قۇجات 27 قىركۇيەككە دەيىن اشىق نقا سايتىنا ورنالاستىرىلعان.
اقپارات جانە قوعامدىق دامۋ مينيسترلىگى «ماسس-مەديا تۋرالى» زاڭ جوباسىنا رەتتەۋشى ساياساتتىڭ كونسۋلتاتيۆتىك قۇجاتىن ازىرلەدى، دەپ حابارلايدى Almaty-akshamy.kz.
قۇجات مەملەكەت باسشىسىنىڭ 2022 جىلعى 16 ناۋرىزداعى جولداۋىن ىسكە اسىرۋ شەڭبەرىندە ازىرلەندى.
«وتاندىق باق-تىڭ قازاقستاندا، وڭىردە جانە الەمدە بولىپ جاتقان ۇدەرىستەرگە ءوز كوزقاراسى بولۋعا ءتيىس. شىنايى اقپاراتتىق قاۋىپسىزدىك جانە ەلدىڭ يدەولوگيالىق ەگەمەندىگى دە وسىعان بايلانىستى. مەملەكەت سۇرانىسقا يە جانە مىقتى مەديانىڭ اشىق اقپاراتتىق كەڭىستىگىن قۇرۋعا ەرەكشە نازار اۋدارادى. سوندىقتان مەملەكەتتىڭ مۇددەسىن، قوعامنىڭ سۇرانىستارىن جانە مەديا سالانىڭ دامۋ تەندەنسيالارىن ەسكەرە وتىرىپ، ب ا ق تۋرالى زاڭدى قايتا قاراۋ قاجەت»، - دەپ اتاپ وتكەن بولاتىن قاسىم-جومارت توقايەۆ.
قۇجات كەلەسى ماسەلەلەردى شەشۋگە باعىتتالعان:
• جۋرناليستەردىڭ مارتەبەسىن كوتەرۋ؛
• مەملەكەتتىك قارجىلاندىرۋدى رەفورمالاۋ؛
• مەملەكەتتىك ورگاندارمەن ءوزارا ءىس-قيمىل؛
• ب ا ق تىركەۋ ءتارتىبىن وزگەرتۋ؛
• تەلەراديو حابارلارىن تاراتۋ سالاسىنداعى ترەندتەردىڭ وزگەرۋى؛
• ينتەرنەت-جارنامانى رەتتەۋ؛
• سالانىڭ ءوزىن-وزى رەتتەۋىن دامىتۋ.
كورسەتىلگەن پروبلەمالاردى حالىقارالىق تاجىريبەنى ەسكەرە وتىرىپ شەشۋ ءۇشىن:
• جۋرناليستەردىڭ قۇقىقتارىن نىعايتۋ جانە مىندەتتەرىن قايتا قاراۋ، سونداي-اق جۋرناليستەردىڭ ارتىقشىلىقتارىن كەڭەيتۋ جونىندە جاعدايلار جاساۋ.
• جاڭا ۇعىمداردى، سۋبەكتىلەردى انىقتاۋ جانە بەلگىلى ءبىر بايلانىس تۇرلەرىن بەلگىلى ءبىر ساناتقا جاتقىزۋ.
• گرانتتىق قارجىلاندىرۋ جانە سۋبسيديالاۋ تەتىگىنە كوشۋ.
• مەملەكەتتىك ورگانداردىڭ جۋرناليستىك سۇرانىستارىن قاراۋ مەرزىمدەرىن قايتا قاراۋ.
• اق تىركەۋ كەزىندە دومەندىك اتاۋدىڭ بولۋى بويىنشا تالاپتاردى بەلگىلەۋ.
• تەلەكوممۋنيكاسيا (ينتەرنەت) جەلىلەرىندەگى حابار تاراتۋدىڭ جاڭا تۇرلەرىنىڭ قىزمەتىن زاڭنامالىق رەتتەۋ.
اتاپ ايتقاندا، جاڭا شىنايىلىق پەن پراكتيكانى ەسكەرە وتىرىپ، مەملەكەتتىك قارجىلاندىرۋدى ىسكە اسىرۋدىڭ جاڭا تاسىلدەرىن ازىرلەۋ ۇسىنىلادى.
اقدم ەسەپتەۋىنشە، مۇنداي ءتاسىل مەملەكەتتىك اقپاراتتىق ساياساتتى ىسكە اسىرۋدىڭ تيىمدىلىگىن، سونداي-اق وتاندىق باق-تىڭ باسەكەگە قابىلەتتىلىگىن ارتتىرادى.
تەلەراديو حابارلارىن تاراتۋ سالاسىنداعى ترەندتەردىڭ وزگەرۋىنە كەلەتىن بولساق، سوڭعى جىلدارى تەلەراديو حابارلارىن تاراتۋ سالاسىنا تەلەكوممۋنيكاسيا جەلىلەرىندە (ينتەرنەت) حابار تاراتۋدىڭ جاڭا تۇرلەرى، اۋديوۆيزۋالدى پلاتفورمالار، IP TV وپەراتورلارى جانە OTT فورماتىنداعى وپەراتورلار ەنىپ وتىر.
وسى ورايدا، ولاردىڭ قىزمەتىن زاڭدى تۇردە رەتتەۋ ۇسىنىلادى، بۇل IPTV-سەرۆيستەر مەن تەلەراديو حابارلارىن تاراتۋدىڭ وتاندىق سپۋتنيكتىك جانە كابەلدىك وپەراتورلارى اراسىنداعى زياندى باسەكەلەستىكتى جويۋعا جانە قۇقىق يەلەنۋشىلەرگە زالال كەلتىرۋگە، سونداي-اق ق ر اۋماعىندا ەسەپكە الۋ راسىمىنەن وتپەگەن شەتەلدىك تەلەارنالاردىڭ IPTV/OTT-سەرۆيستەرىنىڭ تارالۋىنا جول بەرمەۋگە مۇمكىندىك بەرەدى.
ينتەرنەت-جارنامانى رەتتەۋ تۇرعىسىنان جاڭا تەحنولوگيالاردىڭ جاپپاي دامۋى قۇقىقتىق ورىستەن تىس جارنامانىڭ جاڭا تۇرلەرىن تۋدىراتىنى اتاپ ءوتىلدى. ونى رەگلامەنتتەۋ قاعيداتتارىن ازىرلەۋ ۇسىنىلادى.
سالانىڭ ءوزىن-وزى رەتتەۋىن دامىتۋ جونىندەگى بولىمدە قازىرگى ۋاقىتتا قازاقستاندا ءوز قىزمەتىن بەلسەندى جۇزەگە اسىراتىن ب ا ق سالاسىنداعى 30-دان استام قوعامدىق بىرلەستىكتەر، قاۋىمداستىقتار (وداقتار) جانە باسقا دا كوممەرسيالىق ەمەس ۇيىمدار بار ەكەندىگى كورسەتىلەدى. الايدا، جالپىعا بىردەي بەلگىلەنگەن ستاندارتتار جوق ەكەنىن ايتا كەتۋ كەرەك.
وسىعان بايلانىستى سالالىق زاڭ جوباسىندا باق-تىڭ ءوزىن-وزى رەتتەۋ تەتىكتەرىن قاراستىرۋ ۇسىنىلادى.
اقدم-دە مۇنداي نورما بولاشاقتا مەملەكەتتىك بيلىكتىڭ، ازاماتتىق قوعامنىڭ جانە ماسس-مەديا وكىلدەرىنىڭ تەڭ قۇقىعىنا الىپ كەلۋگە مۇمكىندىك بەرەدى دەپ سانايدى.