ءال-فارابي اتىنداعى قازاق ۇلتتىق ۋنيۆەرسيتەتىنىڭ عالىمدارى جۇرەك-قان تامىرلارى اۋرۋىنىڭ قاۋىپتىلىگىن ەرتە انىقتاۋعا مۇمكىندىك بەرەتىن «Zhurek AI» پلاتفورماسىن ازىرلەدى.
جاساندى ينتەللەكت كومەگىمەن جۇمىس ىستەيتىن پلاتفورما ادامنىڭ جۇرەك-قان تامىرلارى جۇيەسىندەگى اۋىتقۋلاردى دەر كەزىندە انىقتاپ، ونىڭ قاۋىپتىلىك دەڭگەيىن اۆتوماتتى تۇردە باعالاي الادى. سونداي-اق مەديسينا قىزمەتكەرلەرىنىڭ جۇمىسىن جەڭىلدەتۋگە سەپتىگىن تيگىزەدى، - دەپ حابارلايدى Aqshamnews.kz.
پايدالانۋشى پلاتفورماعا PDF فورماتىنداعى قان تالداۋىنىڭ ناتيجەسىن جۇكتەپ، ارنايى دايىندالعان ساۋالنامادان وتەدى. كەيىن جۇيە بارلىق اقپاراتتى جىلدام وڭدەپ، تاۋەكەلدەردى شىعارىپ بەرەدى. ناتيجە قورىتىندىسىندا ادام ومىرىنە ءقاۋىپتى جاعداي بولسا، ناۋقاسقا بىردەن دارىگەرگە جۇگىنۋ ۇسىنىلادى.
پلاتفورما جۇمىسى كۇردەلى الگوريتمنەن تۇرادى. ول دياگنوستيكانىڭ جانە تاۋەكەلدەردى جىكتەۋدىڭ جوعارى دالدىگىن قامتاماسىز ەتەتىن تەرەڭ نەيروندىق جەلىلەر (DNNs) مەن ۇلكەن تىرەك ۆەكتورلارىنىڭ ادىسىنەن (Large-margin SVMs) تۇرادى.
«اتالعان جوبانىڭ باستى ارتىقشىلىعى – جىلدامدىعىندا. ەكىنشىدەن، دالدىگىندە. «Zhurek AI» مىڭداعان ناقتى مەديسينالىق دەرەكتەر نەگىزىندە ازىرلەندى، سوندىقتان ول كەيدە دارىگەرلەر بايقاماي قالاتىن جاسىرىن اۋىتقۋلاردى دا كورە الادى. بۇل ەرتە دياگنوستيكا ءۇشىن وتە ماڭىزدى»، – دەيدى قازۇۋ بازاسىنداعى جاساندى ينتەللەكت جانە زاتتار ينتەرنەتى زەرتحاناسىنىڭ عىلىمي قىزمەتكەرى ءاسيا بالتابايەۆا.
جوبانى ق ر عىلىم جانە جوعارى ءبىلىم مينيسترلىگى قارجىلاندىرادى. يننوۆاسيالىق پلاتفورمانى قازۇۋ 15 عالىمى بىرلەسىپ ازىرلەدى. بولاشاقتا ماماندار جۇيەنى تولىق ىسكە قوسىپ، ءارى قاراي كوممەرسيالاندىرۋدى جوسپارلاپ وتىر.