كۇيزەلىسپەن كۇرەسۋ ءۇشىن ساراپشىلار سپورتپەن شۇعىلدانىپ، وزىنە كۇتىم جاساۋعا شاقىرادى.
اقش دارىگەرلەرى تەرىنىڭ ساۋلىعىن ساقتاپ، جاس كورىنۋگە مۇمكىندىك بەرەتىن بەس ءتاسىلدى اتادى. بۇل تۋرالى Eat This، Not That! باسىلىمى جازدى، دەپ حابارلايدى Almaty-akshamy.kz
ادامنىڭ ءوزىن جاقسى سەزىنىپ، جاقسى كورىنۋى ءۇشىن تەرىنى ارتىق كۇن ساۋلەسىنەن مىندەتتى تۇردە قورعاۋ كەرەك، دۇرىس تاماقتانۋدى ۇستانىپ، تەمەكى شەكپەگەن ءجون، سپورتپەن ءجيى شۇعىلدانىپ، كۇيزەلىستى جەڭە ءبىلۋدى ۇيرەنۋ كەرەك.
دارىگەر تودد كوحتىڭ ايتۋىنشا، كۇيزەلىس - ادامنىڭ ءوز جاسىنان ۇلكەن كورىنۋىنە اكەلەتىن سەبەپتەردىڭ ءبىرى. سەبەبى ونىڭ سالدارىنان تەرى جاسۋشالارى بۇزىلىپ، ناتيجەسىندە ول تونۋسى مەن يىلگىشتىگىن جوعالتادى. كۇيزەلىسپەن كۇرەستە ماماندار سپورتپەن شۇعىلدانۋعا جانە ادامنىڭ وزىنە كوبىرەك كۇتىم جاساۋىنا شاقىرادى.
دارىگەر كلەر چان ۋلتراكۇلگىن ساۋلەسىنىڭ شەكتەن تىس اسەرى تەرى جامىلعىسىنىڭ زاقىمدالۋىنا، مەلانيننىڭ كوپ بولىنۋىنە جانە شامادان تىس پيگمەنتتەنۋگە اكەلەتىنىن ەسكە سالدى. ودان بولەك، كۇن ساۋلەسى تەرىنىڭ ەرتە قارتايۋىنا دا اكەلۋى مۇمكىن. چان تەرىنى كۇننەن قورعاۋدى بارىنشا ەرتەرەك قولعا الۋعا كەڭەس بەردى. جاس كۇنىڭىزدەن تەرىڭىزدى كۇتسەڭىز، بۇل جاس قالپىڭىزدى ساقتاۋعا مۇمكىندىك بەرەدى.
ال دەرماتولوگ دوننا حارت تەمەكىنىڭ زيانى تۋرالى ايتتى. شىلىم تارتۋ دا تەرىگە تىكەلەي اسەر ەتەدى. تاباك ونىمدەرى ادام تەرىسىنىڭ ءوز ءتۇسىن جوعالتۋىنا، قۇرعاقتىققا جانە تەرىنىڭ بوساۋىنا اكەلەدى.
"تەمەكىنى قويعان ادامدا بىرنەشە ايدىڭ ىشىندە س دارۋمەنى ءبولىنىپ، كوللاگەندەر دا قالىپقا كەلە باستاي . تەرەڭ ەمەس اجىمدەر بۇدان كەيىن وزدىگىنەن جويىلادى"، - دەپ اتاپ ءوتتى حارت.
دەنەگە ارنالعان شىنىقتىرۋ جاتتىعۋلارىن ۇنەمى جاساۋ دا اعزانى جاسارتۋعا اكەلەدى. دەرماتولوگ ديەۆيد بەنكستىڭ ايتۋىنشا، دەنەگە تۇسكەن كۇش كيسلورود پەن دارۋمەندەردىڭ ادامنىڭ دەنە مۇشەلەرىنە جىلدام جەتۋىنە مۇمكىندىك بەرەدى.