قازاقستاندا جاڭا قالا پايدا بولادى، وڭ ءرۋلدى كولىكتەرگە ۋاقىتشا تىيىم سالىندى – اپتا ايناسى

اlmaty-akshamy.kz سايتىندا جارىق كورگەن وسى اپتاداعى جاڭالىقتارعا شولۋ

ەلىمىزدە الاتاۋ اتتى قالا پايدا بولادى

جەتىگەن اۋىلىنىڭ الاتاۋ قالاسى اتانۋى تۋرالى جارلىققا پرەزيدەنت قاسىم-جومارت توقايەۆ قول قويدى.

جارلىق ماتىنىندە الماتى وبلىسىنىڭ ىلە اۋدانىنان جەتىگەن اۋىلىن ءبولۋ جولى، ونىڭ وبلىستىق ماڭىزى بار قالا ساناتىنا جاتقىزىلۋى، ونىڭ اتاۋى الاتاۋ قالاسى بولىپ وزگەرتىلۋى تۋرالى ايتىلعان.

رامازان ايى قاشان باستالادى؟

قازاقستان مۇسىلماندارى ءدىني باسقارماسى 2024 جىلعى ءدىني كۇندەر كەستەسىن بەكىتتى.

شاريعات جانە ءپاتۋا ءبولىمى بەكىتكەن كۇنتىزبەگە سايكەس، رامازان ايى 11 ناۋرىزدا باستالادى.

ءمۇفتيات ءدىني مەرەكەلەردىڭ ناقتى كۇندەرى جاڭا ايدىڭ كورىنۋىنە بايلانىستى كورسەتىلگەن ۋاقىتتان ءبىر كۇن شەگەرىلۋى نەمەسە العا جىلجۋى مۇمكىن ەكەنىن ەسكەرتتى.

«ەۋروحاتتاما» قالاي جۇزەگە اسادى؟

قوسىمشانىڭ ارتىقشىلىعى نەدە:

بىرىنشىدەن. ازاماتتار ۇساق جول-كولىك وقيعالارىن رەسىمدەۋ ءۇشىن پوليسيانى كۇتپەيدى، وسىلايشا جولدارداعى كەپتەلىس جاعدايلارى تومەندەيدى.

ەكىنشىدەن. جەڭىلدەتىلگەن تارتىپپەن تىركەلگەن جول-كولىك وقيعاسى كەزىندە جۇرگىزۋشىلەر اكىمشىلىك جاۋاپكەرشىلىككە تارتىلمايدى.

ۇشىنشىدەن. ساقتاندىرۋ تولەمدەرىنىڭ مەرزىمى قىسقارادى. ەگەر بۇرىن وسىنىڭ ءبارى 30-دان 90 كۇنگە دەيىن ۋاقىتتى السا، ءقازىر حاتتاما تىركەۋ ساتىنەن باستاپ تولەمدى الۋعا شامامەن بەس كۇن كەتەدى.

ءمامس-تىڭ قۇنى قانشا؟

بيىل جۇمىس بەرۋشىلەر قاراماعىنداعى قىزمەتكەرلەر ءۇشىن بۇرىنعىشا، جالاقىنىڭ 3% مولشەرىندە اۋدارىم جاسايدى. تولەمنىڭ شەكتى مولشەرى 10 ەتج نەمەسە 25 500 تەڭگەدەن اسپايدى. جۇمىس بەرۋشى اۋدارىمدى ءوز قالتاسىنان تولەيدى. ال جۇمىسكەرلەر جالاقىسىنان 2% ۇستاپ، قورعا اۋدارادى. جارنانىڭ شەكتى مولشەرى 10 ەتج نەمەسە 17 000 تەڭگەدەن اسپاۋى ءتيىس.

