قازاقتىڭ كورنەكتى جازۋشىسى ءابدىجامىل نۇرپەيىسوۆ ومىردەن ءوتتى

قالامگەردىڭ تۇڭعىش شىعارماسى - ۇلى وتان سوعىسى تاقىرىبىنا ارنالعان

قازاقتىڭ كورنەكتى جازۋشىسى ءابدىجامىل كامىل ۇلى نۇرپەيىسوۆ ومىردەن ءوتتى، دەپ حابارلايدى Almaty-akshamy.kz ءتىلشىسى.

بۇل جونىندە قازاقستان جازۋشىلار وداعى باسقارما ءتوراعاسىنىڭ ءبىرىنشى ورىنباسارى اقبەرەن ەلگەزەك ءمالىم ەتتى. جازۋشى الماتىدا جەرلەنەدى.

ءا نۇرپەيىسوۆ 1924 جىلى 22 قازاندا قىزىلوردا وبلىسى ارال اۋدانىنىڭ قۇلاندى اۋىلدىق كەڭەسىنە قاراستى ۇشكوڭ دەگەن جەردە دۇنيەگە كەلگەن.

1942-1945 جىلدارى ۇلى وتان سوعىسىنا قاتىسقان. 1956 جىلى م.گوركيي اتىنداعى ادەبيەت ينستيتۋتىن بىتىرگەن. 1962-1964 جىلدارى «جۇلدىز» جۋرنالىنىڭ باس رەداكتورى بولدى. حالىقارالىق قازاق پەن كلۋبىنا جەتەكشىلىك جاسادى.

ادەبيەتكە 1947 جىلدان ارالاسا باستاعان قالامگەردىڭ تۇڭعىش شىعارماسى - ۇلى وتان سوعىسى تاقىرىبىنا ارنالعان «كۋرليانديا» رومانى 1950 جىلى جارىق كوردى. بۇل شىعارماسى ءۇشىن جازۋشىعا جامبىل اتىنداعى رەسپۋبليكالىق سىيلىق بەرىلدى. «كۋرليانديا» رومانىن كەيىننەن وڭدەپ، تولىقتىرىپ، 1958 جىلى «كۇتكەن كۇن» دەگەن اتپەن قايتا جاريالادى. «قان مەن تەر» تريلوگياسى (1-كىتاپ – «ىمىرت»، 1961؛ 2-كىتاپ – «سەرگەلدەڭ»، 1964؛ 3-كىتاپ – «كۇيرەۋ»، 1970) جانە «سەڭ» (1983)، «سوڭعى پارىز» (1999) روماندارى دۇنيە ءجۇزى حالىقتارىنىڭ كوپتەگەن تىلدەرىنە اۋدارىلعان.

تاڭدامالى ادەبي-سىن ماقالالارى «تولعاۋ» (كەيىننەن «جۇرەگى تولى جىر ەدى») دەگەن اتپەن قازاق جانە ورىس تىلدەرىندە جەكە كىتاپ بوپ شىقتى (1972)، 1985 جىلى «اقبيداي تۋرالى اڭىز» اتتى وچەركتەر جيناعى جارىق كوردى.

ا.پ.چەحوۆتىڭ، ا.م.گوركييدىڭ، نازىم حيكمەتتىڭ، يسپان جازۋشىسى ا.كەسونىڭ شىعارمالارىن قازاق تىلىنە اۋدارعان.

كسرو مەملەكەتتىك سىيلىعىنىڭ لاۋرەاتى (1974). 2001 جىلى ماسكەۋدەگى حالىقارالىق ادەبي قوردىڭ «زا چەست ي دوستوينستۆو»، 2003 جىلى حالىقارالىق م.شولوحوۆ اتىنداعى سىيلىقتاردىڭ لاۋرەاتى اتاندى. كوپتەگەن ورلەن-مەدالدارمەن ماراپاتتالدى. 1985 جىلى قازاق كسر حالىق جازۋشىسى قۇرمەتتى اتاعى بەرىلدى.