قاراعاندىدا ەسىرتكى اينالىمى مەن كونترابانداسىنا قاتىستى ءىس بويىنشا ۇكىم شىقتى، - دەپ حابارلايدى aqshamnews.kz ءتىلشىسى.
قاراعاندىدا ەسىرتكى زاتتارىنىڭ زاڭسىز اينالىمى جانە كونترابانداسىنا بايلانىستى قىلمىستىق ءىس قارالىپ، سوت ۇكىمى جاريالاندى. تەرگەۋ جۇمىستارى باس كولىك پروكۋراتۋراسىنىڭ ۇيلەستىرۋىمەن قارجى مونيتورينگى اگەنتتىگىنىڭ (قما) قاراعاندى وبلىسى بويىنشا دەپارتامەنتى تاراپىنان جۇرگىزىلگەن.
تەرگەۋ مالىمەتىنشە، كوللەدج ستۋدەنتتەرىنىڭ ءبىرى ەسىرتكى تاراتۋدان تابىس تابۋعا بولاتىنىن ءبىلىپ، "Telegram" مەسسەندجەرى ارقىلى بەلگىسىز كۋراتورمەن بايلانىسقا شىققان. ول "جاسىرما-كۋرەر" جانە "قويما" قىزمەتىن اتقارۋعا كەلىسىپ، تاپسىرمالار العان.
ايىپتالۋشىنىڭ مىندەتىنە بەرىلگەن كوورديناتالار بويىنشا ەسىرتكى زاتتارىن الىپ كەتۋ، ساقتاۋ، ءبولىپ وراۋ، تاسىمالداۋ جانە قالا اۋماعىندا الدىن الا بەلگىلەنگەن جاسىرىن ورىندارعا ورنالاستىرۋ كىرگەن. تەرگەۋ دەرەگىنە سايكەس، ول كۇنىنە شامامەن 30 جاسىرما جاساعان.
سونىمەن قاتار، سوتتالۋشى تايلاندتان قازاقستانعا حالىقارالىق پوشتا جونەلتىمى ارقىلى ەسىرتكى جەتكىزۋدى ۇيىمداستىرعانى انىقتالدى. بۇل ماقساتتا ول "Telegram" ارقىلى 400 مىڭ تەڭگە سىياقى ۇسىنا وتىرىپ، كامەلەتكە تولماعان "دروپپەردى" تارتىپ، جونەلتىمدى ونىڭ اتىنا راسىمدەگەن.
كۇدىكتى تاۋاردى الۋ كەزىندە ۇستالىپ، ودان 909 گرامم كاننابيس ەكستراكتى تاركىلەندى. ءتىنتۋ بارىسىندا ونىڭ تۇرعىلىقتى مەكەنجايىنان قوسىمشا 80 گرامم ەسىرتكى زاتى تابىلىپ، الىنعان.
سونداي-اق، ۇيالى تەلەفونىن تەكسەرۋ كەزىندە ونىڭ ءبىر كۇن بۇرىن بىرنەشە جاسىرما ورنالاستىرعانى بەلگىلى بولدى. كورسەتىلگەن كوورديناتالار بويىنشا تاعى 3،34 گرامم كاننابيس ەكستراكتى تاركىلەندى.
سوت ۇكىمىمەن ايىپتالۋشى 15 جىل مەرزىمگە باس بوستاندىعىنان ايىرىلدى. ۇكىم ازىرگە زاڭدى كۇشىنە ەنگەن جوق.