بولاشاقتاعى دەنساۋلىعىنا اسەر ەتەتىن تاماقتانۋ ادەتتەرى مەكتەپ جاسىندا قالىپتاسادى. دۇرىس تاماقتانباعان بالانىڭ ساباق وقۋعا ەنەرگياسى جەتپەيدى، تەز شارشايدى، اشۋلانشاق ءارى زەيىنسىز بولادى.
وقۋشى كۇنىنە نەشە رەت تاماقتانۋ كەرەك؟
كۇشتى قالپىنا كەلتىرۋ ءۇشىن وقۋشىعا كۇنىنە 4–5 رەت، ءار 3،5–4 ساعات سايىن تاماقتانۋ قاجەت. دۇرىس تاماقتانۋ سالاسى ماماندارىنىڭ دەرەگىنشە، 7–11 جاستاعى بالالارعا 2350 ككال، 11 جاستان اسقاندارعا 2713 ككال تاۋلىكتىك ەنەرگيا قاجەت.
راسيونداعى اقۋىز، ماي مەن كومىرسۋدىڭ وڭتايلى اراقاتىناسى 1 : 1 : 4 كولەمىندە بولعانى دۇرىس.
تاماقتانۋ رەجيمىن قالاي دۇرىس قۇرۋ كەرەك؟
تاماقتى دا ۇنەمى ءبىر ۋاقىتتا، اسىقپاي، تىنىش وتىرىپ ءىشۋ كەرەك.
اششى، قۋىرىلعان تاعامداردان، فاستفۋد پەن گازدالعان سۋسىنداردان بارىنشا باس تارتقان ءجون.
بالا اتا-انانىڭ ۇلگىسىمەن وسەدى، ەگەر ۇيدە ەرەسەكتەر دۇرىس تاماقتانباسا، بالانى دا پايدالى اسقا ۇيرەتۋ قيىن.
بەس ۋاقىت تاماقتانۋعا ارنالعان ۇسىنىستار:
تاڭعى اس – مىندەتتى. وقۋشى تاڭەرتەڭ تاۋلىكتىك راسيوننىڭ شامامەن 25%-ىن جەۋى كەرەك، ياعني ءبىر بۋتەربرود جەتكىلىكسىز، بوتقا، وملەت، قۇيماق، ەتتى اس سياقتى ىستىق پايدالى تاعامدار تۇتىنعان دۇرىس.
ەكىنشى تاڭعى اس (مەكتەپتەگى تىسكەباسار) – ىرىمشىك قوسىلعان بۋتەربرود، جاڭعاق، جەمىس، يوگۋرت.
تۇسكى اس – نەگىزگى اس، كۇندىك راسيوننىڭ 40%-ىن قۇرايتىن سالات، ءبىرىنشى تاعام، ەت نەمەسە بالىق، دەسەرت.
تۇستەن كەيىنگى اس كەزىندە جەمىس-جيدەكتەر، سونداي-اق ايران، يوگۋرت، سۇزبە سياقتى قىشقىل ءسۇت ونىمدەرىن تۇتىنۋ قولايلى.
كەشكى استا وقۋشى تاڭعى اسقا جەگەن تاعام مولشەرىنە جۋىق كولەمدە تاماقتانۋى كەرەك. الايدا بۇل ۋاقىتتا ەت پەن بالىقتى الىپ تاستاعان ءجون، سەبەبى اقۋىزدار جۇيكە جۇيەسىن قوزدىرادى جانە ۇزاق قورىتىلادى.
وقۋ جانە دەمالىس رەجيمى
بەلسەندى ءارى قامقور اتا-انالاردىڭ ءجيى جىبەرەتىن قاتەلىكتەرىنىڭ ءبىرى – بالانىڭ كۇن ءتارتىبىن شامادان تىس تىعىز ەتىپ قۇرۋ. ارينە، ءبارى بالاسىنىڭ تابىستى، سكريپكادا وينايتىن، جۇزەتىن، سۋرەت سالاتىن، ءۇش ءتىل بىلەتىن جانە روبوتوتەحنيكانى مەڭگەرگەن جان-جاقتى تۇلعا بولعانىن قالايدى. الايدا وقۋشىعا ارتىق مىندەت جۇكتەۋ كەرى ناتيجە بەرۋى مۇمكىن، شەكتەن تىس جاۋاپكەرشىلىك ارقالاعان كەزدە پوتەنسيالى زور بالانىڭ ءوزى كەز كەلگەن ىسكە قىزىعۋشىلىعىن جوعالتادى. سوندىقتان وقۋ مەن دەمالىستى دۇرىس كەزەكتەستىرىپ، بالانىڭ جەتكىلىكتى قيمىل-قوزعالىستا بولۋىن قاداعالاۋ وتە ماڭىزدى.