ساقتاندىرۋ مارتەبەسىن مىنا جەردەن تەكسەرۋگە بولادى:

• Qoldau 24/7 ءموبيلدى قوسىمشاسى؛


• fms.kz رەسمي سايتى؛


• Telegram-داعى @SaqtandyrýBot؛


• 1414 بايلانىس ورتالىعى؛


• Damumed ءموبيلدى قوسىمشاسى؛


• Halyk ءموبيلدى قوسىمشاسى؛


• BCC.KZ ءموبيلدى قوسىمشاسى؛


• Kaspi.kz ءموبيلدى قوسىمشاسى؛


• egov.kz ەلەكتروندىق ۇكىمەت سايتى.

وڭ ءرۋلدى كولىكتەر ەندى اكەلىنبەي مە؟

يندۋستريا جانە قۇرىلىس ءمينيسترىنىڭ 2023 جىلعى 29 جەلتوقسانداعى بۇيرىعىمەن قازاقستانعا 6 اي مەرزىمگە وڭ ءرۋلدى كولىكتەردى اكەلۋگە تىيىم سالىندى.

بۇيرىق العاشقى رەسمي جاريالانعان كۇنىنەن كەيىن كۇنتىزبەلىك ون كۇن وتكەن سوڭ، ياعني 2024 جىلعى 16 قاڭتاردان باستاپ قولدانىسقا ەنگىزىلەدى.

بيىل ءبىز 117 كۇن دەمالامىز

بۇل اپتاسىنا 5 كۇن جۇمىس ىستەيتىن ازاماتتارعا قاتىستى.

2024 جىلعى مەملەكەتتىك جانە ۇلتتىق مەرەكەلەر كۇنتىزبەسى جاريالاندى.

«ارالدىڭ تابانىنان سۋ كەتكەنمەن...»

تەڭىزدىڭ تۇبىندە سەكسەۋىل وتىرعىزۋ ءۇشىن 753 مىڭ گەكتار جەردىڭ توپىراعى زەرتتەلدى.

مەملەكەت باسشىسى ارال تەڭىزىنىڭ قۇرعاعان تابانىندا 2025 جىلعا دەيىن جالپى اۋماعى 1،1 ملن. گا جەرگە ورمان مەليوراسيالىق ەكپەلەر ەگۋ مىندەتىن قويدى.

ارال تەڭىزىنىڭ تارتىلۋى جاھاندىق پروبلەما ەكەنىن ەسكەرە وتىرىپ، مينيسترلىك حالىقارالىق ۇيىمدارمەن، ونىڭ ىشىندە حالىقارالىق ارالدى قۇتقارۋ قورىمەن (حاقق)، دۇنيەجۇزىلىك بانكپەن، حالىقارالىق ىنتىماقتاستىق جونىندەگى گەرمان قوعامىمەن (GIZ)، اقش-تىڭ حالىقارالىق دامۋ اگەنتتىگىمەن (USAID)، كورەيا ورمان قىزمەتىمەن جانە باسقا دا حالىقارالىق ۇيىمدارمەن ىنتىماقتاسا جۇمىس ىستەپ كەلەدى.

اتى وزگەرگەنمەن، زاتى وزگەرە مە؟

جولاۋشىلاردىڭ «قتج-جۇك تاسىمالى» جاۋاپكەرشىلىگى شەكتەۋلى سەرىكتەستىگىنە ايتار شاعىمى كوپ.

«اشىق نقا» پورتالىندا كولىك مينيسترلىگىنىڭ بىرنەشە تەمىرجول ستانساسى مەن رازەزدىڭ اتاۋلارىن وزگەرتۋ تۋرالى قاۋلى جوباسى جاريالاندى.

كولىك ارزانداي ما؟

ق ر ۇلتتىق ستاتيستيكا بيۋروسىنىڭ مالىمەتتەرىنە سايكەس، جەلتوقسان ايىندا اۆتوكولىكتەردىڭ تۇتىنۋ باعاسى قاراشامەن سالىستىرعاندا 2،5%-عا تومەندەدى.

2023 جىلى جەڭىل اۆتوكولىكتەر ءوندىرىسى دە، يمپورت تا ايتارلىقتاي ءوستى.

