Көпшілігіміз ұйқысыздық тек зиян деп ойлаймыз. Алайда кей жағдайда оның пайдалы жағы да болуы мүмкін.
Ұйқысыздықтың ағзаға тигізетін кері әсері жиі айтылып жүр. Бірақ соңғы зерттеулер мен сарапшылардың пікірінше, бір түн ұйықтамаудың да оң әсері болуы мүмкін.
Британдық дәрігер әрі Sleepyhead клиникасының негізін қалаушы Стефани Ромишевски Infobae басылымына берген сұхбатында ұйқының жетіспеушілігіне қатысты тың пікір білдірді. Оның айтуынша, бір түн ұйықтамау дофамин деңгейінің уақытша көтерілуіне себеп болады. Бұл – адамның қуаттанып, көңіл-күйінің жақсаруына, зейіннің артуына және шығармашылық ойлау қабілетінің белсенуіне әсер етеді.
«Кейде әдейі ұйықтатпау әдісі депрессияны емдеу кезінде қолданылады. Себебі бұл көңіл-күйді жақсартып, адамға уақытша сергектік береді», – дейді дәрігер.
Дегенмен Стефани Ромишевски бұл әдісті ұзақ мерзімді стратегия ретінде қолдануға болмайтынын ескертеді. Бұл – тек бір реттік психологиялық көмек құралы ғана.
Ал сомнолог Кейтлин Чейссер ұйқының маңыздылығын алға тартады. Ол түнгі демалыстың жетіспеуі терінің жағдайына кері әсер етіп, безеудің пайда болуына себеп болатынын айтады.
Ұйқысыздықтың зияны туралы көп айтылғанымен, кейбір ерекше жағдайларда оның белгілі бір пайдасы болуы мүмкін. Дегенмен, бұл – тұрақты тәжірибе емес, тек уақытша жағдай ретінде қарастырылуы тиіс. Ұйқы – адамның физикалық және психикалық саулығы үшін өте маңызды.