كەلىسسوز بارىسىندا ساۋدا-ەكونوميكالىق بايلانىستاردى ارتتىرۋداعى بىرلەسكەن ءىس-قيمىلعا ەرەكشە نازار اۋدارىلدى
بەيجىڭ قالاسىنداعى حالىق جينالىسى ۇيىندە قازاقستان پرەزيدەنتى قاسىم-جومارت توقايەۆ پەن جۇڭگو حالىق رەسپۋبليكاسىنىڭ ءتوراعاسى سي سزينپين كەلىسسوز جۇرگىزدى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
ءوزارا سەنىم مەن دوستىققا نەگىزدەلگەن كەزدەسۋدە كوشباسشىلار قازاقستان مەن جۇڭگو اراسىنداعى جان-جاقتى ستراتەگيالىق سەرىكتەستىكتىڭ، سونىڭ ىشىندە ساياسي، ساۋدا-ەكونوميكالىق، كولىك-ترانزيتتىك جانە مادەني-گۋمانيتارلىق سالالاردىڭ اۋقىمدى ماسەلەلەرىن تالقىلادى.
قازاقستان پرەزيدەنتى جۇڭگو ءتوراعاسىنا ءىلتيپات ءبىلدىرىپ، قىسقى وليمپيادا ويىندارىنىڭ سالتاناتتى اشىلۋ ءراسىمى كەرەمەت ۇيىمداستىرىلعانىن اتاپ ءوتتى.
«بەيجىڭدەگى وليمپيادا ويىندارى بۇكىل ادامزات ءۇشىن جاۋاپتى ساتتە ءوتىپ جاتىر. بۇل سپورت سايىستارى جاڭارۋعا ۇندەپ، پاندەميانىڭ سىن-قاتەرلەرىن ەڭسەرۋگە ۇلەس قوسادى. سوندىقتان ءسىزدىڭ شاقىرۋىڭىزدى زور قۋانىشپەن قابىل الدىم»، – دەدى مەملەكەت باسشىسى.
پرەزيدەنت ەلىمىزدەگى جاعدايدى تۇراقتاندىرۋعا باعىتتالعان كۇش-جىگەرىنە بەرىك دوستىق نيەتىن بىلدىرگەنى، سونداي-اق جاڭا قازاقستان قۇرۋ جولىندا قاجەتتى كومەك كورسەتۋگە دايىندىعى ءۇشىن جۇڭگو ءتوراعاسىنا ريزاشىلىعىن جەتكىزدى.
سونىمەن قاتار قاسىم-جومارت توقايەۆ سي ءسزينپيننىڭ ءتيىمدى باسشىلىعىمەن قول جەتكىزگەن جۇڭگو ەكونوميكاسىنىڭ دامۋ جەتىستىكتەرىنە جوعارى باعا بەردى.
پرەزيدەنت ديپلوماتيالىق قاتىناستار ورناعان 30 جىل ىشىندەگى قازاق-قىتاي قاتىناستارىنىڭ دامۋى تۋرالى ايتا كەلە، ەكى ەلدىڭ كۇش بىرىكتىرە وتىرىپ، بارلىق سالاداعى ستراتەگيالىق سەرىكتەستىكتىڭ بەرىك ىرگەتاسىن قالاعانىنا نازار اۋداردى. ونىڭ پىكىرىنشە، بۇل ىنتىماقتاستىق ماڭگى، جان-جاقتى جانە ساياسي كونيۋنكتۋراعا باعىنىشتى ەمەس.
قازاقستان پرەزيدەنتى بۇگىنگى كەلىسسوزدىڭ قازاق-قىتاي قارىم-قاتىناسى تاريحىنداعى ساپالى ءارى جاڭا كەزەڭگە بىرلەسە قادام باسۋعا مۇمكىندىك بەرەتىنىن اتاپ ءوتتى.
قاسىم-جومارت توقايەۆ قازاق-قىتاي دوستىعىن، تاتۋ كورشىلىك پەن ءوزارا سىيلاستىقتى نىعايتۋدا جاڭا تابىستارعا قول جەتكىزۋ ءۇشىن تىعىز ىنتىماقتاستىققا ءازىر ەكەنىن اتاپ ءوتىپ، سي ءسزينپيندى بيىلعى قىركۇيەكتە قازاقستانعا مەملەكەتتىك ساپارمەن كەلۋگە شاقىردى.
