قارۋ توناعاندار ۇستالىپ جاتىر
30 قاڭتاردا الماتىدا ۇرلىق ءۇشىن سوتتالعان جامبىل وبلىسىنىڭ 33 جاستاعى تۇرعىنى ۇستالدى، ول 5 قاڭتاردا قارۋ-جاراق دۇكەنىن توناۋعا قاتىسقان. تەرگەۋ مالىمەتتەرى بويىنشا، ول 4 مىلتىق الىپ شىققان. ورتالىق كوممۋنيكاسيالار قىزمەتىندە وتكەن بريفينگتە ق ر ءىىم تەرگەۋ دەپارتامەنتىنىڭ باستىعى سانجار ءادىلوۆ وسى جانە قايعىلى قاڭتار وقيعاسى كەزەڭىندە ورىن العان باسقا دا زاڭسىز ىس-ارەكەتتەر جايلى ايتىپ بەردى.
«ول دۇكەن ەسىكتەرىندەگى توردى بۇزۋ ءۇشىن كابەل بايلانعان ۆاز-2114 كولىگىن جۇرگىزگەن. ناتيجەسىندە كۇدىكتى ەكى تەگىس ۇڭعىلى جانە ەكى ويىق مىلتىق العان. الماتى قالاسىندا وسى قالانىڭ تاعى 4 تۇرعىنى ۇستالدى، ولاردان ۇرلانعان 10 مىلتىق پەن ءوق-دارى تاركىلەندى. سونىمەن قاتار، ولاردان قاۋىپسىزدىك كۇشتەرىنەن ۇرلانعان وق وتپەيتىن كەۋدەشەلەر، قالقاندار مەن شلەمدەر تاركىلەندى. بارلىق وسى فاكتىلەر بويىنشا كۇدىكتىلەر ۋۇي-عا وقشاۋلانىپ، سوت سانكسياسىمەن قاماۋعا الىندى. قازىرگى ۋاقىتتا قارۋ-جاراقتى انىقتاۋ بويىنشا ماقساتتى جەدەل شارالار جالعاسۋدا. سونىمەن قاتار، باسقا توناۋعا قاتىسقان ادامداردى انىقتاۋ بويىنشا دا جۇمىستار جۇرگىزىلۋدە. ماسەلەن، 1 اقپاندا قىزىلوردادا لومباردتاردىڭ بىرىندە جاپپاي تارتىپسىزدىك كەزىندە ۇرلىق جاساعان وسى قالانىڭ ەكى تۇرعىنى ۇستالىپ، ۋۇي-عا قامالدى. ۇستالعانداردان ۇرلانعان التىن بۇيىمداردىڭ 160-تان استام بىرلىگى تاركىلەندى. الماتىدا توناۋعا قاتىسقانداردىڭ ءبىرى «يسكەر لومبارد» ج ش س 41 ملن تەڭگەدەن استام شىعىن كەلتىرگەن. كۇدىكتىدەن ۇرلانعان زاتتىڭ ءبىر بولىگى تاركىلەنىپ، ونىڭ كىناسى بەينەجازبامەن دالەلدەنۋدە. قىلمىسكەرلەردەن بارلىعى 107 ملن تەڭگەدەن استام سوماعا باعالاناتىن ۇرلانعان مۇلىك، ونىڭ ىشىندە 8 بىرلىك اۆتوكولىك، 360 بىرلىك تۇرمىستىق تەحنيكا، 200-دەن استام زەرگەرلىك بۇيىم، 460 كيىم اتاۋى، 238 ۇيالى تەلەفون، سونداي-اق 15،5 ملن تەڭگە سوماسىنداعى قولما-قول اقشا تاركىلەندى»، - دەدى سپيكەر.