زورلىق-زومبىلىقتىڭ جازاسى قانداي؟

ەندى ايەلىنە نەمەسە بالا-شاعاسىنا قول كوتەرىپ، دەنساۋلىعىنا جەڭىل زيان كەلتىرگەندەر اكىمشىلىك ەمەس، قىلمىستىق جاۋاپكەرشىلىككە تارتىلادى. ءارى سوتقا وتباسىنىڭ شىرقىن بۇزاتىن ازاماتتاردى تۇرعىن ۇيدەن ۋاقىتشا شىعارىپ، الەۋمەتتىك بەيىمدەلۋ ورتالىقتارىنا جىبەرۋ قۇقىعى بەرىلىپ وتىر. بۇدان بولەك، تۇرمىستىق جانجالداردى ارنايى پوليسەيلەر تەرگەمەك.

سالتانات نۇكەنوۆانىڭ ولىمىنە قاتىستى تەرگەۋ اياقتالدى

پروكۋراتۋرا مەن ءىىم وكىلدەرى باق-قا بۇل ءىس بويىنشا كۇدىكتىنىڭ اعاسى قاماۋعا الىنعانىن مالىمدەدى. وعان ق ر قك 434-بابى (قىلمىس تۋرالى حابارلاماۋ) بويىنشا ايىپ تاعىلۋى ءتيىس.

قازاقستانعا قانشا تۋريست كەلگەن؟

9 ايدا 900 مىڭعا جۋىق ساياحاتشى ەلىمىزدىڭ تابيعاتىن تاماشالاعان.

ستاتيستيكالىق مالىمەتتەر بويىنشا، ەلىمىزگە ساياحاتتايتىن شەتەلدىك تۋريستەردىڭ گەوگرافياسى جىل ساناپ ارتىپ كەلەدى. ماسەلەن، قازاقستانعا جاقىن كورشىلەرىمىزدەن بولەك، مۇحيتتىڭ ارعى بەتىندەگى مەملەكەتتەردىڭ دە ساياحتاشىلارى كوپتەپ كەلە باستادى.

يرەك سىزىقتان – ءتۇزۋ سىزىققا

قىرعىزستان مەملەكەتتىك تۋىن جاڭارتتى.

«جوگوركۋ كەنەش» 20-جەلتوقساندا قىرعىزستاننىڭ تۋىن وزگەرتۋ تۋرالى زاڭ قابىلدادى جانە وعان 22 جەلتوقساندا پرەزيدەنت قول قويعان. قابىلدانعان زاڭعا ساي، قىرعىز رەسپۋبليكاسىنىڭ تۋىنداعى كۇن ساۋلەسى يرەكتەن ءتۇزۋ سىزىققا وزگەرتىلدى.

Qnet قارجى پيراميداسىنىڭ باسشىسى 6 جىلعا سوتتالدى

136 جابىرلەنۋشىگە 145 ميلليون تەڭگەدەن استام مولشەردە مۇلىكتىك زالال كەلتىرىلدى.

سوتتالۋشىنىڭ كىناسى جابىرلەنۋشىلەردىڭ، كۋاگەرلەردىڭ ايعاقتارىمەن، ساراپتامالاردىڭ قورىتىندىلارىمەن جانە قىلمىستىق ءىستىڭ باسقا دا ماتەريالدارىمەن دالەلدەندى.

الداعى سۋ تاسقىنى كەزەڭىنە دايىندىق باستالدى

سۋ تاسقىنى جاعدايىنىڭ ىقتيمال اسقىنۋلارىنا جەدەل دەن قويۋ ماقساتىندا 39 مىڭنان استام ادام، شامامەن 11 مىڭ بىرلىك تەحنيكا، 500-دەن استام ءجۇزۋ قۇرالى جانە 3 مىڭنان استام موتوپومپا سانىندا ازاماتتىق قورعاۋدىڭ مەملەكەتتىك جۇيەسىنىڭ كۇشتەر مەن قۇرالداردىڭ ارنايى توپتارى قۇرىلدى.

