2025 جىلعى 13 ناۋرىزدان باستاپ قازاقستاندا اكىمشىلىك كودەكسكە وزگەرىستەر ەنگىزىلىپ، كەيبىر جول قوزعالىسى ەرەجەلەرىن (جقە) بۇزعانى ءۇشىن ايىپپۇلدار وسەدى، جاڭا باپتار قوسىلادى، ال كەيبىر جازالار جەڭىلدەتىلەدى. بۇل تۋرالى Aqshamnews.kz سايتى حابارلايدى.
قاتاڭداتىلعان جازالار:
-
تەمىرجول وتكەلدەرىن ءوتۋ ەرەجەلەرىن بۇزۋ: بۇرىن 10 اەك مولشەرىندە ايىپپۇل سالىنسا، ەندى بۇل سوما 20 اەك-كە دەيىن ۇلعايتىلدى. ەگەر جۇرگىزۋشى وسى ەرەجەنى بۇزىپ، جول-كولىك وقيعاسىنا سەبەپكەر بولسا (جابىرلەنۋشىلەرسىز)، ول 9 ايعا جۇرگىزۋشى كۋالىگىنەن ايىرىلادى.
-
جەدەل جاردەم جانە پوليسيا كولىكتەرىنە جول بەرمەۋ: ەگەر جۇرگىزۋشى جەدەل جاردەم نەمەسە پوليسيا كولىگىنە جول بەرمەسە، ايىپپۇل مولشەرى 7 اەك-تەن 20 اەك-كە دەيىن ءوستى. قايتالانعان جاعدايدا ايىپپۇل 15 اەك-تەن 40 اەك-كە دەيىن ۇلعايتىلادى.
جەڭىلدەتىلگەن جازالار:
-
جابىرلەنۋشىلەرسىز جول-كولىك وقيعالارى: بۇرىن مۇنداي جاعدايلاردا جۇرگىزۋشى 6 ايعا كۋالىگىنەن ايىرىلاتىن بولسا، ەندى 20 اەك مولشەرىندە ايىپپۇل سالىنادى. تەك ءبىر جىل ىشىندە قايتالانعان جاعدايدا نەمەسە جابىرلەنۋشىلەر بولعان جاعدايدا عانا 9 ايعا جۇرگىزۋشى كۋالىگىنەن ايىرۋ جازاسى قولدانىلادى.
-
تولەنبەگەن تۇراق ءۇشىن ايىپپۇل: ايىپپۇل مولشەرى 3 اەك-تەن 1 اەك-كە دەيىن تومەندەتىلدى. قايتالانعان جاعدايدا ايىپپۇل 5 اەك-تەن 2 اەك-كە دەيىن ازايتىلدى.
قوعامدىق جۇمىستار:
2025 جىلدىڭ 1 قىركۇيەگىنەن باستاپ جاڭا جازا ءتۇرى – مىندەتتى قوعامدىق جۇمىستار ەنگىزىلەدى. مىسالى، جەدەل جاردەم نەمەسە پوليسيا كولىگىنە قايتادان جول بەرمەگەنى ءۇشىن جۇرگىزۋشىگە 40 اەك ايىپپۇل سالىنۋمەن قاتار، 20 ساعاتتىق قوعامدىق جۇمىستار (مىسالى، كوشەلەردى تازالاۋ) تاعايىندالۋى مۇمكىن.
جاياۋ جۇرگىنشىلەر مەن ساموكات جۇرگىزۋشىلەرىنە قاتىستى:
ەگەر جاياۋ جۇرگىنشى نەمەسە ساموكات جۇرگىزۋشىسى جول قوزعالىسى ەرەجەلەرىن بۇزىپ، ونىڭ ناتيجەسىندە جول-كولىك وقيعاسى ورىن السا (جىل ىشىندە قايتالانعان جاعدايدا)، ولار دا 20 ساعاتتىق قوعامدىق جۇمىستارعا تارتىلۋى مۇمكىن.
قوسىمشا وزگەرىستەر:
-
كولىك قۇرالدارىن قايتا جابدىقتاۋ: ەگەر جۇرگىزۋشى كولىگىن قايتا جابدىقتاپ، ونى ءتيىستى ورگانداردا تىركەمەسە نەمەسە تىركەلگەن جابدىقتى ءوز بەتىمەن الىپ تاستاسا، اكىمشىلىك جاۋاپكەرشىلىككە تارتىلادى.
-
جولاقى تولەمەگەنى ءۇشىن ايىپپۇل: قوعامدىق كولىكتە جولاقى تولەمەگەن جولاۋشىلارعا 2 اەك (7 864 تەڭگە) مولشەرىندە ايىپپۇل سالىنادى.
بۇل وزگەرىستەر جول قوزعالىسى ەرەجەلەرىن بۇزۋدى ازايتۋ جانە جول قاۋىپسىزدىگىن ارتتىرۋ ماقساتىندا ەنگىزىلدى.