ءال-فارابي اتىنداعى قازاق ۇلتتىق ۋنيۆەرسيتەتى فيلوسوفيا جانە ساياساتتانۋ فاكۋلتەتىندە ءدىنتانۋ ماماندىعىنىڭ 1 كۋرس ستۋدەنتتەرىنە ارنالعان «سەن حالقىڭنىڭ جۇرەگىندەسىڭ، جاۋىنگەر!» اتتى تاربيە ساعاتى ءوتتى. 15 اقپان – اۋعان جەرىنەن كەڭەس اسكەرلەرىنىڭ شىعارىلعان كۇنىنە وراي ۇيىمداستىرىلعان بولاتىن. شارانىڭ ماقساتى – اۋعان سوعىسى ارداگەرلەرىنە قۇرمەت كورسەتۋ، جات جەردە كوز جۇمعان جەرلەس ازاماتتاردى ەسكە الۋ جانە جاستارعا پاتريوتتىق تاربيە بەرۋ. شاراعا جالىنداعان جاستىق شاعىن وق پەن وت اراسىندا وتكىزىپ، ەلگە امان-ساۋ ورالىپ، تۋعان جەرىمەن قاۋىشقان ينتەرناسيوناليست-جاۋىنگەرلەر، اتاپ ايتقاندا «ابىروي» اۋعان سوعىسى ارداگەرلەرى وداعىنىڭ ءتوراعاسى داۋىلبەك ءالي ناريمان ۇلى جانە ونىڭ ءبىرقاتار جاۋىنگەر-ارداگەرلەر ارنايى كەلدى. ءدىنتانۋ جانە مادەنيەتتانۋ كافەدراسىنىڭ پروفەسسورى قارلىعاش بورباسوۆا جيىندا ءوزىنىڭ ءالعىسوزىن ايتىپ، قازىرگى تاڭدا ستۋدەنتتەر ءۇشىن اۋعان سوعىسى ارداگەرلەرىنىڭ ەستەلىك اڭگىمەلەرىن تىڭداۋ ونەگەلى تاربيە دەپ اتاپ ءوتتى.
اۋعان سوعىسىنىڭ ارداگەر جاۋىنگەرلەرى ستۋدەنتتەرگە تۋعان ەلىن ءسۇيۋ، قۇرمەتتەۋگە باۋليتىن تاعلىمدى اقىل-كەڭەستەرىن ايتتى:
«ءبىز بارلىعىمىز ءوز وتانىمىزدىڭ پاتريوتى بولۋىمىز كەرەك. وكىنىشكە وراي، ءبىزدىڭ قوعامدا مەملەكەتىمىز الدىنداعى اسكەري مىندەتتەرىن اتقارۋدان قاشادى. بۇل دۇرىس ەمەس. ۇلتاراقتاي جەرىمىزدى اتا-بابالارىمىز نايزانىڭ ۇشىمەن بىزدەر ءۇشىن امانات ەتىپ ساقتاپ قالدى. سوندىقتان وتان الدىنداعى بورىشتى وتەۋگە مىندەتتىمىز!»، – دەدى.
اشىق ساباق بارىسىندا ءدىنتانۋ ماماندىعىنىڭ 1 كۋرس ستۋدەنتتەرى اۋعان سوعىسىندا جۇرەك تەبىرەنتەرلىك ەرلىك كورسەتكەنى ءۇشىن العىستارىن ءبىلدىردى.
