جىل باسىنان بەرى ىشكى ىستەر مينيسترلىگى ىزدەۋدە جۇرگەن 58 قىلمىسكەردى ۇستادى، دەپ حابارلادى Polisia.kz.
كەيبىر قىلمىسكەردىڭ قالاي ۇستالعانىن ءىىم كريمينالدىق پوليسيا دەپارتامەنتى باسشىسىنىڭ ورىنباسارى رۋسلان نازاروۆ ايتىپ بەردى.
«اقتاۋ پوليسياسى جەرگىلىكتى تۇرعىندى ۇستادى. بىلتىر قاراشادا ول ماس كۇيىندە قالاداعى كافەلەردىڭ بىرىندە جانجال شىعارىپ، تۇرعىندى ۇرىپ-سوققان. جابىرلەنۋشى اۋىر حالدە اۋرۋحاناعا جاتقىزىلدى.
وزبەكستاننىڭ ءۇشقورعان قالاسىندا جەرگىلىكتى قۇقىق قورعاۋ ورگاندارى الماتى وبلىسىنىڭ كريمينالدىق پوليسيا قىزمەتكەرلەرىمەن بىرلەسىپ، ىزدەۋدە جۇرگەن وزبەكستاندىقتى ۇستادى. ول 2 ادامدى ءولتىردى دەگەن كۇدىككە ىلىنگەن. 2012 جىلى ەر ادام الماتى وبلىسى ەڭبەكشىقازاق اۋدانىندا جۇمىس ىستەپ ءجۇرىپ، زەينەتكەرلەردىڭ ۇيىنە زاڭسىز كىرگەن. وسىلايشا، ولاردى ءولتىرىپ، اقشا ۇرلاپ كەتكەن.
استانادا پوليسيا قوستانايلىق ارىپتەستەرىمەن بىرلەسىپ، 2020 جىلى «ەلوردادا سالىناتىن تۇرعىن ءۇي كەشەنىنە ينۆەستيسيا سالامىز جانە بروندايمىز» دەگەن سىلتاۋمەن 144 ۇلەسكەردىڭ اقشاسىن يەمدەنگەن كومپانيا ديرەكتورى مەن قۇرىلتايشىسىن ۇستادى. ولار تاعى 2 ج ش س باسشىسىمەن بىرگە 4 ملرد تەڭگەنى جىمقىرعان. سوڭعى ەكەۋى بۇرىن ۇستالعان. ءقازىر ولاردىڭ ۇستىنەن تەرگەۋ ءجۇرىپ جاتىر، - دەدى ول.
سونداي-اق كريمينالدىق پوليسيا حابار-وشارسىز كەتكەن 30 ادامنىڭ قايدا جۇرگەنىن انىقتادى.