قاراعاندى قازاقستانداعى ەڭ لاس قالا رەتىندە تانىلدى. مۇنداي قورىتىندىنى "قازگيدرومەت" ماماندارى جۇرگىزگەن زەرتتەۋ ناتيجەسى كورسەتتى، - دەپ حابارلايدى aqshamnews.kz ءتىلشىسى.
جەلسىز كۇندەرى قالاداعى اۋا لاستانۋىنىڭ دەڭگەيى رۇقسات ەتىلگەن شەكتى مولشەردەن 24 ەسەگە دەيىن اسىپ كەتۋى مۇمكىن. ەكولوگتاردىڭ پىكىرىنشە، لاستانۋدىڭ نەگىزگى سەبەپتەرىنىڭ ءبىرى - جەكە ۇيلەردىڭ ساپاسىز كومىرمەن پەش جاعۋى.
جەكە سەكتور تۇرعىنى ەۆگەنيي مەدۆەديەۆ كەيىنگى جىلدارى پەشتىڭ ءتۇتىنى الدەقايدا قويۋلانىپ كەتكەنىن ايتادى. ونىڭ باقىلاۋىنشا، ساپالى كومىر تابىلسا، ءتۇتىن از بولادى، الايدا كوبىنە اشىق ادىسپەن وندىرىلگەن كومىر ساتىلىپ جاتادى. مۇنداي كومىر جىلۋدى از بەرەدى دە، ءتۇتىنى كوپ بولادى.
"ءۇش جىل بۇرىن 110 م² ءۇيدى ءبىر ماۋسىم جىلىتۋعا شامامەن 5 توننا كومىر كەتەتىن. ال ءقازىر بىلتىر 10 توننا جۇمسادىم. بۇل نەنى بىلدىرەدى؟ كومىردىڭ ساپاسى ناشارلاعان"، - دەيدى مەدۆەديەۆ.
تۇرعىندار قىستا ءۇي جىلىتۋعا 300 مىڭ تەڭگەگە دەيىن اقشا شىعارىپ، سونىمەن قاتار، امالسىزدان اۋانى لاستاپ وتىر. ەۆگەنييدىڭ ايتۋىنشا، پەشتە قالاتىن كۇلدىڭ كولەمى دە كوبەيگەن: بۇرىن ءبىر شەلەك قانا شىقسا، ءقازىر ءۇش شەلەككە دەيىن جينالادى.
"نە ىستەمەدىم دەيسىز… كومىردى كەپتىرىپ كوردىم، قۇرعاق كەزدە ەرتەرەك كىرگىزىپ، تۇندىرىپ قويدىم - ءبارىبىر ەشتەڭە وزگەرمەدى"، - دەيدى قالا تۇرعىنى.
ەكولوگتار جاعداي جىل سايىن ۋشىعا بەرەدى دەپ سانايدى، ويتكەنى بۇگىنگى كۇنى حالىققا كومىر ساتۋ سالاسى رەتتەلمەگەن، باقىلاۋسىز نارىقتى ەسكە سالادى.
"كومىر ساپاسىن مەملەكەتتىك باقىلاۋدىڭ جۇيەسى جوعالعان. كومىر ساتۋشىلار كوپ جىلدان بەرى كوشىرمە كۇيىندە جۇرگەن “سەرتيفيكاتتاردى” كورسەتەدى، ونىڭ قانداي كومىرگە، قاي جەردە بەرىلگەنى بەلگىسىز. ال ناقتى باقىلاۋ - ورىنداردا تەكسەرۋ، باقىلاۋ ماقساتىنداعى ساتىپ الۋ، زەرتحانالىق تالداۋلار - مۇلدە جۇرگىزىلمەيدى"، - دەيدى قاراعاندىداعى "ەكومۋزەي" ۇيىمىنىڭ دامۋ جونىندەگى ديرەكتورى دميتريي كالمىكوۆ.