الداعى سۋ تاسقىنى كەزەڭىنە دايىندىق جانە ونى تۇراقتى وتكىزۋ ماقساتىندا تج ءمينيسترى الەۋمەتتىك-ەكونوميكالىق دامۋدىڭ كەشەندى جوسپارلارىندا جانە وڭىرلەردىڭ دامۋ جوسپارلارىندا كوزدەلگەن سۋ تاسقىنىنا قارسى ءىس-شارالاردى ىسكە اسىرۋدى قامتاماسىز ەتۋ قاجەتتىگىن اتاپ ءوتتى.

قازاقستاننىڭ ەڭ قىمبات فۋتبولشىسى كىم؟

ءتىزىمدى ۇلتتىق قۇرامانىڭ كاپيتانى اسحات تاعىبەرگەن باستاپ تۇر. شابۋىلشىنىڭ نارىقتاعى باعاسى 900 مىڭ ەۋرو. ۇزدىك ۇشتىكتى ماكسيم سامورودوۆ پەن ابات ايىمبەتوۆ جالعايدى. ال قىمبات اياقدوپ شەبەرلەرىنىڭ ءتىزىمىن سەرگەي مالىي 600 مىڭ ەۋرومەن تۇيىندەپ تۇر.

بيىلعى جاز بىلتىرعىدان دا ىستىق بولۋى مۇمكىن

عالىمدار 2024 جىلى رەكوردتىق اپتاپ ىستىق بولاتىنىن ەسكەرتتى. ولاردىڭ  ايتۋىنشا، 2023 جىل تاريحتاعى ەڭ ىستىق جىل بولدى، ءبىراق 2024 جىل بارلىق رەكوردتاردى بۇزۋى مۇمكىن.

دۇنيە جۇزىندەگى تەمپەراتۋرانىڭ بۇل كوتەرىلۋى پلانەتانى عالىمدار بىرنەشە جىلدار بويى ەسكەرتىپ كەلە جاتقان قايتىمسىز كليماتتىق وزگەرىستەرگە ءقاۋىپتى تۇردە جاقىنداتادى. ودان ءارى جىلىنۋ داۋىل، قۇرعاقشىلىق، سۋ تاسقىنى جانە ورمان ورتتەرى سياقتى ەكسترەمالدى اۋا رايى وقيعالارىنا اكەلەدى.

قىزاناقتان ۆاكسينا جاساعان

عالىمدار كوروناۆيرۋستىڭ S1 انتيگەن اقۋىزىن كودتايتىن گەن فراگمەنتىن ارنايى ۆەكتورلارعا ورنالاستىرىپ، ونى قىزاناق جاسۋشاسىنىڭ گەنومىنا ەنگىزدى.

وزبەكستان عالىمدارى كوروناۆيرۋس ينفەكسياسىنا قارسى العاش رەت قىزاناق وسىمدىگىنەن تىكەلەي تۇتىنۋعا بولاتىن گەنەتيكالىق ۆەكتورلار مەن قىزاناق وسىمدىگىنە نەگىزدەلگەن COVID-19 جاڭا بۋىنداعى ۆاكسينا جاسادى.

700 مىڭعا جۋىق بالا قىزىلشاعا قارسى ەكپە سالدىرعان

ەل بويىنشا بارلىعى 10 مىڭعا جۋىق ينفەكسيالىق توسەك-ورىن قويىلدى، ولاردىڭ ىشىندە بالالار ءۇشىن شامامەن 3 مىڭ توسەك-ورىن قاراستىرىلعان. 2023 جىلدىڭ سوڭىندا ەلدە 29 مىڭنان استام قىزىلشا جۇقتىرۋ جاعدايى تىركەلدى، ونىڭ 80%-ى 14 جاسقا دەيىنگى بالالارعا تيەسىلى.

