قازاقستاندا جاساندى ينتەللەكت تۋرالى زاڭ تۇپكىلىكتى قابىلداندى

ءماجىلىس دەپۋتاتتارى سەنات ەنگىزگەن تۇزەتۋلەرمەن كەلىسىپ، جاساندى ينتەللەكت (جي) تۋرالى زاڭ مەن وعان قاتىستى ءبىرقاتار زاڭدارعا وزگەرىستەر ەنگىزۋدى قولدادى، دەپ حابارلايدى اqshamnews.kz. 

زاڭعا قانداي وزگەرىستەر ەنگىزىلدى؟

وتكەن اپتادا سەنات بۇل زاڭ جوباسىن ماجىلىسكە كەرى قايتارىپ، ءبىرقاتار تولىقتىرۋلاردى تالاپ ەتكەن بولاتىن. اتاپ ايتقاندا:

• جاساندى ينتەللەكت جۇيەلەرىن پايدالانۋدان كەلەتىن زيان ءۇشىن مىندەتتى ساقتاندىرۋ ەنگىزىلەدى. بۇعان دەيىن ساقتاندىرۋ ەرىكتى تۇردە عانا قاراستىرىلعان ەدى؛

• جي جۇيەلەرىنىڭ يەلەرى تاۋەكەل بايقالعان جاعدايدا تەك زالالدى ازايتۋعا ەمەس، ونى الدىن الۋعا جانە مۇمكىن بولاتىن قاۋىپتەردىڭ الدىن تولىقتاي جويۋعا مىندەتتەلەدى.

ءماجىلىس تۇزەتۋلەردى ماقۇلدادى

بۇگىنگى پلەنارلىق وتىرىستا ءماجىلىستىڭ ەكونوميكالىق رەفورما جانە وڭىرلىك دامۋ كوميتەتى سەناتتىڭ ۇسىنىستارىمەن كەلىستى. دەپۋتاتتار داۋىس بەرىپ، زاڭ تۇپكىلىكتى قابىلداندى. ەندى قۇجات مەملەكەت باسشىسىنىڭ قول قويۋىنا جىبەرىلەدى.

حالىقارالىق تاجىريبە

قازىرگى ۋاقىتتا الەمنىڭ ءبىرقاتار ەلدەرى جاساندى ينتەللەكتتى زاڭنامالىق تۇرعىدا رەتتەۋگە كىرىسكەن:

• ەۋروپالىق وداق – جوعارى تاۋەكەلدى جۇيەلەرگە قاتاڭ تالاپتار مەن ايىپپۇلداردى كوزدەيتىن كەشەندى زاڭ قابىلداعان العاشقى وڭىرلەردىڭ ءبىرى. ول كەزەڭ-كەزەڭىمەن بيىل جانە كەلەسى جىلى كۇشىنە ەنەدى؛

• وڭتۇستىك كورەيا – رامالىق زاڭ قابىلدادى؛

• جۇڭگو، اقش، ۇلىبريتانيا جانە ءباا – جاساندى ينتەللەكت سالاسىن رەتتەيتىن جەكە نورماتيۆتىك اكتىلەر قولدانىستا؛

• جاپونيا، برازيليا جانە ءۇندىستان – زاڭ جوبالارى ازىرلەنۋ ۇستىندە.

جاڭا زاڭ قازاقستاندا جاساندى ينتەللەكتتى دامىتۋعا قۇقىقتىق نەگىز قالىپتاستىرىپ قانا قويماي، ونى ءقاۋىپسىز ءارى جاۋاپتى پايدالانۋعا باعىتتالعان.