قازاقستاننىڭ بىرنەشە وڭىرىندە الداعى كۇندەرى اۋا رايى قولايسىز بولادى، دەپ حابارلايدى Aqshamnews.kz ءتىلشىسى.
«قازگيدرومەت» سينوپتيكتەرىنىڭ مالىمەتىنشە، 27 قاڭتار، سەيسەنبى كۇنى ەلىمىزدىڭ ءبىرقاتار ايماعىندا تۇمان، كوكتايعاق، قار جاۋىپ، بوران سوعۋى مۇمكىن.
جەتىسۋ وبلىسىندا تۇندە سولتۇستىك جانە باتىس اۋماقتاردى تۇمان باسادى. كۇندىز الاكول ماڭىندا سولتۇستىك-شىعىستان سوققان جەلدىڭ ەكپىنى سەكۋندىنا 15–20 مەترگە دەيىن كۇشەيەدى.
ماڭعىستاۋ وبلىسىندا تۇنگى جانە تاڭعى ۋاقىتتا باتىس، وڭتۇستىك جانە ورتالىق بولىكتەردە تۇمان مەن كوكتايعاق كۇتىلەدى. وبلىستىڭ سولتۇستىك-شىعىسىندا اۋا تەمپەراتۋراسى 20–22 گرادۋس ايازعا دەيىن تومەندەيدى. اقتاۋ قالاسىندا دا جولدار تايعاق بولۋى مۇمكىن.
سولتۇستىك قازاقستان وبلىسىندا، ونىڭ ىشىندە پەتروپاۆل قالاسىندا تۇمان تۇسەدى. وسىنداي جاعداي باتىس قازاقستان وبلىسىندا دا بايقالىپ، ورال قالاسىندا تۇندە جانە تاڭەرتەڭ كورۋ قاشىقتىعى تومەندەيدى. پاۆلودار وبلىسىنىڭ سولتۇستىگىندە دە تۇمان كۇتىلەدى.
اباي وبلىسىندا اۋا رايى كۇردەلەنە تۇسەدى. تۇندە شىعىس، وڭتۇستىك جانە ورتالىق اۋماقتاردا قار جاۋىپ، بوران سوعادى. كۇندىز باتىس، سولتۇستىك جانە ورتالىق وڭىرلەردە قارلى بوران ساقتالىپ، جەلدىڭ ەكپىنى 15–20 م/س-قا جەتۋى مۇمكىن.
شىعىس قازاقستان وبلىسىندا تۇندە قار جاۋىپ، بوران سوعادى. كۇندىز بۇل قۇبىلىس باتىس، سولتۇستىك جانە شىعىس اۋدانداردا جالعاسادى. كەي جەرلەردە تۇمان ءتۇسىپ، جەل كۇشەيەدى.
قىزىلوردا وبلىسىندا كوكتايعاق ءقاۋپى جوعارى. سولتۇستىك، وڭتۇستىك جانە ورتالىق اۋدانداردا تۇمان كۇتىلەدى. قىزىلوردا قالاسىندا تاڭەرتەڭ جانە كۇندىز جولدار تايعاق بولادى.
ۇلىتاۋ، قوستاناي جانە قاراعاندى وبلىستارىندا قار جاۋىپ، تومەنگى بوران سوعادى. كوپتەگەن اۋدانداردا تۇمان تۇسەدى. اقمولا وبلىسىنىڭ وڭتۇستىگى مەن شىعىسىندا ازداعان قار جاۋىپ، تومەنگى بوران كۇتىلەدى.
ماماندار جۇرگىزۋشىلەر مەن جاياۋ جۇرگىنشىلەردى ساق بولۋعا، الىس جولعا شىقپاس بۇرىن اۋا رايى بولجامىن ەسكەرۋگە شاقىرادى.