رامازان ايىندا مۇقتاج ازاماتتارعا جاپپاي اقشالاي كومەك كورسەتىلەدى دەگەن الەۋمەتتىك جەلىلەردە تاراعان اقپارات شىندىققا سايكەس كەلمەيدى، دەپ حابارلايدى Aqshamnews.kz ءتىلشىسى.
قازاقستان مۇسىلماندارى ءدىني باسقارماسىنىڭ «زەكەت جانە قايىرىمدىلىق» قورىنىڭ ديرەكتورى ماقساتبەك قايىرعالييەۆ مۇنداي حابارلامالارعا سەنبەۋگە شاقىردى. ونىڭ ايتۋىنشا، قمدب اتىنان جۇزەگە اساتىن بارلىق قايىرىمدىلىق شارالارى تەك رەسمي سايتتار مەن رەسمي پاراقشالاردا عانا جاريالانادى.
قور باسشىسى جەلىدە تاراپ جاتقان ونلاين تىركەۋ ارقىلى كومەك بەرۋ تۋرالى مالىمەتتەردىڭ نەگىزسىز ەكەنىن اتاپ ءوتتى. سەبەبى قور تاراپىنان مۇنداي تاجىريبە ەشقاشان قولدانىلماعان.
«مۇقتاج ازاماتتار كومەك الۋ ءۇشىن قور وكىلدەرىنە تىكەلەي كەلىپ، جازباشا ءوتىنىش بەرەدى. وتىنىشكە الەۋمەتتىك جاعدايىن راستايتىن قۇجاتتار قوسا تاپسىرىلادى. بارلىق ءوتىنىش كوميسسيادا قارالىپ، شەشىم قابىلدانعان سوڭ عانا كومەك كورسەتىلەدى. رامازان ايىندا سايت ارقىلى تىركەلۋ دەگەن بىزدە جوق»، – دەدى ماقساتبەك قايىرعالييەۆ.
سونداي-اق قمدب رامازان ايىندا حالىققا نەگىزىنەن رۋحاني جانە الەۋمەتتىك قولداۋ كورسەتۋگە باسىمدىق بەرەدى. اتاپ ايتقاندا، اۋىزاشار ۇيىمداستىرۋ، بالالارعا رامازان تاتتىلەرىن تاراتۋ، مۇقتاج وتباسىلارعا ازىق-تۇلىك سەبەتتەرىن ۇلەستىرۋ ءداستۇرلى تۇردە جۇزەگە اسادى. ال اقشالاي كومەك بارلىق وڭىردە بىردەي كورسەتىلە بەرمەيدى جانە جاپپاي سيپاتقا يە ەمەس.
قور ديرەكتورى كەيبىر ايماقتاردا دەمەۋشىلەر تابىلعان جاعدايدا، ولار ناقتى مۇقتاج وتباسىلارمەن بايلانىستىرىلاتىنىن ايتتى. دەگەنمەن قمدب تاراپىنان كەڭ كولەمدە اقشالاي كومەك كورسەتۋ ءۇشىن ءوتىنىش قابىلداۋ نەمەسە ونلاين تىركەۋ جۇرگىزىلمەيدى.
وسىعان بايلانىستى قمدب وكىلدەرى ازاماتتاردى جالعان اقپاراتقا الدانباي، تەك رەسمي دەرەككوزدەرگە سەنۋگە جانە كۇماندى حابارلامالاردان ساق بولۋعا شاقىردى.