اتالمىش جارىسقا 12 مىڭعا جۋىق قازاقستاندىق قاتىستى.
تۋرنيكتە تارتىلۋ بويىنشا Tartyl Fest سپورت فەستيۆالىنىڭ ىرىكتەۋ ءتۋرنيرى اياقتالدى، دەپ حابارلايدى Almaty-akshamy.kz.
جارىس 10 شىلدەدەن باستاپ ءار وڭىردە وتكىزىلدى. ىرىكتەۋ كەزەڭىنىڭ جالپى جۇلدە قورى – 63 ميلليون تەڭگە. بۇگىندە Tartyl Fest رەكوردى - 50.
«Tartyl Fest – بۇل ۇلكەن سپورت مەرەكەسى. ول بەلسەندى ءومىر سالتىن ناسيحاتتاۋعا باعىتتالعان. ەلىمىزدىڭ 12 مىڭعا جۋىق ازاماتى وسىنداي اۋقىمدى جارىسقا قىزىعۋشىلىق تانىتىپ، قاتىسقانى قۋانتادى. ءقازىر كوپشىلىك قاۋىم «جاستارىمىزدى پەرنەتاقتادان جۇلىپ الۋ مۇمكىن ەمەس» دەيدى، ءبىراق وسىنداي اۋقىمدى سپورتتىق وقيعا ول پىكىردى جوققا شىعارادى. مىنا جارىس - سونىڭ ايقىن دالەلى»، - دەدى داۋرەن ابايەۆ.
ەلىمىزدىڭ 20 قالاسىنىڭ ءارقايسىسىندا 9 ساناتتا 27 جۇلدەگەر انىقتالدى. ءبىرىنشى ورىن ءۇشىن قاتىسۋشىلار 200 مىڭ تەڭگە كولەمىندە اقشالاي سىيلىق الدى، ەكىنشى ورىن ءۇشىن – 100 مىڭ تەڭگە، ءۇشىنشى ورىن ءۇشىن – 50 مىڭ تەڭگە.
ەندى بارلىق جەڭىمپازدار قازان ايىندا وتەتىن ۇلكەن فينالدا كەزدەسەدى جانە جارىستا كىم ۇزدىك ەكەنى انىقتالادى. ءبىرىنشى ورىن ءۇشىن جەڭىمپاز بىرنەشە ميلليون تەڭگە الادى.