مەملەكەت باسشىسىنىڭ پىكىرىنشە، قحر ءتوراعاسىنىڭ ساپارى ەكى ەل اراسىنداعى ستراتەگيالىق سەرىكتەستىككە تىڭ سەرپىن بەرەدى.
كەلىسسوز بارىسىندا ساۋدا-ەكونوميكالىق بايلانىستاردى ارتتىرۋداعى بىرلەسكەن ءىس-قيمىلعا ەرەكشە نازار اۋدارىلدى. پرەزيدەنت پاندەمياعا قاراماستان، ەكىجاقتى تاۋار اينالىمى 2021 جىلدىڭ قورىتىندىسى بويىنشا 15،2 پايىزعا ءوسىپ، 18،2 ميلليارد دوللارعا جەتكەنىن اتاپ ءوتتى. جۇڭگو مەن ورتالىق ازيانىڭ بەس ەلى اراسىنداعى جالپى ساۋدانىڭ جارتىسى قازاقستانعا تيەسىلى.
سونىمەن قاتار قاسىم-جومارت توقايەۆ «ءبىر بەلدەۋ، ءبىر جول» باستاماسىن ودان ءارى ىسكە اسىرۋ جونىندەگى باسىم مىندەتتى اتادى. مەملەكەت باسشىسى ەلىمىزدىڭ سيفرلىق تەحنولوگيالار مەن كولىك جانە لوگيستيكا سالالارىنداعى ىنتىماقتاستىقتى نىعاتيۋعا مۇددەلى ەكەنىنە توقتالدى.
كەلىسسوز بارىسىندا تۋريزم جانە مادەني-گۋمانيتارلىق بايلانىستار سالاسىنداعى ىنتىماقتاستىقتى دامىتۋدىڭ پەرسپەكتيۆاسى، سونداي-اق قازاقستاندا جۇڭگو مادەني ورتالىعىن اشۋ ماسەلەسى تالقىلاندى.
قحر ءتوراعاسى «ءبىرتۇتاس جۇڭگو» قاعيداتىنا قولداۋ كورسەتكەنى ءۇشىن قاسىم-جومارت توقايەۆقا العىس ايتىپ، ستراتەگيالىق ىنتىماقتاستىقتى ودان ءارى جان-جاقتى دامىتۋعا مۇددەلى ەكەنىنە سەنىم ءبىلدىردى.
سي سزينپين قازاقستان مەن قحر اراسىنداعى بايلانىستاردىڭ الداعى 30 جىلداعى التىن داۋىرىنە وسى كەزدەسۋ جول اشاتىنىن اتاپ ءوتتى.
قحر ءتوراعاسى «ءبىر بەلدەۋ - ءبىر جول» باستاماسى جۇزەگە اسىرىلىپ جاتقان 9 جىل ىشىندەگى وڭ ىنتىماقتاستىقتى اتاپ ءوتتى. سونداي-اق سي سزينپين اۋىل شارۋاشىلىعى، جاسىل ەنەرگەتيكا، جاساندى ينتەللەكت، قارجى جانە ەلەكتروندى ساۋدا سالالارىنداعى ءوزارا ىقپالداستىقتىڭ كەلەشەگىنە دە باسا ءمان بەردى.
جۇڭگو باسشىسى سي سزينپين قاسىم-جومارت توقايەۆتىڭ پاراساتتى ءارى كورەگەن باسشىلىعىمەن قازاقستاننىڭ قۋاتتى ءارى وركەندەگەن مەملەكەتكە اينالاتىنىنا سەنىم ءبىلدىردى. سونداي-اق ول ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ جۇمىسىنا جانە ونىڭ وڭىرلىك قاۋىپسىزدىكتى قامتاماسىز ەتۋ جونىندەگى باستامالارىنا جوعارى باعا بەردى.
كەزدەسۋ سوڭىندا سي سزينپين قاسىم-جومارت توقايەۆتىڭ قازاقستانعا شاقىرۋىن قابىل الىپ، الداعى كۇزدە ەلىمىزگە مەملەكەتتىك ساپارمەن كەلۋ جونىندەگى جوسپارىمەن ءبولىستى.
سونىمەن قاتار سي سزينپين قاسىم-جومارت توقايەۆپەن تۇراقتى بايلانىس جاساپ تۇرۋعا دايىن ەكەنىن جەتكىزدى.