الماتىنىڭ №78 مەكتەپ-گيمنازياسىندا ءبىلىم باسقارماسىنا قاراستى قالالىق ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعىنىڭ قولداۋىمەن «سالاماتتى مەكتەپ» ۇلتتىق جوباسى اياسىندا سەمينار ءوتتى.
ماقساتى – باستاۋىش سىنىپ وقۋشىلارىنا ارنالعان «سالاۋاتتى تاماقتانۋ مەكتەبى» اۆتورلارىنىڭ كاسىبي تاجىريبەسىن تاراتۋ، دۇرىس تاماقتانۋ بويىنشا وقۋ-تاربيە ۇدەرىسىنە ءتيىمدى ادىستەردى ۇتىمدى ەنگىزۋ، پەداگوگتەردىڭ ءوزارا تاجىريبە الماسۋ الاڭىن قۇرۋ.
سەمينارعا «سالاماتتى مەكتەپ» ۇلتتىق جوباسىنا اتسالىسىپ جۇرگەن 80-نەن استام ءبىلىم بەرۋ ۇيىمىنىڭ وكىلدەرى قاتىستى.
ءىس-شارانى №78 مەكتەپ-گيمنازيا ديرەكتورى قۇندىز ءسادۋاقاسوۆا قۇتتىقتاۋ سوزىمەن اشىپ، باستاۋىش سىنىپ وقۋشىلارى ءۇشىن دۇرىس تاماقتانۋ مادەنيەتىن قالىپتاستىرۋدىڭ ماڭىزدىلىعىن اتاپ ءوتتى.
قالالىق ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعىنىڭ ءبولىم جەتەكشىسى، «سالاماتتى مەكتەپ» جوباسىنىڭ ۇيلەستىرۋشىسى تاتيانا ۆلاديميروۆنا بالالاردىڭ دەنساۋلىعىنا الاڭداۋشىلىقتان تۋىنداعان دۇرىس تاماقتانۋ جوباسىمەن جان-جاقتى تانىستىردى. دۇرىس تاماقتانۋ مادەنيەتىن ادام بويىندا ەرتە جاستان قالىپتاستىرۋدىڭ ماڭىزدىلىن ايقىندايتىن عىلىمي-تاجىريبەلىك مالىمەتتەرگە سايكەس، وسى №78 مەكتەپ-گيمنازيانىڭ باستاۋىش سىنىپ مۇعالىمدەرى گۇلميرا روزىباكييەۆا، اللا حاندوگينا جانە اتالعان ورتالىقتىڭ ءبولىم جەتەكشىسى زۋلفيرا بيبالينوۆا بىرلەسىپ، 1-4-سىنىپ وقۋشىلارىنا ارنالعان «سالاۋاتتى تاماقتانۋ مەكتەبى» باعدارلاماسىن ازىرلەدى.
بۇگىنگى كۇنى وقۋشىلاردىڭ دەنساۋلىققا زياندى تاعامداردان باس تارتىپ، ادام اعزاسىنا پايدالى ازىقتارمەن دەنساۋلىق كۇتىمىن نىعايتۋدى كوزدەيتىن جوبا بويىنشا جۇمىس ىستەيتىن مەكتەپتەر سانى ارتا باستادى.
«ەلىمىزدە وقۋ-اعارتۋ مينيسترلىگى مەن دەنساۋلىق ساقتاۋ مينيسترلىگىنىڭ بىرلەسكەن «سالاماتتى مەكتەپ» ۇلتتىق جوباسىن جۇزەگە اسىرۋ اياسىندا «دۇرىس تاماقتانۋ مەكتەبى» باعدارلاماسىنا الماتى قالاسىنىڭ بارلىق مەكتەبى تولىق قاتىسادى. ايتۋلى جوبا شەڭبەرىندە جىل سايىن پەداگوگتەرگە ارنالعان قالالىق، وڭىرلىك، رەسپۋبليكالىق ادىستەمەلەر بايقاۋلارى ۇيىمداستىرىلادى. اتاپ ايتساق، وتكەن جىلى وسى №78 مەكتەپ-گيمنازيانىڭ باستاۋىش سىنىپ ءمۇعالىمى سايدا ماگامەدوۆا رەسپۋبليكالىق ۇزدىك ادىستەمەلەر بايقاۋىنىڭ جەڭىمپازى اتاندى. جالپى، «دۇرىس تاماقتانۋ مەكتەبى» باعدارلاماسىنا قىزىعۋشىلىق تانىتقان پەداگوگ، اتا-انا، وقۋشى ءۇشىن بارلىق رەسۋرس قولجەتىمدى، ادىستەمەلىك وقۋ قۇرالدارى مەن جۇمىس داپتەرلەرى عالامتورعا جۇكتەلگەن. ارينە، مۇنىڭ ءبارى باعدارلاما اۆتورلارىنىڭ ۇزدىكسىز ىزدەنىسى مەن تاباندىلىقپەن اتقارعان ەڭبەكتەرىنىڭ ناتيجەسى»، – دەپ اتاپ ءوتتى «سالاماتتى مەكتەپ» ۇلتتىق جوباسىنىڭ ۇيلەستىرۋشىسى تاتيانا ۆلاديميروۆنا.
سەميناردا باعدارلاما اۆتورلارى – گۇلميرا روزىباكييەۆا، اللا حاندوگينا باستاۋىش سىنىپتارعا ارنالعان «دۇرىس تاماقتانۋ مەكتەبى» باعىتىنداعى جۇمىس تاجىريبەلەرىمەن ءبولىستى. باستاۋىش سىنىپ وقۋشىلارىنىڭ كوكونىس پەن جەمىستىڭ ادام اعزاسىنا پايداسى تۋرالى ازىرلەگەن كورسەتىلىمى سالاۋاتتى تاماقتانۋ مەكتەبى – دەنساۋلىق كۇتىمىنىڭ نەگىزى ەكەنىن ايشىقتاي ءتۇستى.