قارۋ جاسايتىن 7 سەح انىقتالدى

ۇلتتىق قاۋىپسىزدىك كوميتەتى پوليسيا جانە پروكۋراتۋرا ورگاندارىمەن بىرلەسىپ زاڭسىز اينالىمنان 14 ارناسىن انىقتاپ، ونى قولدان جاساعان 7 سەح جويىلدى.

51 كالاشنيكوۆ اۆتوماتى، 192 مىلتىق، 165 تاپانشا، 45 گراناتا، 2 گراناتومەت، 4 دانا سنارياد پەن مينالار، 7 جارىلعىش قۇرىلعىلار جانە ءارتۇرلى كاليبردەگى 36 870 پاترون تاركىلەندى.

«ءپۋتيندى جاقسى كورەتىن ايەل...»

اقتوبەلىك تۇرعىن رەسەي فەدەراسياسىنا قوسىلۋ يدەياسىن قولداپ، كەيىننەن قازاقستان حالقىنان كەشىرىم سۇرادى.

"ءقازىر بۇكىل جەلىدە تاراپ جاتقان ۆيدەو ءۇشىن كەشىرىم سۇرايمىن. بۇل ۆيدەو ءۇشىن قاتتى وكىنەمىن، مەن، ارينە، سوعىسقا دا، رەفەرەندۋمعا دا قارسىمىن. مەن قازاقستانىمدى سۇيەمىن، بۇل - مەنىڭ وتانىم، بۇل - مەنىڭ ەلىم، مەن بالالارىمدى وسىندا دۇنيەگە اكەلدىم، نەمەرەلەرىم وسىندا دۇنيەگە كەلدى. ءبىز مۇندا تۇرامىز، بىزدە ءبارى بار. بۇل ۆيدەو ءۇشىن تاعى دا كەشىرىم سۇرايمىن. ويتكەنى مەن ارانداتۋشىلىققا بوي الدىردىم جانە ويلانباستان جاۋاپ بەردىم. "بۇل بەينەنى كىم تاراتسا دا، بۇل ءۇشىن قاتتى وكىنەمىن"، - دەدى ول.

الماتىدا كوز اۋرۋلارىن ەمدەيتىن بىرەگەي جاڭا كلينيكا اشىلادى

بۇل ءىستى 15 جىلدان بەرى تۇركيانىڭ ىستامبۇل قالاسىندا تۇرىپ، اتالعان سالامەن تۇراقتى اينالىسىپ كەلە جاتقان ءساتجان توقتارباي ەسىمدى وتانداسىمىز قولعا العان.

«الماتىدا قالاسىندا 15 قاڭتاردا «Asiakoz» دەگەن كوز كلينيكاسىن اشۋدى جوسپارلاپ وتىرمىز. ونى اشۋ سەبەبىمىز – ءقازىر كوزگە ەم ىزدەپ، شەتەلگە باراتىندار كوپ، سونىمەن قاتار كوزىنە كۇردەلى وتا قاجەت، ءبىراق، قاراجات جاعىنان جولىنا اقشا تابا الماي، بىزگە جەتە المايتىندار دا بار. ەندى قازاقستاندىقتار كوزىن ەمدەتۋ ءۇشىن انادولىعا بارمايدى، وسى جەردە-اق ەمدەتە الادى. تۇركيالىق بىلىكتى حيرۋرگتاردى وسىندا الىپ كەلەمىز. ەمحانامىز تولىقتاي سوڭعى تەحنولوگيامەن حالىقارالىق ستاندارتتارعا ساي جابدىقتالعان. تۇپكى ماقساتىمىز — كلينيكامىزدى ورتالىق ازياداعى كوز ەمدەيتىن ىرگەلى ورتالىققا اينالدىرۋ»، دەدى ول.

سۋسىنعا دا سالىق بار!

وزبەكستاندا ەنەرگەتيكالىق جانە گازدالعان سۋسىندارعا اكسيزدىك سالىق ەنگىزىلەدى.

