ق ر قورعانىس مينيسترلىگىنىڭ شوقان ءۋاليحانوۆ اتىنداعى اسكەري كوللەدجىنىڭ «اماندىق» وقۋ ورتالىعىنىڭ بازاسىندا سەرجانتتاردىڭ بۇكىلارميالىق XV بايقاۋى اياقتالدى، - دەپ حابارلايدى Aqshamnews.kz.
جاس كومانديرلەر اراسىنداعى تۋرنيرگە بولىمدەردە، قۇرامالار مەن وڭىرلىك قولباسشىلىقتاردا ىرىكتەۋدەن وتكەن توقسانعا جۋىق سەرجانت قاتىستى. اسكەري قىزمەتشىلەردىڭ جاۋىنگەرلىك جانە دەنە دايارلىعى جەكە جانە كوماندالىق ەسەپتەر بويىنشا باعالاندى.
– بيىلعى جيىننىڭ ەرەكشەلىگى تاكتيكالىق مەديسينا ەلەمەنتتەرىمەن ناقتى ۇرىس جاعدايىن مودەلدەيتىن سەنارييلەردى پىسىقتاۋ، تاۋلى نەمەسە جوعارعى رەلەفتى جەردە باعدار تابۋ، بولىمشە قۇرامىندا ۇرىس جۇرگىزۋ بولدى، – دەدى ق ر قك باس سەرجانتى شەبەر-سەرجانت تەمىربەك حالىقوۆ.
بايقاۋ سەگىز كەزەڭنەن تۇردى. 7 جاتتىعۋدى قامتيتىن كوپسايىس تۇرىندە وتكەن «ايبىن» اسكەري-سپورتتىق جارىسىندا دەسانتتىق-شابۋىلداۋ اسكەرلەرى 48386 اسكەري ءبولىمىنىڭ اسكەري قىزمەتشىسى سەرجانت جانداربەك يسابەكوۆ جەكە ەسەپتە ۇزدىك دەپ تانىلدى. 14776 اسكەري بولىمىنەن اعا سەرجانت بەكزات اجىعالييەۆ «باعدار» نوميناسياسىندا توپوگرافيالىق كارتالاردى پايدالانۋ، شايقاستا جانە مارشتا باعدارلاۋ جونىندەگى نورماتيۆتەردى ورىنداۋدا جەڭىمپاز بولدى. تاكتيكالىق مەديسينا بويىنشا وتكەن «جاردەم» جارىسىندا «وڭتۇستىك» وڭىرلىك قولباسشىلىعى 66597 اسكەري ءبولىمىنىڭ وكىلى 2-سىنىپتى سەرجانت المات امانبايەۆ ۇزدىك اتاندى.
«قايسار» اسكەري-كاسىبي سايىسىندا سەرجانتتار تولىق جابدىقتالعان كەدەرگىلەر جولاعىن ەڭسەردى. مۇندا دەسانتتىق-شابۋىلداۋ اسكەرلەرى 18404 اسكەري بولىمىنەن 3-سىنىپ سەرجانت جاندوس راقىمعازى ۇزدىك ناتيجە كورسەتتى. 15 كەلى جۇكپەن 21 شاقىرىمعا جاساعان مارش كەزىندە ول 2 ساعاتپەن رەكورد جاسادى. «ءبىلىمپاز» زياتكەرلىك سايىسىندا اسكەري پوليسيا باس باسقارماسىنىڭ اتىنان قاتىسقان 3-سىنىپتى سەرجانت ەرمەك ءجۇنىسوۆ جەڭىمپاز بولدى. «مەرگەن» جارىسىندا 14776 اسكەري بولىمىنەن 3-سىنىپتى سەرجانت دانيار ساپارالييەۆ ۇزدىك اتقىش اتاندى. تاكتيكالىق دايىندىق بويىنشا 7 نورماتيۆ پەن جاتتىعۋدى قامتيتىن «كەرۋەن» كەزەڭىندە «باتىس» وڭىرلىك قولباسشىلىعى 30238 اسكەري ءبولىمىنىڭ 2-سىنىپتى سەرجانتى تىلەۋباي ماحامبەتوۆ جەڭىسكە جەتتى. ول سونداي-اق «جەكپە-جەك» جارىسىندا دا ۇزدىك تەحنيكالىق جەكپە-جەك شەبەرى دەپ تانىلدى.
جالپى كوماندالىق ەسەپتە ءبىرىنشى ورىندى دەسانتتىق-شابۋىلداۋ اسكەرلەرىنىڭ كومانداسى جەڭىپ الدى. ەكىنشى ورىندى 14776 اسكەري ءبولىمى يەلەندى. «باتىس» وڭىرلىك قولباسشىلىعى جەڭىستىڭ ءۇشىنشى ساتسىنا كوتەرىلدى.
دەسانتتىق-شابۋىلداۋ اسكەرلەرى 18404 اسكەري ءبولىمىنىڭ اسكەري قىزمەتشىسى 3-سىنىپتى سەرجانت جاندوس راقىمعازى «اسكەر تۇعىرى» ءابسوليۋتتى جەڭىمپاز اتندى.
ۇيىمداستىرۋشىلار اتاپ وتكەندەي، جارىسقا قاتىسۋشىلار جوعارى كاسىبيلىك، تاماشا تاكتيكالىق دايىندىق جانە كۇش-قۋات توزىمدىلىگىن كورسەتتى. بايقاۋ مىقتى سەرجانتتاردى انىقتاپ قانا قويماي، كاسىبي داعدىلاردى جەتىلدىرۋگە، تاجىريبە الماسۋعا جانە جاۋىنگەرلىك رۋحتى نىعايتۋعا ىقپال ەتەدى.