الماتى قالالىق توتەنشە جاعدايلار دەپارتامەنتىنىڭ ۇيىمداستىرۋىمەن "شىمبۇلاق" تاۋ-شاڭعى كۋرورتى اۋماعىندا شۇعىل قىزمەت وكىلدەرى مەن الپينيستىك قاۋىمداستىق مۇشەلەرىنە ارنالعان بازالىق جۇرەك-وكپە رەانيماسياسى (BLS) بويىنشا وقۋ-ترەنينگ، شەبەردىڭ ءدارىسى ءوتتى. بۇل تۋرالى قالالىق قوعامدىق دەنساۋلىق ساقتاۋ باسقارماسىنىڭ وكىلدەرى ايتتى.
ءىس-شارا قاتىسۋشىلاردىڭ مەديسينا قىزمەتكەرلەرى كەلگەنگە دەيىن توتەنشە ءارى شۇعىل جاعدايدا العاشقى كومەك كورسەتۋگە دايىندىعىن ارتتىرۋعا باعىتتالعان.
وقۋ باعدارلاماسىن جەدەل مەديسينالىق جاردەم قىزمەتىنىڭ BLS نۇسقاۋشىلارى پەريزات الدابەرگەنوۆا مەن اسلان شەرينوۆ جۇرگىزدى. ساباق بارىسىندا ولار جوعارى كاسىبي بىلىكتىلىكتى، وقۋ ۇدەرىسىنىڭ ناقتى ۇيىمداستىرىلۋىن جانە تەوريالىق ءارى تاجىريبەلىك ماتەريالدى ساۋاتتى جەتكىزە ءبىلۋدى ايقىن كورسەتتى.
اياق-قول سىنۋى، باس جاراقاتتارى، ولاردى دەر كەزىندە انىقتاۋ جولدارى، العاشقى كومەك كورسەتۋ الگوريتمدەرى مەن زارداپ شەككەندەردى دۇرىس بەكىتۋ تاسىلدەرى قاتىسۋشىلاردىڭ ەرەكشە قىزىعۋشىلىعىن تۋدىردى. سونىمەن قاتار قۇرىسۋ ۇستامالارى مەن وزگە دە شۇعىل جاعدايدا اتقارىلاتىن ءىس-قيمىلدار جان-جاقتى تالقىلاندى.
"مۇنداي وقۋ-جاتتىعۋ شارالارى تاۋلى ايماقتاعى قاۋىپسىزدىك دەڭگەيىن ارتتىرۋعا جانە شۇعىل قىزمەتتەر مەن بەلسەندى سپورت تۇرلەرىمەن اينالىساتىن قاۋىم اراسىنداعى ءوزارا ىنتىماقتاستىقتى نىعايتۋعا سەپتىگىن تيگىزەدى"، – دەدى الماتى قالالىق قوعامدىق دەنساۋلىق ساقتاۋ باسقارماسىنىڭ وكىلدەرى.