قۇرامىندا قانتى بار گازدالعان سۋسىندار ءۇشىن اكسيز سالىعى ليترىنە 500 سۋم. ەلدىڭ دەنساۋلىق ساقتاۋ مينيسترلىگى قانت ديابەتى كوبەيۋى مۇمكىن دەپ الاڭدايدى. جالپى 18 جاسقا تولماعاندارعا ەنەرگەتيكالىق سۋسىنداردى ساتۋ جانە ولاردى جارنامالاۋعا شەكتەۋ قوياتىن زاڭ التى جىل بۇرىن قابىلدانعان. اكسيزدەن تۇسكەن قارجى مەديسينا سالاسىن دامىتۋ قورىنا اۋدارىلادى.

ىزدەۋدە جۇرگەن شەتەلدىك ازاماتتى الماتى وبلىسىنىڭ پوليسەيلەرى ۇستادى

الماتى وبلىسى پد ەكسترەميزمگە قارسى ءىس-قيمىل باسقارماسىنىڭ قىزمەتكەرلەرى كورشى ەلدىڭ قۇقىق قورعاۋ ورگاندارى ىزدەگەن 1969 جىلعى ازاماتتى ۇستادى. ىزدەۋدەگى ادام ءوز ەلىنىڭ قۇقىق قورعاۋ ورگاندارىنا تابىستالعانعا دەيىن قاراساي اۋداندىق پب ۋۇي-عا قاماۋعا الىندى.

گەنا – الەمدەگى ەڭ باي بوكسشى

Wealthy Gorilla باسىلىمىنىڭ مالىمەتىنشە، گولوۆكيننىڭ كاسىبي مانسابىنداعى تابىسى – 30 ميلليون دوللار. گەنناديي وسى تابىسىمەن الەمدەگى ەڭ باي بوكسشىلاردىڭ تىزىمىندە 20-ورىندا تۇر.

3000 ادام اسكەري دايىندىققا شاقىرىلادى

قورعانىس مينيسترلىگى "اسكەري قىزمەتكە مىندەتتىلەردى 2024 جىلعا اسكەري دايىندىققا شاقىرۋ تۋرالى" بۇيرىق دايىندادى.

بۇيرىق جوباسى 23 قاڭتارعا دەيىن قوعامدىق تالقىلاۋ ءۇشىن "اشىق نقا" سايتىندا ورنالاستىرىلعان.

ءموبيلدى اۋدارىمداردىڭ ءبارى بىردەي  تەكسەرىلمەيدى

ءوز كىرىستەرىن جاسىراتىن نەمەسە جەكە شوتتارىنا قاتارىنان ءۇش اي ىشىندە اي سايىن 100 جانە ودان دا كوپ ءتۇرلى تۇلعالاردان ءموبيلدى اۋدارىمدار العان جەكە كاسىپكەر رەتىندە تىركەلمەگەن تۇلعالار عانا تەكسەرۋگە جاتادى. تەك قولما-قول اقشاسىز ەسەپ ايىرىسۋ بويىنشا جۇمىس ىستەيتىن ادال كاسىپكەرلەر باقىلانبايدى. سونداي-اق، بيزنەستى جۇرگىزۋ جانە دامىتۋ ءۇشىن قولايلى جاعدايلار جاسالعان. سالىق رەجيمدەرىنىڭ ءتارتىبى جەڭىلدەتىلدى، بولشەك ساۋداگەرلەر، قىزمەت كورسەتەتىن كاسىپكەرلەر، مىسالى، شاشتارازدار وسى رەجيمدى قولدانا الادى. ءقازىر سالىق مىندەتتەمەلەرىن ادال ورىنداۋ الدەقايدا ءتيىمدى.

