جىل سايىن وتكىزىلەتىن وقۋ-جاتتىعۋلاردىڭ ساپاسى مەن سانى ارتىپ كەلەدى
1993 جىلى ساۋىردە 40-شى جالپى اسكەري ارميا بازاسىندا قۇرىلعان قازاقستاننىڭ قۇرلىق اسكەرلەرى – قارۋلى كۇشتەردىڭ قۇرامى جاعىنان ەڭ كوپ اسكەر ءتۇرى، دەپ حابارلايدى Almaty-akshamy.kz.
بۇل اسكەرلەر اگرەسسيانى تويتارۋ ءۇشىن جاۋىنگەرلىك دايىندىقتى ساقتاۋ، ەلدىڭ اۋماقتىق تۇتاستىعى مەن ەگەمەندىگىن قورعاۋ، مەملەكەتتىك جانە اسكەري نىسانداردى كۇزەتۋ مىندەتتەرىن ورىندايدى.
قۇرلىق اسكەرلەرىنىڭ قۇرامىنا «وڭتۇستىك»، «شىعىس»، «باتىس» جانە «استانا وڭىرلىك قولباسشىلىقتارى كىرەدى. وزدەرىنىڭ جاۋاپكەرشىلىك ايماقتارىندا ولار جاعدايدىڭ تۇراقتىلىعىن قامتاماسىز ەتىپ، قارسىلاستىڭ كەز كەلگەن قيمىلىنا تويتارىس بەرۋگە اركەز دايىن.
بۇگىندە قۇرلىقتاعى اسكەر قارۋ-جاراق پەن اسكەري تەحنيكانىڭ، جوعارى دالدىكتەگى قارۋدىڭ، بايلانىس، بارلاۋ جانە اۆتوماتتاندىرىلعان باسقارۋ جۇيەلەرىنىڭ زاماناۋي ۇلگىلەرىمەن جابدىقتالعان.
قارۋلى كۇشتەردىڭ بۇل تۇرىنە مامانداندىرىلعان كادرلار دايارلاۋدى اسكەري وقۋ ورىندارى جۇزەگە اسىرادى. وفيسەرلەر الماتى قالاسىنداعى قۇرلىق اسكەرلەرىنىڭ اسكەري ينستيتۋتىندا ءبىلىم الىپ شىعادى. كاسىبي سەرجانتتار بولسا، اقمولا وبلىسى ششۋچينسك قالاسىنداعى اسكەري كوللەدجدە وقيدى. گۆاردەيسك گارنيزونىنىڭ وقۋ-جاتتىعۋ ورتالىعىندا كىشى ماماندار دايارلانادى.
قۇرلىق اسكەرلەرى قارۋلى كۇرەس سيپاتىنىڭ وزگەرۋىن باعامداي وتىرىپ، وقۋ-جاتتىعۋ پروسەسىن ۇدايى دامىتىپ وتىرادى. ماسەلەن، جاۋىنگەرلىك دايارلىققا جەكە قۇرامدى دايارلاۋدىڭ جاڭا ادىستەرى ەنگىزىلۋدە. قارۋ-جاراق پاركى جاڭارتىلىپ، اسكەري ينفراقۇرىلىم دامۋدا. جىل سايىن وتكىزىلەتىن وقۋ-جاتتىعۋلاردىڭ ساپاسى مەن سانى ارتىپ كەلەدى.
قۇرلىق اسكەرلەرى – تاۋەلسىز قازاقستاننىڭ ەگەمەندىگى مەن اسكەري قاۋىپسىزدىگىن قورعايتىن قارۋلى كۇشتەردىڭ تولىققاندى، ۇتقىرلىعى جوعارى، تەحنيكالىق تۇرعىدا جاراقتاندىرىلعان اسكەر ءتۇرى.