وقۋ مەن دەمالۋعا قانشا ۋاقىت جۇمساۋ كەرەك؟
ءۇي تاپسىرمالارىن ورىنداۋ ءۇشىن:
• 2–3 سىنىپتاردا –1،5 ساعات؛
• 4–5 سىنىپتاردا – 2 ساعات؛
• 6–8 سىنىپتاردا – 2،5 ساعات؛
• 9–11 سىنىپتاردا – 3،5 ساعات.
سەرۋەندەۋ مەن بەلسەندى ويىندارعا باستاۋىش سىنىپ جاسىنداعىلار – 3–3،5 ساعات، جوعارى سىنىپتار 2،5 ساعات ۋاقىت ارناعانى ءجون.
بۇرىن ماماندار وقۋشىلاردىڭ كومپيۋتەر نەمەسە پلانشەت ەكرانى الدىندا وتكىزەتىن ۋاقىتىن شەكتەۋدى ۇسىنعان. الايدا سمارتفونداردىڭ كەڭ تارالۋى مەن ونلاين وقۋدىڭ دامۋىنا بايلانىستى بالانى ەكراننان الىستاتۋ وتە قيىن. سوندىقتان قازىرگى اتا-انالار تەك ويىندار، مەسسەندجەرلەر مەن وقۋعا قاتىسى جوق رەسۋرستارعا شەكتەۋ قويۋمەن شەكتەلەدى.
وقۋ مەن دەمالىس رەجيمىن قالاي ۇيىمداستىرۋ كەرەك؟
بۇل كوبىنە بالانىڭ قىزىعۋشىلىعىنا، مەكتەپتەن تىس ۇيىرمەلەرىنە جانە فيزيولوگيالىق ەرەكشەلىكتەرىنە بايلانىستى. دەگەنمەن، بارلىق بالاعا ورتاق ۇسىنىلاتىن بىرنەشە كەڭەس بار:
مەكتەپتەن كەلگەن سوڭ جانە تۇسكى استان كەيىن بالا ساباققا وتىرماس بۇرىن 1–1،5 ساعات دەمالۋى كەرەك. باستاۋىش سىنىپ وقۋشىلارى بۇل ۋاقىتتا ۇيىقتاعانى دۇرىس.
ءۇي تاپسىرماسىن ورىنداۋدى تۇستەن كەيىنگى ساعات 4-تەن باستاعان ءجون، ويتكەنى ءدال وسى كەزدە مي جاڭا اقپاراتتى جاقسى قابىلدايدى.
كۇن ءتارتىبى قانشالىقتى تىعىز بولسا دا، بالادا ءوز قالاۋىمەن وتكىزەتىن كەمىندە 1–2 ساعات بوس ۋاقىت بولۋى قاجەت، مىسالى، كەيدە ەشتەڭە ىستەمەي دەمالۋ دا ماڭىزدى.
وقۋشىنىڭ كۇن ءتارتىبى
تومەندە باستاۋىش سىنىپ وقۋشىسىنا ارنالعان كۇن ءتارتىبى بەرىلگەن. ورتا جانە جوعارى سىنىپتاردا وقۋ ۋاقىتى كوبەيىپ، ۇيقى مەن دەمالىسقا بولىنەتىن ۋاقىت ازايادى.
• 07:00 – ويانۋ، تاڭعى جاتتىعۋ، جۋىنۋ، توسەك جيناۋ
• 07:15–07:30 – تاڭعى اس
• 07:40–08:10 – مەكتەپكە جول نەمەسە تاڭعى سەرۋەن
• 08:30–13:05 – مەكتەپتەگى ساباقتار
• 13:30–14:00 – مەكتەپتەن قايتۋ نەمەسە سەرۋەن
• 14:00–14:30 – تۇسكى اس
• 14:30–15:30 – تۇستەن كەيىنگى دەمالىس نەمەسە ۇيقى
• 15:30–16:00 – سەرۋەن، ويىندار نەمەسە سپورت
• 16:00–16:15 – تۇستەن كەيىنگى اس (پولدنيك)
• 16:15–17:30 – ءۇي تاپسىرمالارىن ورىنداۋ
• 17:30–19:00 – تازا اۋادا سەرۋەن
• 19:00–20:00 – كەشكى اس جانە بوس ۋاقىت
• 20:30 – ۇيقىعا دايىندىق
• 21:00 – ۇيقى