ۇلتتىق تاعام – ۇلاعاتتى ۇرپاق

الماتى مەكتەپتەرىندە وقۋشىلارعا ۇلتتىق تاعامدار بەرىلۋى مۇمكىن. ديەتولوگتاردىڭ ايتۋىنشا، دۇرىس تاماقتانۋدى مەكتەپ قابىرعاسىنان باستاۋ كەرەك. الماتى قالالىق ءبىلىم باسقارماسى "ۇلتتىق سالاۋاتتى تاماقتانۋ" ورتالىعىنىڭ ماماندارىمەن بىرلەسىپ، ارنايى ءمازىر دايىنداپ جاتىر. وندا بالالار ءۇشىن قۇنارلى ءارى ءار ەلدىڭ ۇلتتىق تاعام تۇرلەرى ەنگىزىلمەك.

بۇگىندە الماتىداعى مەملەكەتتىك ءبىلىم بەرۋ ۇيىمدارىندا 134 مىڭنان استام وقۋشى تەگىن تاماقپەن قامتىلعان. ءبىر بالانىڭ كۇندىك تاعام باعاسى ورتاشا ەسەپپەن 830 تەڭگە.

مەن اتامنان قاشتىم...

الەۋمەتتىك جەلىدە تۇركىستان قالاسىنداعى 2021 جىلى پايدالانۋعا بەرىلگەن كەرۋەن ساراي كەشەنىندە ءساندى دەكوراتيۆتىڭ جەلمەن دومالاپ بارا جاتقان ۆيدەوسى تارادى.

قاتتى جەلدىڭ سالدارىنان ساندىك (دەكوراتيۆتى) شاردىڭ ءبىرى ءۇزىلىپ، سۋ باسسەينىنە تۇسكەن. شاردىڭ سالماعى 5 كەلىدەن اسپايتىن، جەڭىل بولۋى سەبەپتى جەلدىڭ ەكپىنىمەن قوزعالىپ ۇزىلگەنىن جانە بۇل كەلەڭسىزدىكتەن ەشكىم زارداپ شەكپەگەن.

كوز جاسى قاراكولگە تامعان...

قىرىلعان اققۋلار سانى 826-عا جەتتى.

ماماندار ولاردىڭ قۇس تۇماۋىنان ولگەنىن مالىمدەگەن ەدى. قاراكول وزەنىنە جىبەرىلەتىن سۋدى زەرتتەۋ كەزىندە زياندى زاتتاردىڭ شامادان تىس مولشەرى انىقتالدى.

حالىق كولگە زياندى قالدىقتاردىڭ توگىلىپ جاتقانىن جارىسا جازدى. سونىڭ سالدارىنان اققۋلار قىرىلىپ جاتىر دەگەن بولجام دا جاسالدى.

الماتىدا بىلتىر 334 كونسەرت وتكەن

1،6 ميلليوننان استام ادام كەلگەن.

ولاردىڭ اراسىندا 50 Cent، Akon، Lara Fabian، Ne-Yo، تاركان، Outlandish، Arash جانە باسقا دا كوپتەگەن ءانشى بار. ايتپاقشى، وتكىزىلگەن ءىس-شارالاردىڭ 86%-ىن كوممەرسيالىق جانە جەكە كومپانيالار ۇيىمداستىرعان.

New York Times الماتىنى تاڭدادى

قالامىز 2024 جىلعى ەڭ ۇزدىك تۋريستىك باعىتتار تىزىمىنە ەندى. الماتى تىزىمدە 25 ورىندا تۇر.

بۇعان دەيىن 2017 جىلى قازاقستان ەكسپو-2017 كورمەسى قارساڭىندا وسى تىزىمگە ەنگىزىلگەن بولاتىن.

كوپبالالىلاردىڭ جاردەماقىسى كوبەيدى

الەۋمەتتىك كودەكستىڭ 91-بابىنا ساي، ونىڭ مولشەرى مىناداي: 4 بالاعا شامامەن 59183 تەڭگە، ال 5 بالاعا شامامەن 74 مىڭ، ەگەر وتباسىندا 8 نەمەسە ودان دا كوپ بولسا، ءار بالاعا 4 ايلىق ەسەپتىك كورسەتكىش كولەمىندە تولەنەدى.

