ەلىمىزدە سوڭعى 10 جىلدا بالا تۋۋ كورسەتكىشى 4،3 پايىزعا ارتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
بۇل تۋرالى «قازاقستانداعى بالالار سەمىزدىگىنىڭ تارالۋىن زەرتتەۋ» كونفەرەنسياسىندا بالالار دەنساۋلىعى بويىنشا ەلدەگى جاعدايعا توقتالعان ق ر دسم انا مەن بالا دەنساۋلىعىن قورعاۋ دەپارتامەنتى ديرەكتورىنىڭ ورىنباسارى ولجاس ىسقاقوۆ ايتتى.
«قازاقستاندا سوڭعى 10 جىلدا بالا تۋۋ كورسەتكىشى 4،3 پايىزعا ارتتى. بىلتىر شىمكەنت قالاسى، ماڭعىستاۋ، تۇركىستان، قىزىلوردا، اتىراۋ، الماتى، جامبىل، اقتوبە وبلىستارى مەن ەلوردادا دۇنيە ەسىگىن اشقان نارەستەلەر كوبەيگەن. ءبىر جاسقا دەيىنگى سابيلەر اراسىندا تىنىس الۋ جۇيەسىندەگى اۋرۋلار (49،7 پايىز) ءجيى كەزدەسەدى. ال 18 جاسقا دەيىنگى بالالار اراسىندا اس قورىتۋ جۇيەسىنىڭ اۋرۋلارى – 9،4%، جۇيكە جۇيەسىنىڭ اۋرۋلارى – 6،1%، كوز اۋرۋلارى – 5،2%، قان اۋرۋلارى – 5،1% تىركەلدى»، - دەدى ول.
وتكەن جىلى ەل اۋماعىندا 447 290 بالانىڭ كىندىگى كەسىلگەن. ونىڭ ىشىندە 25 776 نارەستە شالا تۋىلدى.
«بىلتىر 5 ملن 600 مىڭ بالا مەديسينالىق پروفيلاكتيكالىق تەكسەرىستەن ءوتۋى ءتيىس بولعان. الايدا تەك 4،5 ملن بالا تەكسەرىلدى. بۇعان كوروناۆيرۋسقا بايلانىستى كارانتين شەكتەۋلەرىنىڭ كۇشەيتىلۋى، وقۋشىلاردىڭ ونلاين فورماتتا وقۋى سەبەپ بولعان. تەكسەرىلگەن بالالاردىڭ 7،4 پايىزىنىڭ بويىنداعى قانداي دا ءبىر دەرتتىڭ بارى العاش رەت انىقتالدى»، - دەدى ولجاس ىسقاقوۆ.