الماتىدا قۇندى جادىگەرلەر كورمەسى ءوتىپ جاتىر

ءال-فارابيدىڭ 1155 جىلدىعى مەن وتىرار مۋزەيىنىڭ 45 جىلدىعىنا ارنالعان كورمە الماتىدا اشىلدى

الماتى مۋزەيىندە الەمگە تانىمال عۇلاما عالىم ءال-فارابيدىڭ تۋعانىنا 1155 جىل جانە «وتىرار» مەملەكەتتىك ارحەولوگيالىق مۋزەي-قورىعىنىڭ 45 جىلدىعى اياسىندا «ۇلى جىبەك جولى بويىنداعى وتىرار: عىلىم مەن مادەنيەتتىڭ ساباقتاستىعى» اتتى تاقىرىپتىق كورمە اشىلدى.

كورمەگە وتىرار مەملەكەتتىك ارحەولوگيالىق قورىق-مۋزەيىنىڭ قورىنان الىنعان 200-دەن استام قۇندى جادىگەر قويىلعان. ەكسپوزيسيادا وتىرار القابىنداعى قالالىق مادەنيەت، ەگىنشىلىك، ساۋدا جانە ءوندىرىس سالالارىنا قاتىستى ارتەفاكتىلەر تانىستىرىلۋدا.

بۇل كورمە الماتى تۇرعىندارى مەن قوناقتارىنا ورتاعاسىرلىق وتىرار قالاسىنىڭ مادەني مۇراسىمەن تانىسۋعا، سونىمەن قاتار ۇلى جىبەك جولىنىڭ بويىنداعى وركەنيەتتىڭ دامۋ تاريحىنا تەرەڭىرەك ۇڭىلۋگە مۇمكىندىك بەرەدى.

كورمەدە:

• وتىرارتوبە، قۇيرىقتوبە، التىنتوبە، پىشاقشىتوبە، كوك-ماردان، كۇيىك-ماردان، جالپاقتوبە، قوڭىرتوبە، وقسىز سەكىلدى ەجەلگى قالاجۇرتتار؛

• ساۋدا مەن قولونەر ورتالىقتارى؛

• ارىستانباب، نايمان اۋليە جانە باسقا دا كيەلى قورىمدار مەن ارحيتەكتۋرالىق ەسكەرتكىشتەر تۋرالى اقپاراتتار مەن جادىگەرلەر ۇسىنىلعان.

كورمە 1 اي بويى جالعاسادى.

ورتاعاسىرلىق وتىرار مادەنيەتى، وتىرار ارحەولوگياسى، ءال-فارابي، ۇلى جىبەك جولى، الماتى مۋزەي كورمەسى سىندى تاقىرىپتار قىزىقتىراتىندار ءۇشىن بۇل – تاپتىرماس مۇمكىندىك.