«اق جول» فراكسياسىنىڭ دەپۋتاتتارى پرەمەر-مينيستر ولجاس بەكتەنوۆقا سۇراۋ جولدادى. ولار قازاقستان مەن جۇڭگو اراسىنداعى كەدەن دەرەكتەرىندەگى ايىرماشىلىققا قاتىستى ۇكىمەتتىڭ رەسمي پوزيسياسىن ءبىلۋ جانە كونتراباندامەن كۇرەسۋ شارالارىن قابىلداۋدى سۇرايدى، دەپ حابارلايدى aqshamnews.kz
سۇراۋ ءماجىلىس وتىرىسىندا دەپۋتات ەرجان بەيسەنبايەۆ تاراپىنان كوتەرىلدى. ول يمپورتتىق تاۋارلاردان تۇسكەن ققس بيۋدجەتكە ءتۇسۋى ماڭىزدى ەكەنىن اتاپ ءوتتى.
«يمپورتتىڭ ۇلكەن بولىگى قازاقستانعا قاجەتتى كەدەندىك راسىمدەردەن وتپەي (ەكونوميكالىق كونتراباندا ارقىلى) كەلىپ جاتىر. بۇل ۇلتتىق ەكونوميكا مەن بيۋدجەتكە زيان كەلتىرىپ وتىر. اشىق كوزدەردە 2024 جىلدىڭ قورىتىندىسى بويىنشا قازاقستانعا قىتايدان يمپورتتالعان تاۋارلاردىڭ كەدەن ستاتيستيكاسىندا رەكوردتىق ايىرماشىلىق انىقتالعانى تۋرالى دەرەكتەر جاريالاندى (13 ميلليارد 750 ميلليون دوللار كولەمىندە). ساراپشىلاردىڭ باعالاۋى بويىنشا، «سۇر يمپورت» بويىنشا قازاقستاننىڭ بيۋدجەتىنە ققس بويىنشا جەتپەيتىن قاراجات 1،5 ميلليارد دوللاردى، ياعني 850 ميلليارد تەڭگەنى قۇرايدى، بۇل كەدەندىك الىمداردان تۇسپەگەن قاراجاتتى ەسەپكە الماعاندا»، — دەدى ەرجان بەيسەنبايەۆ.
سونىمەن قاتار، دەپۋتات ۆيسە-مينيستردىڭ ساۋدا جانە ينتەگراسيا مينيسترلىگىنىڭ وكىلى كوپ ميللياردتىق ايىرماشىلىقتى كەدەندىك ەسەپكە الۋ ەرەكشەلىكتەرىمەن تۇسىندىرگەنىن ەسكە سالدى.