ەگەر وتباسىندا 8 جانە ودان دا كوپ بالا بولسا، ءار بالاعا 4 اەك، ياعني 8 بالاعا 32 اەك (118 144 تەڭگە).

ءيتتىڭ ەتىن جەيسىڭ بە؟

وڭتۇستىك كورەيانىڭ پارلامەنتى ءيتتىڭ ەتىن جەۋگە تيىم سالاتىن زاڭ جوباسىن ماقۇلدادى. زاڭدى بۇزعاندار ءۇش جىلعا سوتتالادى نەمەسە 23 مىڭ اقش دوللارى كولەمىندە ايىپپۇل تولەيدى.  يت وسىرۋشىلەر مەن مەيرامحانا يەلەرىنە ءۇش جىل مەرزىم بەرىلىپ وتىر. ولار وسى ۋاقىت ىشىندە بيزنەسىن توقتاتادى نە بولماسا باسقا باعىتقا وزگەرتەدى.

شىعارماشىلىقتىڭ سالىعى جەڭىلدەي مە؟

كاسىپكەرلەر كورپوراتيۆتىك تابىس سالىعىن، جەكە تابىس سالىعىن جانە قوسىلعان قۇن سالىعىن تولەۋدەن بوساتىلادى. ونىڭ ورنىنا جەكە كاسىپكەرلەر ءۇشىن 2% - دان 4% - عا دەيىنگى، سونداي-اق ج ش س ءۇشىن 8% مولشەرىندە ءبىرىڭعاي سالىق ەنگىزىلەتىن بولادى.

جاياۋ ءجۇرۋدىڭ دە ەرەجەسى بار

ەندى جاياۋ جۇرگىنشىلەردىڭ قيىلىستاردا جولدى كەسىپ ءوتۋى الدەقايدا قيىندايدى. ويتكەنى، ولار بۇرىلۋ مانيەۆرىن ورىنداي الماعان كولىككە جول بەرۋگە ءماجبۇر بولادى.

باعدارشامنىڭ جاسىل ءتۇسى جانا سالىسىمەن كولىك قۇرالدارى بۇرىن باستاعان مانيەۆردى اياقتادى ما نەمەسە ونىڭ جاياۋ جۇرگىنشىلەر جولىنىڭ الدىندا توقتاۋعا مۇمكىندىگى بار ما دەگەن ماسەلەگە باس اۋىرتپاي جولعا شىعا بەرەدى.

بايقاۋعا بارىپ، باعىڭدى سىنا!

ەلىمىزدە «اباي» اتىنداعى بايقاۋ جاريالاندى. ۇمىتكەرلەردى شىعارماشىلىق توپتار مەن وداق، مەملەكەتتىك ورگاندار ۇسىنادى. قاتىسۋشىنىڭ  بەس جىل مەن ءبىر جىل ارالىعىنداعى شىعارماشىلىق جۇمىسى سارالانادى، دەيدى قازىلار القاسى. بايقاۋدىڭ تالاپتارىنا قاتىستى وزگە دە مالىمەتتى مادەنيەت جانە اقپارات ءمينيسترلىنىڭ سايتىنان وقۋعا بولادى.

قازاقستان الەمدەگى ەڭ مىقتى ءتولقۇجاتتار رەيتينگىندە 66-ورىندا تۇر

Henley & Partners 2024 جىلدىڭ ءتولقۇجات يندەكسىن جاريالادى. رەيتينگ باسىندا گەرمانيا، يسپانيا، يتاليا، فرانسيا، سينگاپۋر جانە جاپونيا تۇر، بۇل ەلدەردىڭ ازاماتتارى 194 ەلگە ۆيزاسىز كىرە الادى. سوسىن فينليانديا، شۆەسيا جانە وڭتۇستىك كورەيا ەلدەرىنىڭ ازاماتتارى 193 ەلگە ۆيزاسىز كىرە الادى ەكەن.