ەندى ساربازدارعا نەسيە بەرىلمەيدى. قازاقستاندا مەرزىمدى اسكەري قىزمەتتە جۇرگەن ازاماتتارعا بانك پەن ميكروقارجىلىق ۇيىمداردان قارىز الۋعا تىيىم سالىنباق، - دەپ حابارلايدى aqshamnews.kz ءتىلشىسى 31-ارناعا سىلتەمە جاساپ.
قارجى نارىعىن رەتتەۋ اگەنتتىگى وسىعان قاتىستى قاۋلى جوباسىن قوعامدىق تالقىلاۋعا شىعاردى. قۇجاتقا سايكەس، قورعانىس مينيسترلىگى مەن كرەديتتىك بيۋرولارعا دەرەكتەر الماسۋ جۇيەسى ەنگىزىلەدى. ياعني اسكەرگە شاقىرىلعان ازاماتتىڭ مارتەبەسى كرەديتتىك ەسەپتە اۆتوماتتى تۇردە كورىنىپ تۇرادى.
ەندى بانككە نەمەسە ميكروقارجىلىق ۇيىمعا نەسيەگە ءوتىنىم بەرگەن ءار ازاماتتىڭ اسكەري ستاتۋسى تەكسەرىلەدى. ەگەر ونىڭ وتان الدىنداعى بورىشىن وتەپ جاتقانى انىقتالسا كرەديت بەرىلمەيدى. ال نەسيەسى بار ساربازداردا تولەمدى كەيىنگە قالدىرۋ مۇمكىندىگى بولادى.