ەل تۇرعىندارى كوپ ۇيىقتايدى.
ۇلتتىق ستاتيستيكا بيۋروسىنىڭ مالىمەتىنە سۇيەنسەك، قازاقستاندىقتار ۇيقىعا ورتا ەسەپپەن 9 ساعات 26 مينۋتىن ارنايدى. بۇل كورسەتكىش عالىمدار ۇسىنعان 7–8 ساعاتتىق قالىپتى ۇيقى مولشەرىنەن جوعارى.
جالپى، ەل تۇرعىندارى كۇندەلىكتى ۋاقىتتىڭ 54،2 پايىزىن – ياعني شامامەن 13 ساعاتىن – جەكە كۇتىمگە جۇمسايدى. ونىڭ ىشىندە:
• ۇيقىعا – 9 ساعات 26 مينۋت
• تاماقتانۋعا – 1 ساعات 57 مينۋت
زەرتتەۋ 10 جاستان اسقان 11 914 ادام اراسىندا جۇرگىزىلگەن. ايتا كەتەيىك، مۇنداي تالداۋ ەلىمىزدە ءار التى جىل سايىن وتكىزىلەدى.
نازىك جاندىلار جۇمىسقا ازىراق ۋاقىت جۇمسايدى
ستاتيستيكا تاعى ءبىر قىزىق دەرەكتى كورسەتىپ وتىر:
• ەر ادامدار جۇمىسقا كۇنىنە 9 ساعات 7 مينۋت ارنايدى
• ايەلدەر – 7 ساعات 57 مينۋت
ماماندار ۇيقىنىڭ ارتىق بولۋى كەي جاعدايدا شارشاۋ مەن ءونىمسىز كۇن ءتارتىبىنىڭ بەلگىسى بولۋى مۇمكىن ەكەنىن ايتادى. الايدا مۇنداي ناتيجەلەر حالىقتىڭ جالپى ءومىر سالتىن دا ايقىندايدى.
ەسكە سالا كەتەيىك، بۇعان دەيىن ۇيقىسىزدىقتىڭ پايداسى جايلى جازعان بولاتىنبىز.