«ەڭبەك جولى» رەسپۋبليكالىق بايقاۋىنىڭ وڭىرلىك كەزەڭىندە ءتۇرلى سالاداعى جاس ماماندار وزىق شىقتى. ولار ەڭبەك ءوتىلىنىڭ قىسقالىعىنا قاراماستان كاسىبي جەتىستىكتەرگە قول جەتكىزگەن. جەڭىمپازدار اراسىندا اۆياسيا، ەنەرگەتيكا، اگرارلىق سەكتور، ءبىلىم بەرۋ جانە باسقا دا سالالاردىڭ وكىلدەرى بار.
ماسەلەن، الماتى وبلىسىنان كران جۇرگىزۋشىسى ديلفۋزا باقىتجانوۆا، جامبىل وبلىسىنان اۋە قوزعالىسىن باسقارۋ ديسپەچەرى ەركەبۇلان تۇرىسجان، جەتىسۋدان ۆەتەرينار دارىگەر باۋىرجان ماشانبايەۆ، اقتوبەدەن بريگادير مۇحتار تۇلكىبايەۆ ۇزدىك شىقتى. تۇركىستان وبلىسىن پەداگوگيكا عىلىمدارىنىڭ ماگيسترى، گيمنازيا ءمۇعالىمى گۇلايحان ەرمانوۆا تانىستىردى.
سونداي-اق الماتىدان ەلەكترومەحانيك دوسىمجان ەرلانوۆ، شىمكەنتتەن ەكولوگ بايانسۇلۋ ورازباي، اباي وبلىسىنان ءوندىرىس شەبەرى ايبار ايدار ۇلى، قاراعاندىدان جۇلدىزاي بايدۇيسەن، اقمولادان زەرتحاناشى اياجان جامكەنوۆا، اتىراۋدان ەڭبەكتى قورعاۋ ينجەنەرى ايبار امانجولوۆ، شقو-دان ەنەرگەتيك ءالي اقشاعانوۆ، ماڭعىستاۋدان دارىن امانقۇلوۆ جانە وزگە وڭىرلەردەن جاس ماماندار ەرەكشەلەندى.
بارلىعى 20 فيناليست قازىرگى قازاقستاندىق جۇمىسشى جاستارىنىڭ الەۋەتى مەن تابىسقا جەتۋ جولىن كورسەتىپ وتىر. بيىل بايقاۋعا ەلىمىزدىڭ 17 وبلىسى مەن 3 قالاسىنان 505 ۇمىتكەر قاتىسقان.
«ەڭبەك جولى» بايقاۋى جىل سايىن وتكىزىلەدى جانە ءۇش نوميناسيا بويىنشا جەڭىمپازدار انىقتالادى:
-
«ۇزدىك ەڭبەك اۋلەتى»
-
«جۇمىسشى جاستاردىڭ ۇزدىك تالىمگەرى»
-
«ءوندىرىستىڭ ۇزدىك جاس قىزمەتكەرى»
جەڭىمپازداردى ماراپاتتاۋ ءراسىمى جەلتوقساندا، جۇمىسشى ماماندىقتار جىلىنىڭ جابىلۋىنا ارنالعان سالتاناتتى ءىس-شارادا وتەدى.