قازاقستاندىق دزيۋدوشىلار فرانسيا مەن شۆەيسارياداعى قازاقستان ەلشىلىكتەرىنە كيىز ءۇي سىيلادى، دەپ حابارلايدى aqshamnews.kz "ادىرنا" ۇلتتىق پورتالىنا سىلتەمە جاساپ.
كيىز ۇيلەر ەلشىلىكتەر اۋماعىندا تىگىلىپ، قازاق مادەنيەتىن حالىقارالىق دەڭگەيدە ناسيحاتتاۋ جانە مادەني بايلانىستى نىعايتۋ ماقساتىندا قويىلعان.
دەلەگاسيا قۇرامىندا JENYS كاسىبي كلۋبىنىڭ پرەزيدەنتى الماز السەنوۆ، قاراعاندى وبلىسىنىڭ دزيۋدو فەدەراسياسىنىڭ پرەزيدەنتى تيمۋر تۇرسىنبايەۆ جانە 2024 جىلعى پاريج وليمپياداسىنىڭ چەمپيونى ەلدوس سمەتوۆ بولدى.
ۇيىمداستىرۋشىلار بۇل باستاما قازاق مادەنيەتى مەن سپورتىنىڭ ماڭىزدىلىعىن كورسەتىپ، حالىقتار اراسىنداعى دوستىق پەن ىنتىماقتاستىقتى نىعايتۋعا ىقپال ەتەتىنىن اتاپ ءوتتى.
"ءبىز ءوز ەلىمىزدىڭ مادەني بايلانىستارىن نىعايتۋعا ۇلەس قوسقانىمىزعا قۋانىشتىمىز. بۇل – بىزگە كورسەتىلگەن قولداۋعا جانە ىنتىماقتاستىققا دەگەن العىسىمىزدىڭ بەلگىسى. مۇنداي سىيلىقتار قازاقستان مەن فرانسيا، سونداي-اق قازاقستان مەن شۆەيساريا اراسىنداعى قارىم-قاتىناستاردى ودان ءارى نىعايتۋعا ىقپال ەتەدى"، – دەدى السەنوۆ.