«جولاۋشىلار تاسىمالى» اق ءوز پويىزدارىندا سيفرلىق تەحنولوگيالاردى دامىتۋدى جالعاستىرۋدا.
الداعى ايلاردا №33/34 «اقتوبە – الماتى» جانە №21/22 «قىزىلوردا – سەمەي» باعىتتارىنداعى پويىزداردا Starlink تەحنولوگياسى ارقىلى ينتەرنەت قولجەتىمدى بولادى، دەپ حابارلايدى Aqshamnews.kz
جاڭا بۋىنداعى «استانا – بۋراباي كۋرورتى» باعىتى بويىنشا جۇرەتىن №888/887 Burabay Express ەلەكتروپويىزىندا Starlink تەحنولوگياسى ىسكە قوسىلىپ، جولاۋشىلار العاش رەت جول ۇستىندە ينتەرنەتكە قوسىلۋ مۇمكىندىگىنە يە بولدى. بۇل – جىلدامدىعى 250 مبيت/س-تان اساتىن جوعارى جىلدامدىقتى ينتەرنەتى بار العاشقى جۇردەك ەلەكتروپويىز.
پيلوتتىق جوبانىڭ العاشقى ناتيجەلەرى بۇل قىزمەتتىڭ جوعارى سۇرانىسقا يە ەكەنىن كورسەتتى. جولاۋشىلار ويىن-ساۋىق كونتەنتىن كورۋ، مەسسەندجەرلەر ارقىلى بايلانىسۋ، ساپار بارىسىندا قاشىقتان جۇمىس ىستەۋ، سونداي-اق ونلاين-تابلو، مۋلتيمەديالىق جۇيە جانە قولما-قول اقشاسىز تولەم قىزمەتى سياقتى قوسىمشا سەرۆيستەردى پايدالانا الادى.
ۇلتتىق تاسىمالداۋشى ءۇشىن بۇل جوبا جولاۋشىلار قاۋىپسىزدىگىن ارتتىرۋعا باعىتتالعان. پويىزعا ورناتىلعان بەينەكامەرالار جول بويى جاعدايدى باقىلاۋعا، ال GPS-ترەكەرلەر مارشرۋتتى ناقتى ۋاقىت رەجيمىندە سيتۋاسيالىق ورتالىقتان قاداعالاۋعا مۇمكىندىك بەرەدى.
«جوبا پويىزدارعا جوعارى جىلدامدىقتى ينتەرنەت ەنگىزۋگە ماماندانعان SkyNomad كومپانياسىمەن ارىپتەستىكتىڭ ناتيجەسىندە جۇزەگە اسىرىلدى. كومپانيا جولاۋشىلارعا تۇراقتى قوسىلۋدى قامتاماسىز ەتەتىن كەشەندى ۆەب-پلاتفورما ازىرلەدى. ال Starlink تەحنولوگياسى ءداستۇرلى جەلىلەر قولجەتىمسىز ەڭ شالعاي ايماقتاردا دا سەنىمدى ينتەرنەت بايلانىسىن ۇسىنادى.
بيىل «جولاۋشىلار تاسىمالى» اق سيفرلاندىرۋ باعدارلاماسى اياسىندا پويىزداردى ينتەرنەتپەن قامتۋ جۇمىسىن جالعاستىرىپ، پيلوتتىق رەجيمدە №67/68 «استانا – وسكەمەن» جانە №3/4 «استانا – الماتى» باعىتىنداعى «تالگو» پويىزدارىندا تومەن وربيتالى جوعارى جىلدامدىقتى سپۋتنيكتىك ينتەرنەتتى ىسكە قوستى. بۇگىنگى كۇنگە دەيىن وسى ءۇش باعىتتا 100 مىڭنان استام جولاۋشى ينتەرنەت قىزمەتىن پايدالاندى»، - دەلىنگەن حابارلامادا.