قازاقستاندا بيىل جاڭا حالىقارالىق اۋە رەيستەرى اشىلادى. بۇل تۋرالى كولىك ءمينيسترى نۇرلان ساۋرانبايەۆ مالىمدەدى، - دەپ حابارلايدى aqshamnews.kz ءتىلشىسى.
نۇرلان ساۋرانبايەۆتىڭ ايتۋىنشا، 21 قاڭتاردا ۇكىمەت وتىرىسىندا 2026 جىلى حالىقارالىق اۋە باعىتتارىن قايتا جانداندىرۋ جانە جاڭا رەيستەردى اشۋ جوسپارلانىپ وتىر. مينيستر ناقتى باعىتتاردى اتامادى، الايدا قازاقستاندىقتار قاي قالالارعا ءجيى ۇشا الاتىنىن ايتتى.
"سونداي-اق قولدانىستاعى باعىتتار بويىنشا رەيستەردىڭ جيىلىگىن ارتتىرۋ جوسپارلانىپ وتىر، ونىڭ ىشىندە ۆەنا، توكيو، ريم، ابۋ-دابي، رياد، داممام، لارناكا، اممان، شانحاي، قاشقار، ۆارشاۆا جانە باسقا قالالارعا"، - دەپ قوستى نۇرلان ساۋرانبايەۆ.
پرەمەر-مينيستر ولجاس بەكتەنوۆ ءبىر اپتا ىشىندە ناقتى ۇسىنىستار ەنگىزۋدى تاپسىردى.
"كولىك مينيسترلىگىنە "سامۇرىق-قازىنا" قورىمەن بىرلەسىپ، ءبىر اپتا مەرزىمدە جاڭا حالىقارالىق اۋە رەيستەرىن ىسكە قوسۋ جانە ۇلتتىق جۇك تاسىمالداۋشىنىڭ ودان ءارى قىزمەتىنە قاتىستى ناقتى ۇسىنىستار ەنگىزۋدى تاپسىرامىن"، - دەدى پرەمەر-مينيستر.